ޔޫރަޕުގެ އެންމެ ގިނަ ލަނޑު ޖަހާ ކުޅުންތެރިޔާ އަށް ދެމުން އަންނަ ރަން ބޫޓު، ބަޔާން މިއުނިކަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އަށް ލިބިއްޖެ އެވެ.

މިއީ އުމުރުން 31 އަހަރުގެ ކޭން އަށް ޔޫރަޕުގެ ރަން ބޫޓު ލިބުނު ފުރަތަމަ ފަހަރެވެ. ބަޔާންގެ އަލިއާންޒް އެރީނާގައި އޮތް ޚާއްސަ ރަސްމިއްޔާތެއްގައި ބުދަ ދުވަހު ވަނީ ކޭން އަށް ރަން ބޫޓު ހަވާލު ކޮށްފަ އެވެ.

ޓޮޓެންހަމުން ސީނިއާ ކެރިއަރު ފެށި ކޭން، އެ ކުލަބު ދޫކޮށް ބަޔާނަށް ބަދަލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. ބަޔާންގައި ހޭދަ ކުރި ފުރަތަމަ ސީޒަންގައި ވެސް ކޭން ވަނީ އެ ކުލަބުގައި މޮޅު ކުޅުމެއް ދައްކައި، ގިނަ ލަނޑުތަކެއް ޖަހައިފަ އެވެ. ބަޔާނަށް ޖުމުލަ ކުޅެދިން 45 މެޗުން ކޭން ވަނީ 44 ލަނޑު ޖަހައިފަ އެވެ. އޭގެ ތެރެއިން ޖަރުމަނު ލީގުގައި އޭނާ ވަނީ 32 މެޗުން 36 ލަނޑު ޖަހައިފަ އެވެ.

އެވޯޑާ ހަވާލުވުމަށްފަހު ވާހަކަ ދައްކަމުން ކޭން ބުނީ، ރަން ބޫޓު ހާސިލުކުރެވުމުން އޭނާ އަށް ކުރެވެނީ އުފާވެރި އިޙުސާސެއް ކަމަށެވެ. އެކަމުގެ ޝުކުރު އަދާ ކުރަން ޖެހެނީ އޭނާ ކުޅެމުން އަންނަ ބަޔާން އަދި ބަޔާންގެ ކުޅުންތެރިންނަށް ކަމަށް ވެސް ކޭން ބުންޏެވެ. ބަޔާންގެ ކުޅުންތެރިންގެ އެހީތެރިކަން ނެތި، އޭނާ އަށް ރަން ބޫޓު ނުލިބޭނެ ކަމަށް ވެސް ކޭން ބުންޏެވެ. އެކަން ފާހަގަކޮށް ކޭން ބުނީ، ބަޔާނަށް ބަދަލުވުމަކީ އޭނާގެ ޙަޔާތުގައި ވެސް ނިންމުނު އެންމެ ރަނގަޅު ނިންމުން ކަމަށެވެ.

ޔޫރަޕުގެ ރަން ބޫޓު ދޭން ފަށާފައި ވަނީ 1967 ވަނަ އަހަރު އެވެ. އޭގެ ފަހުން މިހާތަނަށް އެންމެ ގިނަ ފަހަރު ޔޫރަޕުގެ ރަން ބޫޓު ހޯދާފައި ވަނީ އާޖެންޓީނާގެ ކެޕްޓަން ލިއޮނަލް މެސީ އެވެ. މެސީ ވަނީ ހަ ފަހަރެއްގެ މަތިން ރަން ބޫޓު ހޯދައިފަ އެވެ. މެސީގެ ފަހަތުން ދެ ވަނައިގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އޮތީ، ހަތަރު ފަހަރު ރަން ބޫޓު ހޯދައިގެންނެވެ.