ގދ.ތިނަދޫއިން ފަހަތުން އަރައި އެންމެ ފަހުގެ ރަނަރަޕް ސ.ފޭދޫ ބަލިކޮށްފި

އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތުގެ ފައިނަލް ބުރުގައި ގދ.ތިނަދޫއިން ފަހަތުން އަރައި އެންމެ ފަހުގެ ރަނަރަޕް ސ.ފޭދޫ ބަލިކޮށްފިއެވެ.

އާދީއްތަ ދުވަހު ހަވީރު ތިނަދޫގައި ކުޅުނު ގުރޫޕް 2 ގެ މިމެޗް ތިނަދޫއިން ކާމިޔާބުކުރީ 3-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ފޭދޫ ޓީމުގެ ފަރާތުން މޮޅު ކުޅުމެއް ފެނިގެން ގޮސްފައި ވާއިރު ފުރަތަމަ ލަނޑުޖަހާ އެޓީމުން ލީޑު ނަގާފައިވަނީ 30 ވަނަ މިނެޓުގައި އަހުމަދު ތޮލާލް ކާމިޔާބުކޮށްދިން ލަނޑުންނެވެ. މި ލަނޑަށް ފަހުގައި ދެޓީމަށްވެސް ވަނީ ރަނގަޅު ފުރުސަތުތަކެއް ލިބިގެން ގޮސްފައެވެ. ނަމަވެސް ފުރަތަމަ ހާފު ނިމިގެން ގޮސްފައިވަނީ 1-0 އިން ފޭދޫ ކުރީގައި އޮވެގެންނެވެ.

ދެވަނަ ހާފުގައި ތިނަދޫއިން ވަނީ ކުޅުން އިތުރަށް ވަރުގަދަކޮށް ހަމަލާތަށް އުފައްދަން ފަށާފައެވެ. އެގޮތުން އެޓީމުން ދިޔައީ ފުރުސަތުތަށް ތަނަވަސްކޮށް ފޭދޫގެ ހާފަށް ނުރަށްކާ ކުރަމުންނެވެ. ނަތީޖާއެއްގެ ގޮތުން އެޓީމުން ވަނީ 65 ވަނަ މިނެޓުގައި ނަތީޖާ ހަމަހަމަކޮށް ހިތްވަރު އާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހުސައިން އަބްދުލް ހަކީމެވެ. މި ލަނޑަށް ފަހުގައިވެސް އެޓީމުން ވަނީ ފުލުފުލު ގައި ހަމަލާތަކެއް އުފައްދާފައެވެ. އެގޮތުން އެޓީމުން ވަނީ މާ ގިނައިރުތަކެއް ނުވަނީސް އިތުރު ލަނޑެއްޖަހާ ފަހަތުން އަރައި ތިނަދޫ ކޮޅަށް ނަތީޖާ އަނބުރާލާފައެވެ. މި ލަނޑު 69 ވަނަ މިނެޓުގައި އެޓީމަށް ކާމިޔާބު ކޮށްދިނީ މެޗުގައި މޮޅު ކުޅުމެއް ދެއްކި އިބްރާހިމް ޝަފްރާދެވެ. އެޓީމުގެ 3 ވަނަ ލަނޑުވެސް ކާމިޔާބުކޮށްދިނީ ޝަފްރާދެވެ. އޭނާ މި ލަނޑު ކާމިޔާބުކޮށްދީ، ތިނަދޫއަށް ލީޑު ފުޅާކޮށްދިނީ 75 ވަނަ މިނެޓުގައެވެ.

މި މުބާރާތުގެ ފައިނަލް ބުރުގެ ގުރޫޕް 1 ގައި އާދީއްތަ ދުވަހު ހަވީރު ހދ.ކުޅުދުއްފުއްޓާއި އއ.މާޅޮސް ބައްދަލުކުރި މެޗް ނިމުނީ ދެޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.