މުދަލު ޒަކާތް ބަހަން ފެށޭނެ ދުވަހެއް ބުނަން އަދިވެސް ނޭނގޭ: އިސްލާމިކް މިނިސްޓްރީ
ފަގީރުންނާއި މިސްކީނުންގެ ދަފްތަރު ރިވިއު ކުރުމުގެ މަސައްކަތް ދަނީ ކުރަމުން
ގޮވާމުގެ ބާވަތްތަކުން ފިތުރު ޒަކާތް ބަލައިގަންނަނީ - ފައިލް ފޮޓޯ
މުދަލު ޒަކާތް ބަހަން ފެށޭނެ ދުވަހެއް ބުނަން އަދިވެސް ނޭނގޭ ކަމަށް އިސްލާމިކް މިނިސްޓްރީން ބުނެފިއެވެ.
މުދަލު ޒަކާތް ކޮންމެ އަހަރެއްގެ އަޟްހާ އީދުގެ ކުރިން ދޫކުރެއެވެ. ހިޖްރީ އައު އަހަރު ފެށުމުގެ ކުރިން މުދަލުގެ ޒަކާތް ދިނުމަށް އިސްލާމިކް މިނިސްޓްރީން ކަނޑައަޅާފައިވީ ނަމަވެސް މިސަރުކާރާއެކު މުދަލު ޒަކާތް ދޫކުރުން ލަސްވާތީ ބައެއް އާއްމު ރައްޔިތުން ދަނީ ކަންބޮޑުވުންފާޅު ކުރަމުންނެވެ.
މިމައްސަލައާ ގުޅޭގޮތުން ފަށާއިރު ޕްރޮގްރާމަށް އިސްލާމިކް މިނިސްޓްރީގެ އޮފިޝަލެއް ވިދާޅުވީ ފަގީރުންނާއި މިސްކީނުންގެ ދަފްތަރު ރިވިއު ކުރުމުގެ މަސައްކަތް ކުރަމުންދާ ކަމަށާއި، އެމަސައްކަތް ގާތްގަނޑަކަށް ނިމިފައިވާ ކަމަށެވެ.
އޮފިޝަލް ވިދާޅުވީ ދަފްތަރު ރިވިއު ކުރުމަށްފަހު، ފޯމްތައް ރެމްޑަމްކޮށް ވަކިވަކިން ޗެކް ކުރާނެ ކަމަށާއި، ފަގީރުންނާ މިސްކީނުންގެ ދަފްތަރުގައި މީހުން ރަޖިސްޓްރީ ކޮށްފައިވަނީ ހެދިފައި އޮތް އުސޫލުގެ ތެރެއިންތޯ ކަށަވަރު ކުރާނެ ކަމަށެވެ. އޮފިޝަލް ވިދާޅުވީ ކޮމެޓީން މިމަސައްކަތް ކުރާއިރު، ވަގުތު ނަގާނެ ކަމަށާއި، އެއީ ގާތްގަނޑަކަށް 6000 މީހުންގެ ފޯމް ކަމަށެވެ. އަދި ވިދާޅުވީ މުދަލު ޒަކާތް ބަހަން ފެށޭނެ ދުވަހެއް ބުނަން ދަތި ކަމަށާއި، އުންމީދު ކުރަނީ އަވަހަށް ފައިސާ ދޫކުރެވޭނެ ކަމަށެވެ.
މުދަލުގެ ޒަކާތް ސަރުކާރަށް ދައްކަނީ ނިސްބަތުން މަދު ބައެއްކަން ފާހަގަކުރެވިގެން މުދަލުގެ ޒަކާތް ވާޖިބުވާ ހުރިހާ ފަރާތްތަކުން ވެސް މުދަަލުގެ ޒަކާތް ދެއްކުމަށް މީގެ ކުރިން އިސްލާމިކް މިނިސްޓްރީން އިލްތިމާސް ކޮށްފައިވެއެވެ.
މުދަލު ޒަކާތަކީ އިސްލާމްދީނުގެ ރުކުނެކެވެ. އެގޮތުން އެ މީހެއްގެ މިލްކިއްޔާތުގައި ނިސާބުހަމަވާ މިންވަރަށް ފައިސާ ހުރެ، އެ ފައިސާ ހުންނަތާ ހިޖްރީ 01 އަހަރުވުމުން ޝަރްއީ ހަމަތަކާ އެއްގޮތަށް އޭގެ ސާޅީސްބައި ކުޅަ އެއްބައި 2.5 ނެރުމަށް މިނިސްޓްރީން ވަނީ ނަސޭހަތްތެރިވެފައެވެ.
