ރައީސް މުއިއްޒުގެ ސަރުކާރާއެކު ރާއްޖެވަނީ ބޮއްސުންލާފައި: ވަހީދު
ކުރީ ސަރުކާރު ކުށްވެރި ކުރިނަމަވެސް މިސަރުކާރުގެ ބޭފުޅުންނަށް މަސްއޫލިއްޔަތުން ރެކެވެން ނޯންނާނެ
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރާއެކު ދިވެހިރާއްޖެ ބޮއްސުންލާފައިވާ ކަމަށާއި، ގައުމު ދަނީ ބަގުރޫޓުވަމުން ކަމަށް ރައްޔިތުން މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވަހީދު ވިދާޅުވީ ރިޔާސީ އިންތިޚާބުގެ ކެންޕޭން އަދި 20 ވަނަ ރައްޔިތުން މަޖިލީހުގެ އިންތިޚާބުގެ ކެންޕޭންގެ ތެރޭގައި މިސަރުކާރުގެ ބޭފުޅުން ދެއްކި ވާހަކައާއި މިހާރު ދައްކަމުންދާ ވާހަކަތައް މުޅިން ތަފާތުވެފައިވާ ކަމަށެވެ. މިއީ ރައްޔިތުންނަށް ކަންކަން އޮޅުވާލުން ކަމަށް ވަހީދު ވިދާޅުވިއެވެ.
ވަހީދު ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވިއިރު ގައުމުގެ އިގްތިސާދީ ހާލަތު ރަނގަޅަށް އެނގިވަޑައިގަންނަވާ، ދަރަނި ދެއްކޭނެ ކަމުގެ ފުރިހަމަ ޔަގީންކަން ރައްޔިތުންނަށް ދެއްވި ކަމަށެވެ. ނަމަވެސް ހުރިހާ ކަމެއް ބޮއްސުންލައިގެން ދިއުމުން ކުރީ ސަރުކާރު ކުށްވެރި ކުރުމަށް މަސައްކަތް ކުރަމުންދާ ކަމަށާއި، ކުރީ ސަރުކާރު ކުށްވެރި ކުރިނަމަވެސް މިސަރުކާރުގެ ބޭފުޅުންނަށް މަސްއޫލިއްޔިތުން ރެކެވެން ނޯންނާނެ ކަމަށް އޭނާ ވިދާޅުވިއެވެ.
މި ސަރުކާރުގެ ބޭފުޅުންގެ އަމަލުތަކުގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ބޮޑު ގެއްލުމެއް ކުރިމަތިވިކަން ފާހަގަކުރައްވައި ވަހީދު ވިދާޅުވީ ރާއްޖެއަށް އެންމެ ގިނައިން ފަތުރުވެރިން އަންނަމުން އައި ގައުމުތަކުން ފަތުރުވެރިން އައުން އިންތިހާއަށް މަދުވެ، ރާއްޖެއާ ދެކޮޅަށް އެންޓި ކެންޕޭންތައް ކުރިއަށް ގެންދިޔަ ކަމަށެވެ. އަދި އެކަމުގެ ގެއްލުން ކުރިމަތިވީ މުޅި ރާއްޖެއަށް ކަމަށް އޭނާ ވިދާޅުވިއެވެ.
މީގެ އިތުރުން ވަހީދު ވިދާޅުވީ މިސަރުކާރާއެކު ރާއްޖޭގެ ހާރިޖީ ސިޔާސަތު ހަލާކުކޮށްލާފައިވާ ކަމަށެވެ. އަދި ވިދާޅުވީ ރައްޔިތުންނަށް ދެމުންދިޔަ ޚިދުމަތްތަކަށް ވެސް ބުރޫއަރުވާފައިވާ ކަމަށެވެ. އެގޮތުން ބޭރު ގައުމުތަކުގެ ހޮސްޕިޓަލްތަކުން ލިބުނު އާސަންދަ ޚިދުމަތް މެދުކަނޑާލާފައިވާކަން ވަހީދު ފާހަގަކުރެއްވިއެވެ.
ވަހީދު ވިދާޅުވީ ރައީސް މުއިއްޒުގެ ސަރުކާރަށް ގައުމު ހިންގަން ނޭނގޭ ކަމަށެވެ.
ނަތީޖާއެއް ގޮތުން ކޮވިޑް-19ގެ ހާލަތުގައި ވެސް ދަތިނުވާ މިންވަރަށް މާލީ ހާލަތު ދަށްވެ، ވިޔަފާރިތައް ބަގުރޫޓުވަމުންދާ ކަމަށް އޭނާ ވިދާޅުވިއެވެ. ވަހީދު ވިދާޅުވީ ޑޮލަރުގެ ތާށިކަން ވެސް އިންތިހާއަށް ކުރިމަތިވެފައިވާ ކަމަށާއި، ރާއްޖޭގެ މަސައްކަތްތެރިކަމުގެ ހުރިހާ ދައިރާއެއް ހަލާކުވަމުންދާ ކަމަށެވެ. އަދި ވިދާޅުވީ ގައުމު މިއަދު އޮތީ ބޮއްސުންލާފައިވާ ކަމަށެވެ.
