ރައީސް އަބްދުﷲ ޔާމީންނަން ތާއިދުކުރައްވާ އެމަނިކުފާންގެ އަރިހުގައި މަސައްކަތް ކުރެއްވުމަކީ ކަނބުރު ގެއެއްގައި މަސައްކަތް ކުރުން ފަދަ ނުރައްކާ ކަމެއް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު ހުސެއިން އަރީފް ވިދާޅުވެއްޖެއެވެ.
އާދީއްތަ ދުވަހުގެރޭ މ. ކުނޫޒްގައި އޮތް ޖަލްސާގައި ވާހަކަ ދައްކަވަމުން އަރީފް ވިދާޅުވީ ރައީސް އަބްދުﷲ ޔާމީން އަރިހުގައި މަސައްކަތް ކުރައްވާ ބޭފުޅުން މާޒީގެ ތެރެއަށް ނަޒަރު ހިންގާލައި އެމަނިކުފާނު އަރިހުގައި މީގެ ކުރިން މަސައްކަތް ކުރެއްވި ބޭފުޅުންނަން ކަން ކުރެއްވި ގޮތް ހަދާންކުރަންޖެހޭ ކަމަށެވެ.
އަރީފް ވިދާޅުވީ ގުޅިފައިވާ ސިޔާސީ ޕާޓީތަކާ އެކު މަސައްކަތް ކުރުމަކީ ހުވަނދު ވިއްކާ ބަޔަކާ އެކު މަސައްކަތް ކުރުން ފަދަ ކަމެއް ކަމަށެވެ. އަދި ހުވަނދު ވިއްކާ ބަޔަކާ އެކު މަސައްކަތްކޮށްފި ނަމަ އެ މީހެއްގެ ގައިން ދުވާނީ ހުވަނދުގެ ވަސް ކަމަށް ވެސް އަރީފް ވިދާޅުވިއެވެ.
" ރައީސް ޔާމީން އަރިހުގައި މަސައްކަތް ކުރާ ބެފުޅުންނަން އަޅުގަނޑު މިދަންނަވަނީ، ތިޔަ ބެފުޅުންނަން ތިޔަ އުޅުއްވެނީ ކަނބުރު ގެއެއްގައޭ، ތިޔަ ބޭފުޅުން އިބްރަތް ހާސިލްކުރައްވާށޭ ރައީސް ޔާމީނާ އެކު ގާތްކޮށް އުޅުނު ބޭފުޅުންގެ ނިމުން އައިގޮތް. ތިޔަ ބޭފުޅުން އިބްރަތް ހާސިލްކުރައްވާ،" އަރީފް ވިދާޅުވިއެވެ.
އަރީފް ވިދާޅުވީ މިއަދު ދިވެހި ގައުމު ވެއްޓިފައިވާ އަނދަވަޅުން ސަލާމްކުރުމަށް ދިވެހި ރައްޔިތުން އަތުކުރި އޮޅާލައި އަނިޔާވެރިންގެ ކުރިމަތީގައި ފައިތިލަ ސާބިތުކޮށް، ބައެއްގެ ގޮތުގައި ނުކުންނަން ވެއްޖެ ކަމަށެވެ. އަދި ދިވެހި ރައްޔިތުންނަން މިކަން ނުކުރެވޭނެ އެއްވެސް ސަބަބެއް ނުފެންނަން ކަމަށް ވެސް އެނާ ވިދާޅުވިއެވެ.
މީގެ އިތުރުން އަރީފް ވިދާޅުވީ ރައީސް ޔާމީންގެ ސަރުކާރުން ކަންކުރާ ގޮތުން އެކަމުގެ ދަތި އުނދަގޫތައް ކުރިމަތި ވާނީ ރައްޔިތުންނަން ކަމަށެވެ. އެކަމުގެ ހެއްކެއްގެ ގޮތުގައި އަރީފް ވިދާޅުވީ ތަކެތީގެ އަގު އަތްނުފޯރާހާ ބޮޑަށް އުފުލިއްޖެ ކަމާއި ރައްޔިތުންނާ ގުޅުން ހުރި ހުރިހާ ޙިދުމަތްތަކެއްގެ އަގު ވެސް ބޮޑުވެއްޖެ ކަމަށެވެ.