މާޒިޔާގެ ޕްރެކްޓިސް އަންގާރަ ދުވަހު ފަށަނީ

އޭއެފްސީ ޗެލެންޖް ލީގަށް ތައްޔާރުވުމަށް މާޒިޔާގެ ޕްރެކްޓިސް އަންގާރަ ދުވަހު ފަށަން ނިންމައި، އެކަން ކުޅުންތެރިންނަށް އަންގައިފި އެވެ. އަދި އެ ޓީމަށް ގެންނަ ބިދޭސީ ކޯޗު މިހާރު ވަނީ މާލެ އައިސްފަ އެވެ.

ރާއްޖޭގެ ފުޓްބޯޅަ ސީޒަން މި އަހަރު ނުފަށައި އޮތް ނަމަވެސް މާޒިޔާއިން ޕްރެކްޓިސް މި ފަށަނީ އޭއެފްސީ ޗެލެންޖެ ލީގުގައި އޮކްޓޫބަރު މަހު އެ ޓީމު ވާދަކުރަންޖެހޭ މެޗުތަކަށެވެ. ޗެލެންޖް ލީގަކީ އޭއެފްސީގެ މުބާރާތްތައް އަލުން ތަރުތީބުކުރިއިރު ކުރިން ބާއްވަމުން އައި އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ ބަދަލުގައި ބާއްވާ އެއް މުބާރާތެވެ.

މި މުބާރާތަށް މާޒިޔާ ފަރިތަކުރަން ފަށާއިރު ރާއްޖޭގެ ގައުމީ ޓީމުގެ 90 ޕަސެންޓް ކުޅުންތެރިން ތިބީ ވެސް މާޒިޔާގަ އެވެ.

ޗެލެންޖް ލީގުގައި މާޒިޔާ ހިމެނޭ ގްރޫޕް ބީގައި ހިމެނެނީ ކުވޭރުގެ އަލް އަރަބީ އާއި ތުރުކުމެނިސްތާންގެ އެފްސީ އާކަޑާ އާއި ކަޒަކިސްތާނުގެ އެފްސީ އަބްޑީޝް އަޓާ ކަންޓެވެ. މި ހަތަރު ޓީމު ގްރޫޕް ސްޓޭޖުގައި ކުޅޭ ހުރިހާ މެޗެއް ވެސް ކުޅޭނީ ކުވޭތުގަ އެވެ. ފުރަތަމަ މެޗުގައި މާޒިޔާ ނުކުންނާނީ އަންނަ އޮކްޓޫބަރު މަހު 26ގައި އެފްސީ އާކަޑާއާ ދެކޮޅަށެވެ. ދެ ވަނަ މެޗުގައި 29 ވަަނަ ދުވަހު ކުޅޭނީ އަލް އަރަބީއާ ދެކޮޅަށެވެ. ތިން ވަނަ މެޗުގައި އަބްޑީޝްއާ ދެކޮޅަށް ކުޅޭނީ ނޮވެމްބަރު މަހުގެ އެއް ވަނަ ދުވަހު އެވެ.