މާޒިޔާއާ ހަވާލުވީ މޮންޓެރީގްރޯގެ ކޯޗެއް

އޭއެފްސީ ޗެލެންޖް ލީގުގައި ވާދަކުރާ ރާއްޖޭގެ މާޒިޔާ އަށް މޮންޓެނީގްރޯގެ ކޯޗެއް ގެނެސްފި އެވެ.

އުމުރުން 54 އަހަރުގެ ކޯޗު ޑްރަގަން ޑުކަނޮކޮވިޗް އަކީ މީގެ ކުރިން އޭޝިޔާގެ ގިނަ ގައުމުތަކެއްގައި ކޯޗުކޮށްދީފައިވާ ތަޖުރިބާކާރެކެވެ. މި ގޮތުން އޭނާ ވަނީ އިންޑޮނީޝިއާ އާއި ބަނގްލަދޭޝް އަދި މޮންޓެނީގްރޯ އާއި ސާބިއާގެ އިތުރުން ގްރީސްގެ ބައެއް ޓީމުތަކަށް ވެސް ކޯޗުކޮށްދީފަ އެވެ. އޭނާއާއެކު މާޒިޔާއިން ރަސްމީކޮށް ކޮންޓްރެކްޓްގައި ސޮއިކުރުން ބޭއްވީ މިއަދު ހެނދު މަޒާޑާ ކެފޭގަ އެވެ. ޓީމުގެ ފަރާތުން ސޮއިކުރީ ޗެއާމަން އަހުމަދު ސާޖިދެވެ.

ޑްރަގަން މާޒިޔާއާއެކު އަންނަ އަންގާރަ ދުވަހު ޗެލެންޖް ލީގަށް ތައްޔާރުވާން ފަށާނެ އެވެ. އޭނާ އަށް ލިބިފައިވާ މާޒިޔާގެ ޓީމަކީ ރާއްޖޭގެ ގައުމީ ޓީމުގެ 90 ޕަސެންޓް ކުޅުންތެރިން ތިބި ޓީމެވެ.

މާޒިޔާ ހިމެނޭ ގްރޫޕް ބީގައި ހިމެނެނީ ކުވޭރުގެ އަލް އަރަބީ އާއި ތުރުކުމެނިސްތާންގެ އެފްސީ އާކަޑާ އާއި ކަޒަކިސްތާނުގެ އެފްސީ އަބްޑީޝް އަޓާ ކަންޓެވެ. މި ހަތަރު ޓީމު ގްރޫޕް ސްޓޭޖުގައި ކުޅޭ ހުރިހާ މެޗެއް ވެސް ކުޅޭނީ ކުވޭތުގަ އެވެ. ފުރަތަމަ މެޗުގައި މާޒިޔާ ނުކުންނާނީ އަންނަ އޮކްޓޫބަރު މަހު 26ގައި އެފްސީ އާކަޑާއާ ދެކޮޅަށެވެ. ދެ ވަނަ މެޗުގައި 29 ވަަނަ ދުވަހު ކުޅޭނީ އަލް އަރަބީއާ ދެކޮޅަށެވެ. ތިން ވަނަ މެޗުގައި އަބްޑީޝްއާ ދެކޮޅަށް ކުޅޭނީ ނޮވެމްބަރު މަހުގެ އެއް ވަނަ ދުވަހު އެވެ.