އިޒްރޭލު ސިފައިންނާ ކުރިމަތި ލުމަށް ހަމާސްގެ ހަރަކާތްތައް ހުޅަނގު އައްސޭރީގައި ފުޅާ ކުރަނީ

ފަލަސްތީނުގެ ދިފާއު ގައި މަސައްކަތް ކުރާ ހަމާސްގެ އިސް އޮފިޝަލެއް ބުނެފައިވަނީ އިޒްރޭލުން މިހާރު ހިންގަމުންދާ ޖަރީމާތަކާ ގުޅިގެން، ހިފާފައިވާ ހުޅަނގު އައްސޭރީގައި ތިބި ހަމާސްގެ ހަނގުރާމަވެރިން އިޒްރޭލް ސިފައިންނާ ދެކޮޅަށް ހިންގާ ހަރަކާތްތައް ފުޅާކޮށް އިތުރުކުރާނެ ކަމަށެވެ.

ހަމާސްގެ ހަރަކާތްތަކާ ކޮންޓްރޯލް މައިގަނޑު ގޮތެއްގައި އޮންނަނީ ޣައްޒާ ސްޓްރިޕް ގައި ކަމަށް ވިޔަސް އެ ޖަމާއަތުގެ ޕޮލިޓިކަލް ބިއުރޯގެ މެންބަރެއް ކަމުގައިވާ ހުސާމް ބަދްރާން، ބުރާސްފަތި ދުވަހު އަލް-މަޔާދީން ޓީވީ ނެޓްވޯކަށް ދިން ބަސްދީގަތުމެއްގައި ބުނެފައިވަނީ ހުޅަނގު އައްސޭރީގައި ޔަހޫދީ ސިފައިންގެ ހަރަކާތްތައް އިތުރުވެފައިވުމާއެކު ހަމާސްގެ އަސްކަރީ ހަރަކާތްތައް އެ ސަރަހައްދަށް ފުޅާކުރަން ނިންމާފައިވާ ކަމަށެވެ.

ހުޅަނގު އައްސޭރީގައި އިޒްރޭލުގެ ހަމަލާތައް އިތުރުވެފައިވާ ދަނޑިވަޅެއްގައި، ހަމާސްގެ އޮފިޝަލް ބުނެފައިވަނީ ހިފާފައިވާ ބިންތަކުގައި ހަރަކާތްތެރިވާ ދިފާއީ ގްރޫޕްތަކުގެ ސަބަބުން އިޒްރޭލަށް ކަންބޮޑުވުން އިތުރުވެފައިވާ ކަމަށާއި، އެ ގްރޫޕްތަކުގެ ބާރު ކުރިއަށްވުރެ ގަދަވެ، އިޒްރޭލާ ދެކޮޅަށް އެ ގްރޫޕްތަކުން ހިންގާ ހަރަކާތްތައްވެސް އިތުރުވެފައިވާ ކަމަށެވެ.

ހުރިހާ ގްރޫޕް ތަކެއް ގުޅިގެން ހުޅަނގު އައްސޭރީގައި އިޒްރޭލާ ދެކޮޅަށް ހަރަކާތްތެރިވުމަކީ މުޅި ފަލަސްތީންގެ މަސްލަހަތު އޮތް ގައުމީ އެއްބައިވަންތަ ކަމުގެ ހަރަކާތެއްގެ ގޮތުގައި އޭނާ ވަނީ ސިފަ ކުރައްވާފައެވެ.

ބަރްދާން ބުނެފައިވަނީ ހުޅަނގު އައްސޭރީގައި ހަރަކާތްތެރިވާ ފަލަސްތީނުގެ ދިފާއީ ގްރޫޕްތައް ނައްތާލުމަށް އިޒްރޭލުން ކުރާ މަސައްކަތް ކާމިޔާބު ނުވާނެ ކަމަށެވެ. އިޒްރޭލުން ރާވާ ރޭވުންތަކަކީ މުހިންމު ކަމެއް ނޫން ކަމަށް ބުނަމުން އޭނާ ބުނީ، ކުރީގެ ރޭވުންތައް ފެއިލްވި ފަދައިން މި ރޭވުންތައްވެސް ފެއިލްވާނެ ކަމަށެވެ. ދިފާއީ ޖަމާއަތްތަކުގެ ގިނަ ހަނގުރާމަވެރިންނަކީ ޒުވާނުން ކަމަށްވެސް އޭނާ ބުންޏެވެ.

ބަދުރާން ބުނިގޮތުގައި އޮކްޓޯބަރު 7 ގެ އަލް-އަޤްޞާ ސްޓޯމް އޮޕަރޭޝަނުން ދުނިޔެއަށް ދައްކުވައިދިނީ އިޒްރޭލުގެ މަޤްޞަދަކީ ފަލަސްޠީނުގެ ރޫހް ނައްތާލުން ކަމާއި، އަލް-އަޤްޞާ މިސްކިތާއި، އަލް-ޤުދުސްއާއި ހުޅަނގު އައްސޭރިއަށް ކުރިމަތިވެފައިވަނީ މިހާތަނަށް ކުރިމަތިވި "އެންމެ ބޮޑު ނުރައްކާ" ކަމަށާއި، އަދި މިއީ ޣައްޒާ ސްޓްރިޕަށް ކުރިމަތިވެފައިވާ ނުރައްކަލަށްވުރެވެސް ބޮޑު ނުރައްކަލެއް ކަން އޭނާ ފާހަގަ ކުރިއެވެ.

އޭނާ ބުނީ އިޒްރޭލާ ކުރިމަތިލާ ދިފާއީ ފަރާތްތަކުގެ "ސާފު ޕްލޭނެއް" އޮތް ކަމަށާއި، އެއީ ޣައްޒާގައި ވިޔަސް، ހުޅަނގު އައްސޭރީގައި ކަމަށް ވިޔަސް ނުވަތަ 1948 ގައި ހިފާފައިވާ ސަރަޙައްދުތަކުގައި ވިޔަސް ހަނގުރާމަވެރިންގެ ހަރަކާތްތައް ކުރިއަށް ގެންދާނެ ކަމަށެވެ.