މުޞްޙަފް މާލްދީފް ބަހަން ފަށައިފި
14 މާރިޗު 2017 | އަންގާރަ 22:17ޢުމުރުން 15 އަހަރާ 45 އަހަރުގެ ކޮންމެ ރައްޔިތަކަށް މުޞްޙަފެއް ފޯރުކޮށްދެވޭނެ
މުޞްޙަފް މާލްދީފް ބަހަން ފެށުމުގެ ރަސްމިއްޔާތުގެ ތެރެއިން
ސަރުކާރާއި ސަރުކާރު ހިއްސާވާ ކުންފުނިތަކުގެ މުވައްޒަފުންނަށް "މުޞްޙަފް މާލްދީފް" ބަހަށް ފަށައިފި އެވެ.
ކުންފުނިތަކުގެ މުވައްޒަފުންނަށް މުޞްޙަފް ބަހަން ފެށީ އެކަމަށްޓަކައި އަންގާރަ ދުވަހު މިނިސްޓްރީ އޮފް އިސްލާމިކް އެފެއާޒްގައި ބޭއްވި ރަސްމިއްޔާތެއްގައެވެ.
ސަރުކާރުގެ ގިނަ ކުންފުނިތަކެއްގެ މެނޭޖިންގ ޑިރެކްޓަރުންނާ އެހެނިހެން ބައެއް އިސްވެރިން ބައިވެރިވެވަޑައިގެންނެވި މި ރަސްމިއްޔާތުގައި މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒިޔާދު ވިދާޅުވީ، "މުޞްޙަފް މާލްދީފް" މަޝްރޫޢު ޙަޤީޤަތަކަށް ވެގެންދިއުމުގައި ސަރުކާރުގެ ވަރަށް ގިނަ ކުންފުނިތަކުގެ ވަރަށް ބޮޑު ޙިއްޞާއެއް އެބައޮތްކަމަށް ޤަބޫލުފުޅު ކުރައްވާ ކަމަށެވެ.
އެގޮތުން މި މަޝްރޫއަކީ ވަރަށް ބޮޑު ހޭދައެއް ކޮށްގެން ކުރިއަށް ގެންދާ މަޝްރޫއަކަށްވެފައި، މިކަން ކުރިއަށް ގެންދިއުމަށްޓަކައި ވަރަށް ގިނަ ކުންފުނިތަކުން އެހީތެރިކަން ފޯރުކޮށްދެއްވާފައިވާކަމަށް ވިދާޅުވިއެވެ.
"މުޞްޙަފް މާލްދީފް" މަޝްރޫޢުގެ ދަށުން މިހާތަނަށް އެއްލައްކަ މުޞްޙަފް ޗާޕް ކޮށްގެން ރާއްޖެ ގެނެވިފައިވާ ކަމަށާއި، މުޞްޙަފްތައް ޗާޕް ކުރުމުގެ ދެވަނަ ބުރު ކައިރި މުސްތަޤްބަލެއްގައި ފެށިގެންދާނެކަމަށް އިސްލާމިކް މިނިސްޓަރ ވިދާޅުވި އެވެ.
"މުޞްޙަފް މާލްދީފް" މަޝްރޫޢު ގެ ދަށުން ފުރަތަމަ ގެނެވުނު އެއްލައްކަ މުޞްޙަފް ބެހުމަށް ހަމަޖެހިފައިވަނީ ޢުމުރުން 15 އަހަރާ 45 އަހަރާ ދެމެދުގެ ކޮންމެ ދިވެހި ރައްޔިތަކަށް މުޞްޙަފެއް ފޯރުކޮށްދެވޭ ގޮތަށެވެ.
އަދި މާލޭ ސަރަޙައްދާއި އަތޮޅުތެރޭގައި ދިރިއުޅޭ އެ ޢުމުރުފުރާގެ ކޮންމެ ދިވެހި ރައްޔިތަކަށް މިނިސްޓްރީން ހަމަޖައްސާ އުޞޫލުތަކުގެ ދަށުން މުޞްޙަފް ފޯރުކޮށްދެވޭނެ ކަމަށް މިނިސްޓްރީން ބުންޏެވެ.
"މުޞްޙަފް މާލްދީފް" މަޝްރޫޢަކީ، ކޮންމެ ދިވެއްސަކަށް މުޞްޙަފެއް މި ޝިޢާރުގެ ދަށުން ދިވެހިންނަށް ޚާއްޞަ މުޞްޙަފެއް ޗާޕުކުރުމަށްޓަކައި ސަރުކާރުން ކުރިއަށްގެންދާ މަޝްރޫޢެކެވެ.
ސަރުކާރުގެ އަމާޒަކީ، 2018 ވަނަ އަހަރު ނިމުމުގެ ކުރިން މި މަޝްރޫޢުގެ ދަށުން ކޮންމެ ދިވެއްސަކަށް މުޞްޙަފެއް ފޯރިކޮށްދިނުމެވެ.
