އިންގްލެންޑުން އަޔަލެންޑް ބަލިކޮށްފި

ޔުއެފާ ނޭޝަންސް ލީގު ބީގެ، ގްރޫޕް ތިނެއްގައި އަޔަލެންޑާ ދެކޮޅަށް ކުޅުނު މެޗުން އިންގްލެންޑު މޮޅުވެއްޖެ އެވެ.

ހޮނިހިރު ދުވަހުގެ ރޭ އަވިވާ ސްޓޭޑިއަމްގައި ކުޅުނު މެޗު އިންގްލެންޑުން ކާމިޔާބު ކުރީ 2-0 އިންނެވެ. މެޗުގައި އިންގްލެންޑުން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ. މިއީ އިންގްލެންޑުގެ ވަގުތީ ކޯޗުކަމާ ހަވާލުވި، އެ ޤައުމުގެ 21 އަހަރުން ދަށުގެ ޤައުމީ ޓީމަށް އިރުޝާދު ދެމުން އަންނަ ލީ ކާސްލޭގެ އިރުޝާދުގެ ދަށުން އިންގްލެންޑު ކުޅުނު ފުރަތަމަ މެޗެވެ.

މެޗު ފަށައިގެން 11 ވަނަ މިނެޓުގައި އިންގްލެންޑަށް ލީޑު ނަގައިދިނީ ޑެކްލަން ރައިސް އެވެ. އޭގެ ފަހުން ފުރަތަމަ ހާފުގެ 26 ވަނަ މިނެޓުގައި އިންގްލެންޑުގެ ދެ ވަނަ ލަނޑު ޖެހީ ޖެކް ގްރީލިޝް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ރައިސް އެވެ.

މި ގުރޫޕުގައި ދެން ކުޅުނު މެޗަށް ބަލާއިރު، ގްރީސް އިން ވަނީ ފިންލޭންޑްގެ މައްޗަށް ކުރި ހޯދައިފަ އެވެ. އެ މެޗު ގްރީސް އިން ކާމިޔާބު ކުރީ 3-0 އިންނެވެ. މެޗުގައި ގްރީސްގެ ދެ ވަނަ ލަނޑަކީ ފިންލޭންޑުގެ ކުޅުންތެރިޔެއްގެ އަތުން ބައި ކޮޅަށް ވަތް ލަނޑެކެވެ.

މި ގުރޫޕުގައި އިންގްލެންޑުގެ ދެ ވަނަ މެޗުގައި އެ ޓީމު ނިކުންނާނީ ފިންލޭންޑާ ދެކޮޅަށެވެ.