ދިވެހި ފިލްމް ކަމަނާ - ޓެކްނިކަލީ މޮޅު، ޖަޒުބާތީ ފިލްމެއް

އަންގާރަ ދުވަހުގެ ރޭ ރިލީޒް ކުރި ދިވެހި ފިލްމް “ކަމަނާ”ވެގެން ދިޔައީ ނޭވާ ހިފަހައްޓާލަން ޖެހުނު ވަގުތުތައް ފިލްމުން ފެނިގެން ދިޔަ މޮޅު ފިލްމަކަށެވެ. މި ފިލްމަކީ ގެވެށިއަނިޔާގެ ޝިކާރަ އާއި އޭގެ ވޭން ދައްކުވައިދީފައިވާ ފިލްމަކަށް ވީ ނަމަވެސް ފިލްމުގައި ހެއްވާ މަޖާ ޑައިލޮގްތައް ވެސް ވަނީ ހިމަނާފައެވެ. އަދި ފިލްމަކީ ދެމަފިރިންގެ ދެމެދުގައި ދިމާވާ ކަންކަމާއި، ކައިވެނީގެ ހަޔާތުގައި ދިމާވާ ބައެއްކަން ވަރަށް ރަނގަޅަށް ގެނެސްދީފައިވާ ފިލްމެކެވެ. މި ފިލްމް ބެލި ބެލުންތެރިން ބުނާ ގޮތުން މިއީ ޓެކްނިކަލީ މޮޅު ފިލްމެކެވެ. އަދި ފިލްމުން ފެނިގެންދާ މޮޅު އެކްޓިން ފެނިފައި އާއްމުންނާއި ފިލްމީ ފަންނާނުން ވެސް ތިބީ އާޝޯހުވެފައެވެ.

ފިލްމްގެ ފުރަތަމަ ހާފްގައި ސަކަ މަޖާ ޑައިލޮގްތައް ގިނައިން ފެނިގެން ދިޔައެވެ. އަދި ފިލްމު އަތުރާލާފައި ވަނީ ބެލުންތެރިން ޝައުގުވެރިކުރުވާ ފަދަ މޭރުމަކުންނެވެ. ބޮޑު ޑިމާންޑެއް އޮތް މި ފިލްމްގެ ލީޑް ރޯލުން ފެނިގެންދާ މަރިޔަމް އައްޒަގެ އެކްޓިން އިން އޭނާގެ ކެރެކްޓަރ ކަމަނާގެ ޖަޒުބާތުތައް ވަރަށް ރަނގަޅަށް ވަނީ ދައްކުވާދީފައެވެ. އެ ފިލްމް ނިމުނު އިރު އައްޒަ އަށް ތައުރީފް ނުކުރާ މީހަކު މުޅި އޮލިމްޕަހުގަވެސް ނެތެވެ. އަދި މަޤްބޫލް ތަރި ޔޫސުފް ޝަފީއު (ޔޫއްޕެ)ގެ ފަރާތުން ވެސް ފެނިގެން ދަނީ އާދަޔާ ޚީލާފު އެކްޓިންއެކެވެ. އާމިނަތު ރަޝްފާ (އާޝާ) އާއި ނަތާޝާ ޖަލީލް އާއި މުޙައްމަދު މަނިކު އާއި ދަރާ މުޙައްމަދު ރަޝީދުގެ އެކްޓިންވެސް ވަރަށް ފުރިހަމައެވެ. ޚާއްސަކޮށް ނަތާޝާގެ އެކްޓިން މި ފިލްމުގައި ވަރަށް މޮޅެވެ. ނަތާޝާ ޖަލީލް އާއި މުޙައްމަދު މަނިކު އާއި ދަރާ މުޙައްމަދު ރަޝީދު

ފިލްމްގެ ޑައިރެކްޓަރަކީ ސަޒާ، ދިލަކަނި ފަދަ ފިލްމްތައް ބެލުންތެރިންނާއި ހަމަޔަށް ގެނެސްފީފައިވާ ޒުވާން ޑައިރެކްޓަރ ޙުސައިން މުނައްވަރުގެ މި ފިލްމުގެ މަންޒަރުތައް ނަގާފައިވާ ގޮތާއި، ފިލްމްގެ ލަވަތަކާއި، މިއުޒިކް ވެސް ވަރަށް ހިތްގައިމެވެ. ލަވަތަކާއި ބެކް މިއުޒިކުން ފިލްމުން އާއްމުންނާއި ހަމައަށް ގެނެސްދޭން ބޭނުންވި ޝުއޫރުތައް ވަނީ ވަރަށް ރަނގަޅަށް ގެނެސްދީފައެވެ. ހއ. މޮޅަދޫގައި މަންޒަރުތައް ނަގާފައިވާ މި ފިލްމުން މޮޅަދޫގެ ގުދުރަތީ ޗާލުކަމާއި ހިތްގައިމުކަން ވަނީ ވަރަށް ރަނގަޅަށް ދައްކުވާދީފައެވެ. މަހުދީ އަހުމަދުގެ ސްކްރީންޕްލޭއަކަށް ތައްޔާރުކޮށްފައިވާ މި ފިލްމުގެ ޑައިލޮގްތައް ވެސް ވެގެން ދިޔައީ ބެލުންތެރިންނަށް ކަމުދިޔަ ޑައިލޮގްތަކަކަށެވެ.

27 އޯގަސްޓް އިން ފެށިގެން 14 ސެޕްޓެމްބަރާއި ހަމަޔަށް ކޮންމެ ހަފްތާއެއްގެ ބުރާސްފަތި އަދި ހުކުރު ދުވަހުގެ ރޭ 20:30ގެ ޝޯވގެ އިތުރުން 23:30 ގައި ފިލްމްގެ ޝޯވތައް ކުރިއަށްދާނެއެވެ.