ދުސްތޫރީ ހަޔާތުގައި މިއަދަކީ ކަޅު ދުވަހެއް: ކުރީގެ އުއްތަމަ ފަނޑިޔާރު
22 މެއި 2017 | ހޯމަ 22:08ކުރީގެ އުއްތަމަ ފަނޑިޔާރު، ފޭސްބުކް ޕޯސްޓްގައި އިތުރު އެއްޗެއް ވިދާޅުވެފައެއް ނުވޭ
ކުރީގެ އުއްތަމަ ފަނޑިޔާރު އަހުމަދު ފާއިޒް ހުސެއިން
ދުސްތޫރީ ހަޔާތުގައި މިއަދަކީ ކަޅު ދުވަހެއްގެ ގޮތުގައި ކުރީގެ އުއްތަމަ ފަނޑިޔާރު އަހުމަދު ފާއިޒް ހުސެއިން ސިފަކުރައްވައިފި އެވެ.
ރައްޔިތުންގެ މަޖިލީހަށް ހުށަހެޅޭ އިތުބާރު ނެތްކަމުގެ މައްސަލަތަކުގައި ފަހު ބަސް ބުނާނީ ސުޕްރީމް ކޯޓުންކަމަށް ހޯމަ ދުވަހު އެ ކޯޓުން ކަނޑައެޅުއްވާފައިވާއިރު، ކުރީގެ އުއްތަމަ ފަނޑިޔާރު އަހުމަދު ފާއިޒް ހުސެއިން ކުރައްވާފައިވާ ފޭސްބުކް ޕޯސްޓެއްގައި ވިދާޅުވެފައިވަނީ މިއަދަކީ އަނެއްކާވެސް ދުސްތޫރީ ހަޔާތުގައި ކަޅު ދުވަހެއް ކަމަށެވެ. އިތުރަށް އެމަނިކުފާނު އެއްވެސް އެއްޗެއް ވިދާޅުވެފައެއް ނުވެއެވެ.
ތިން ބާރު ވަކިވެފައިވާ ވެރިކަމުގެ ނިޒާމެއް ރާއްޖޭގައި އޮންނައިރު، ޤާނޫނު އަސާސީގައި ބުނެފައިވާގޮތުން ވަޒީރުންގެ އިތުބާރު ނެތްކަމަށް ފާސްކުރުމަކީ ރައްޔިތުންގެ މަޖިލީހަށް ލިބިގެންވާ ބާރެކެވެ. އަދި 10 މެމްބަރަކު ސޮއިކޮށް ވަޒީރެއްގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅޭނެކަމަށް ޤާނޫނު އަސާސީގައި ބުނެފައިވެއެވެ. އަދި ރައްޔިތުންގެ މަޖިލީހުގެ މުޅި ތަޅުމުން ފާސްކޮށްފިނަމަ އެ މީހެއްގެ މަޤާމުވެސް ގެއްލިގެންދާނެކަމަށް ޤާނޫނު އަސާސީގައި ބުނެފައިވެއެވެ.
ޤާނޫނު އަސާސީގައި އެގޮތަށް ބަޔާންކޮށްފައިވީނަމަވެސް ސުޕްރީމް ކޯޓުގެ ފުލް ބެންޗުގެ އިއްތިފާގުން ކުރި ހުކުމުގައި ނިންމާފައިވަނީ އެކަށީގެންވާ ސަބަބެއް ނެތި، ސިޔާސީ ގޮތުން އިތުބާރު ނެތްކަމުގެ ވޯޓު ނުނެގޭނެ ކަމަށާއި އިތުބާރު ނެތްކަމުގެ ވޯޓުތަކަކީ އެކަށީގެންވާ ސަބަބުތަކަކަށް ބިނާވެފައިވާ އިމްޕީޗްމެންޓަކަށް ވާންޖެހޭނެ ކަމަށެވެ. އަދި އެގޮތަށް މަޖިލީހުން ފާސް ކުރިޔަސް އެކަމުގައި ފަހުގެ ނިންމުން ނިންމާނީ ސުޕްރީމް ކޯޓުން ކަމަށް ހުކުމުގައި ކަނޑައަޅާފައިވެ އެވެ. އެ ހުކުމުގައި ކަނޑައެޅި އެ އުސޫލުތަކަށް މަޖިލީހުން ތަަބާވާން ޖެހޭނެ ކަމަށް ހުކުމުގައި ވެ އެވެ.
ސުޕްރީމް ކޯޓުގެ އެ ހުކުމާއެކު ގިނަ ބައެއްގެ ފާޑުކިޔުންތަކެއް އަންނަނީ އަމާޒުވަމުންނެވެ.
