ނޫސްވެރިޔާ ކުރި ސުވާލާއި ގުޅޭ ގޮތުން ޖަވާބެއް ނުދެއްވާ ޕްރެސް ފެށުމުގެ ކުރިން ދެއްކި ވާހަކަވެސް އޮޅުވާލެއްވި
އިކޮނަމިކް މިނިސްޓަރު ސައީދު ނޫސްވެރިންގެ ބައްދަލުވުމަކަށްފަހު ނޫސްވެރިޔާ ޝައިހާން (ކ) އާއި ވާހަކަދައްކަވަނީ
ބޭސްފަރުވާއަށް ސިންގަޕޫރަށް ވަޑައިގެން ޝޮޕިންގ މޯލްއެއްގައި ވިޔަފާރި ކުރައްވަނިކޮށް، ރައީސް ޑރ. މުހައްމަދު މުއިއްޒުގެ ފޮޓޯފުޅެއް ނެގި މީހާގެ ފޯނު ހިފެހެއްޓި މައްސަލައިގައި ކުރި ސުވާލަށް މިނިސްޓަރު ސައީދު ހުރަސް އަޅުއްވައިފިއެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ނޫސްވެރިންނަށް ފުރުސަތު ދީފައިވަނީ ކެބިނެޓުގެ ނިންމެވުމާއި ގުޅޭ ސުވާލުގެ އިތުރުން ނޫސްވެރިން ބޭނުންވާ އެހެންކަމަކާއި ގުޅޭ އެއް ސުވާލެއް ކުރެވޭ ގޮތަށެވެ. އެގޮތުގެ މަތިން ރާއްޖެޓީވީގެ ނޫސްވެރިޔާ ޝައިހާން ޒަރީރު ސުވާލުކޮށްފައިވަނީ، ރައީސުލްޖުމްހޫރިއްޔާ ސިންގަޕޫރަށް ކުރެއްވި ދަތުރުފުޅުގައި ޝޮޕިންގ މޯލްއެއްގައި ވިޔަފާރިކުރައްވަނިކޮށް ނަގާފައިވާ ފޮޓޯއަކާއި ގުޅިގެން މީހެއްގެ ފޯނު ހިފެހެއްޓި މައްސަލާގަ އެވެ.
ޝައިހާންގެ ސުވާލަށް ޖަވާބު ދެއްވުމުގެ ބަދަލުގައި އިކޮނަމިކް މިނިސްޓަރު ވަނީ މައުޟޫޢު ބަދަލުކުރައްވާ މިއަދުގެ ނޫސްވެރިންގެ ބައްދަލުވުމަކީ ކެބިނެޓުގެ ނިންމެވުމަކާއި ގުޅިގެން ބާއްވާ ނޫސްވެރިންގެ ބައްދަލުވުމެއް ކަމަށް ވިދާޅުވެފައެވެ.
މިނިސްޓަރު ސައީދުގެ މި ވާހަކަ އާއި ގުޅިގެން ދެން ސުވާލުކުރަން އެރި ނޫސްވެރިޔާ ވަނީ މިނިސްޓަރު ސައީދު އެކަން އޮޅުވާލައްވާފައިވާ ކަމަށް ބުނެފައެވެ. އެގޮތުން ކެބިނެޓާއި ގުޅިގެން ކިތައްމެ ސުވާލެއް ކުރެއްވިޔަސް އެންމެ ރަނގަޅުކަމަށާއި، އެހެންކަންތަކާއި ގުޅިގެން 1 ސުވާލު ކުރައްވަން ވިދާޅުވި ކަމަށެވެ.
ނަމަވެސް ރައީސްގެ ފޮޓޯ ނެގި މީހާގެ ފޯނު ހިފެހެއްޓި މައްސަލައާއި ގުޅޭ އެއްވެސް ސުވާލަކަށް މިނިސްޓަރު ޖަވާބެއް ނުދެއްވާ މުޅި ސުވާލު އޮޅުވާލެއްވިއެވެ.
