ރިޔާސީ އިންތިހާބުގައި ރައީސް ޔާމިން ބައިވެރިވެވަޑައިގަންނަވާނެ ކަމަށް ޤަބޫލެއް ނުކުރަން: ރިޔާޒް
14 އޯގަސްޓު 2017 | ހޯމަ 18:55މިމަސައްކަތް ހުއްޓާލާނީ ކާމިޔާބުކޮށްފައި
ކިނބިދޫ ދާއިރާގެ މެމްބަރު އަބްދުﷲ ރިޔާޒް
ރައީސް ޔާމިންއަށް ރާއްޖޭގެ އެއްވެސް ހިސާބަކުން ރީތި މަންޒަރެއް ނުފެންނަ ކަމަށާއި އެހެންކަމުން 2018 ގެ ރިޔާސީ އިންތިހާބުގައި އެމަނިކުފާނު ބައިވެރިވެ ވަޑައިގަންނަވާނެ ކަމަށް ޤަބޫލު ނުކުރެއްވޭ ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ޖުމްހޫރީ ޕާޓީގެ ޑެޕިއުޓީ ލީޑަރުކަން ވެސް ކުރައްވާ ރިޔާޒް ވިދާޅުވީ ރިޔާސީ އިންތިހާބުގައި ވާދަކުރައްވާ ކެނޑިޑޭޓަކީ ރައްޔިތުންގެ ރުހުމާއި ލޯބި ލިބިވަޑައިގެންފައިވާ ބޭފުޅަކަށް ވާންޖެހޭނެ ކަމަށާއި އެހެން ނަމަވެސް ރައީސް ޔާމިންއަށް ލިބިވަޑައިގެންފައި ވަނީ ރައްޔިތުންގެ ނަފްރަތު ކަމަށެވެ.
ރައްޔިތުންގެ ލޯބި އެމަނިކުފާނަށް ލިބިވަޑައިނުގަންނަވާ އެންމެ ބޮޑު އެއް ސަބަބަކީ އިޙްލާސްތެރިކަމެއް ނެތުން ކަމަށާއި އެންމެ ކައިރީގައި ތިބި މީހުންނަށް ވެސް "ލަގާއެއް " ދެއްވަފާނެ ކަމަށް އެމީހުން ވެސް ޤަބޫލު ކުރާ ކަމަށް ރިޔާޒް ވިދާޅުވިއެވެ.
އެންމެ ގިނަ މެމްބަރުން ޕްރޮސެކިއުޓް ކުރައްވާ ރައީސްގެ ގޮތުގައި އެމަނިކުފާނަށް ކޮންމެވެސް މުއައްސަސާއަކުން އެވޯޑެއް ލިބިވަޑައިގަންނަވާނެ ކަމާއި މެދު ޔަޤީން ކުރައްވާ ކަމަށް ވިދާޅުވިއެވެ. އަދި ދައުލަތުގެ ޓެކްސް އިދާރާ މީރާއިން ވެސް ޖުމްހޫރީ ޕާޓީގެ ލީޑަރު ޤާސިމް އިބްރާހިމް އަށް ކުރަނީ ސިޔާސީ ދައުވާތަކެއް ކަމަށް ވިދާޅުވިއެވެ.
ޤާނޫނު އަސާސީގައި މައްސަލައެއް އުޅެނީ ބާއޭ ސުވާލު ކުރައްވައި ކުރީގެ ޕޮލިސް ކޮމިޝަނަރުގެ މަޤާމު ވެސް އަދާކުރެއްވި ރިޔާޒް ވިދާޅުވީ ވެރިކަމަށް ވަޑައިގަންނަވާ ރައީސުންނަށް ފުލުހުންގެ މުއައްސަސާ މިނިވަން ކަމާއި އެކު ބޭއްވުމަށް ފަހު، ވެރިކަން ކުރައްވަން އުނދަގޫފުޅު ވަނީ ބާއޭ ހިތަށް އަރާވަޑައިގަންނަވާ ކަމަށެވެ.
އަދި ރައީސް ވިދާޅުވާ ހަމަ ކޮންމެ މައްސަލައެއް ފުލުހުން ބަލަން ޖެހޭނެ ބާއޭ ހިތަށް އަރާވަޑައިގަންނަވާ ކަމަށާއި ފުލުހުން ތަހްޤީޤް ކޮށް ފޮނުވާ ކޮންމެ މައްސަލަ އެއްވެސް ދައުވާ ކުރަން ޕީޖީ ޖެހިވަޑައިގަންނަވާ ބާއޭ ހިތަށް އަރާވަޑައިގެންފި ކަމަށް ވިދާޅުވިއެވެ.
މިސަރުކާރުގެ ކޮންމެ ދިމާލަކުން ވެސް ފެންނަނީ ކޮރަޕްޝަން ކަމަށާއި މިހާރު ފެންނަމުންދާ މަންޒަރުތަކުން އެންމެ ބޮޑު ކޮރަޕްޝަން ހިނގަމުންދާ ކަމުގެ ވާހަކަ އަޑު އިވެނީ އެމްއާރްޑީސީން ކަމަށްވާ އިރު އޭސީސީން މިކަން ބެލުމަށް ރިޔާޒް ގޮވާލެއްވިއެވެ.
