ފަލަސްތީނުގެ 16 އަހަރުގެ ކުއްޖެއްގެ ގަޔަށް އިޒްރޭލު ސިފައިން އެތައް ވަޒަނެއް ޖަހާ ޝަހީދު ކޮށްލައިފި
ޣައްޒާއަށް ބޮން އަޅާ ބުދަ ދުވަހުގެ މަދުވެގެން 18 ފަލަސްތީނު މީހުން ވަނީ ޝަހީދު ކޮށްލާފައެވެ.
އިޒްރޭލުން ބަޑިޖަހައި މަރާލި، ލުޖެއިން މުސްލިހްގެ ހަށިގަނޑު ގެންދަނީ
އިޒްރޭލު ސިފައިން ފަރްއާ ރެފިއުޖީ ކޭމްޕުގައި 16 އަހަރުގެ ފަލަސްތީނު ކުއްޖެއްގެ ގަޔަށް ބަޑިޖަހައި ޝަހީދުކޮށްލައިފިއެވެ.
ވަފާ ނިއުސް އޭޖެންސީން ރިޕޯޓުކުރި ގޮތުގައި ޔަހޫދީ އިޒްރޭލް ސިފައިން ވަނީ އެ ކުއްޖާ ގަޔަށް އެތައް ވަޒަނެއް ޖަހައި، ފުރައްސާރަކޮށް، އަދި އެކުއްޖާ އާ ހަމަ އަށް އެމްބިއުލާންސް ވެސް އަޔަނުދީ ހުރަސްއަޅާފައެވެ.
އަނެއްކޮޅުން އިޒްރޭލުން ގެންދަނީ ޣައްޒާއަށް ބޮން އަޅަމުންނެވެ. އިޒްރޭލުގެ ހަމަލާތަކުގައި ޣައްޒާ ގައި ބުދަ ދުވަހުގެ މަދުވެގެން 18 ފަލަސްތީނު މީހުން ވަނީ ޝަހީދުވެފައެވެ.
ހަމާސްއިން ބުނާ ގޮތުގައި އިޒްރޭލުގެ ބޮޑުވަޒީރު ނެތަންޔާހޫ ގެންދަވަނީ ޣައްޒާ އާއި މިސްރުގެ ބޯޑަރުގައި އޮންނަ "ފިލަޑެލްފި ކޮރިޑޯ" ގައި އިޒްރޭލް ސިފައިން އަބަދަށް ދެމި ތިބޭ ގޮތައް ހަދާ، ހަނގުރާމަ އަށް ނިމުމެއް ގެނައުމަށް ހުރަސް އަޅުއްވަމުންނެވެ.
އިރުމަތީ ޖެނިން ގައި އިޒްރޭލް ސިފައިން ބަޑި ޖައްސާ ބިރު ދައްކައިގެން 4000 ށް ވުރެ ގިނަ ފަލަސްތީން މީހުން އެމީހުންގެ ގެދޮރުން ނުކުމެގެން ދިއުމަށް ވަނީ މަޖްބޫރު ކޮށްފައެވެ.
އދ. އިން ބުނާ ގޮތުގައި ހުޅަނގު އައްސޭރި އަށް އަރާ އިޒްރޭލް ސިފައިން ގެންދަނީ އާންމުންނާ ދެކޮޅަށް ހަނގުރާމަ މަތީ ގައި ކަންކުރާ ފަދައިން ކަން ކުރަމުންނެވެ.
އިޒްރޭލުން ޣައްޒާ ގައި ކުރަމުންދާ ހަނގުރާމައިގައި މިހާތަނަށް މަދުވެގެން 40،861 ފަލަސްތީން މީހުން ވަނީ ޝަހީދުވެފައެވެ. އަދި 94،398 މީހުން ވަނީ ޒަޚަމްވެފައެވެ. ކޮންމެ ދުވަހަކު އެތައް ފަލަސްތީން މީހުން އިޒްރޭލުގެ ހަމަލާތަކުގައި ޝަހީދުވަމުން ދާއިރު ހަނގުރާމަ އަށް އަވަސް ނިމުމެއް އަތުވެދާނެ ކަމުގެ އެއްވެސް ނިޝާނެއް ފެންނާކަށް ނެތެވެ.
