އޭސީ މިލާާންގެ ފުރިހަމަ އިތުބާރު ފޮންސެކާ އަށް އެބަ އޮތް

އިޓާލިއަން ލީގުގެ އޭސީ މިލާނަށް އިރުޝާދު ދެމުން އަންނަ ޕައުލޯ ފޮންސެކާ އަށް ކުލަބުގެ ފުރިހަމަ އިތުބާރު އޮތް ކަމަށް، އޭސީ މިލާންގެ ސީއީއޯ ޖޯޖިއޯ ފުލްރާނީ ވިދާޅުވެއްޖެ އެވެ.

އޭސީ މިލާންގެ ކޯޗުކަމުގެ މަޤާމަށް ފޮންސެކާ ހަމަޖެއްސީ މިއަހަރުގެ ޖުލައި މަހުގެ ތެރޭގަ އެވެ. އޭސީ މިލާނާ އެކު ފޮންސެކާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.

ފޮންސެކާގެ އިރުޝާދުގެ ދަށުން އައު ސީޒަންގެ އިޓާލިއަން ލީގުގައި މިހާތަނަށް އޭސީ މިލާން ވަނީ ތިން މެޗު ކުޅެފަ އެވެ. އޭގެ ތެރެއިން ދެ މެޗު އެއްވަރުވެފައިވާއިރު، އަނެއް މެޗުން ވަނީ ބަލިވެފަ އެވެ. ތިން މެޗުން މިހާތަނަށް ލިބުނު ދެ ޕޮއިންޓާއެކު މިލާން އޮތީ ވެސް 14 ވަނައިގަ އެވެ. އެކަމާ ގުޅިގެން ސީޒަންގެ ކުރީކޮޅު ފޮންސެކާ އަށް ޕްރެޝަރު ބޮޑުވަމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ.

އެންކަމާ ގުޅޭ ގޮތުން ވާހަކަ ދައްކަވަމުން އޭސީ މިލާންގެ ސީއީއޯ ފުލްރާނީ ވިދާޅުވީ، ކުލަބުގެ ކޯޗު ފޮންސެކާ އާއި ކުލަބުގެ ސްކޮޑާ މެދު ހިތްހަމަ ޖެހޭ ކަމަށެވެ. ފޮންސެކާ އާއި މިލާންގެ ސްކޮޑަށް ކުލަބުގެ ވެރިން އަދި މުޅި ކުލަބުގެ ސަޕޯޓު އަދި ހިތްވަރު އޮންނާނެ ކަމަށް ވެސް އޭނާ ވަނީ ވިދާޅުވެފަ އެވެ.

މީގެ އިތުރުން އޭނާ ވިދާޅުވީ، މިލާނާ ހަވާލުވެ ޕްރީ ސީޒަންގައި ފޮންސެކާ ކޮށްފައިވާ މަސައްްކަތާއި، ނަތީޖާއާ މެދު ހިތްހަމަ ޖެހޭ ކަމުގައި ވެސް ފުލްރާނީ ވިދާޅުވި އެވެ. ސީޒަންގެ މިހާތަނަށް އައިއިރު ތިން މެޗު ކުޅެފައިވާއިރު، ނުވަ ޕޮއިންޓު ކޮންމެހެން ވެސް ބޭނުންވެފައި ތިބި ކަމަށާއި، އެކަން ޙާސިލު ނުވުމުން "ޕެނިކެއް" ވެސް ނެތް ކަމަށް ފުލްރާނީ ވަނީ ވިދާޅުވެފަ އެވެ.

އިޓާލިއަން ލީގުގައި ދެން އޭސީ މިލާން ނިކުންނާނީ ސެޕްޓެމްބަރު މަހުގެ 14 ވަނަ ދުވަހު ވެނެޒިއާއާ ދެކޮޅަށެވެ.