ޑޮލަރ އެކްސްޖޭންޖް ވިޔަފާރި ތެރޭގައި ތިބީ ބިދޭސީން، އެކަން އިސްލާހުކުރަން ޖެހޭ - އަމްރު

ޑޮލަރ އެކްސްޖޭންޖް ވިޔަފާރި ތެރޭގައި ހަރަކާތްތެރި ވަމުން ދަނީ ބިދޭސީން ކަަމަށާއި ޑޮލަރު ވިއްކާ ގަތުމުގެ ނިޒާމް ހަރުދަނާކުރަން ޖެހޭ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެއެވެ.

އެނާ އެފަދައިން ވިދާޅުވީ ހޯމަ ދުވަހު ޑިމޮކްރެޓްސް އިން ބޭއްވި ނޫސްވެރިންގެ ބައްދަލުވުމެއްގައެވެ.

އޭނާ ވިދާޅުވި ޑޮލަރު ވިއްކުމާއި ގަތުމުގެ މުއާމަލާތް ކުރުމުގެ ހުއްދަ ޑޮލަރ އެކްސްޗޭންޖް ކުރުމުގެ ހުއްދަ ދީފައިވާ ބައެއް ތަންތަނަށް އޮންނަ ކަމަށެވެ. ނަމަވެސް އެކަމުގައި ވެސް އުޅެނީ ބިދޭސީން ކަމަށާއި އެ ތަންތަން ހިންގަނީ ދިވެއްސަކަށް ފައިސާކޮޅެއް ދިނުމަށް ފަހު ކަންމަތީ ފިހާރައެއްގައި ބިދޭސީން ވިޔަފާރިކުރާ ގޮތަށް ކަމަށް އަމްރު ވިދާޅުވިއެވެ. އޭގެ ބަދަލުގައި ބޭންކްތަކަށް ޑޮލަރުގެ މުއާމަލާތު ކުރެވޭ ގޮތަށް އިންތިޒާމްތައް ބަދަލުކުރަން ޖެހޭ ކަމަށް އަމްރު ވިދާޅުވިއެވެ. ޑޮލަރު މާރުކުރުމުގެ މަރުހަލާ ބޭންކް މެދުވެރިކޮށް ކުރާ ގޮތަށް ހަމަޖެއްސުމުން ބޮޑެތި އަދަދުތަކުން ޑޮލަރު ވިއްކުމާއި ގަތުމުގެ މުއާމަލާތުތައް ނިޒާމުގެ ތެރެއަށް ނުވަންނަ ގޮތަށް ނުކުރެވޭނެ ކަމަށް އަމްރު ވިދާޅުވިއެވެ. އޭރުން މަގުމަތިން އެއްލައްކަ ޑޮލަރުން، ދެ ލައްކަ ޑޮލަރުން، ޑޮލަރު ވިއްކާ ގަތުން ނިމުމަކަށް އަންނާނެ ކަމަށް ވެސް އަމްރު ވިދާޅުވިއެވެ. މިހާރު އެ ނިޒާމް އޮތް ގޮތުން ރާއްޖެ އަށް ލިބެން އޮންނަ ފައިސާ ނުލިބިދާ ގޮތަށް ބައެއް މީހުން ޑޮލަރު މާރުކުރުމުގެ މުއާމަލާތުތައް ކުރާ ކަމަށް އޭނާ ވިދާޅުވިއެވެ.

އިގްތިސާދު ރަނގަޅުކުރަން ކުރަންޖެހޭ ކަންކަން ސަރުކާރަށް ނޭނގޭކަން އާދިއްތަ ދުވަހު ސަރުކާރުން ބޭއްވި ނޫސްވެރިންގެ ބައްދަލުވުމުން ސާފުކޮށް އެނގޭ ކަމަށް އަމްރު ވިދާޅުވިއެވެ. ސަރުކާރު ހިންގަން އާދޭސްކުރަމުންދާ މަންޒަރު މިހާރު ފެންނަ ކަމަށް އޭނާ ވިދާޅުވިއެވެ. ބޮޑެތި ގައުމުތަކުގައި 12 ވަރަކަށް ވުޒާރާ އޮތް އިރު ރާއްޖޭގައި 22 ވުޒާރާ އޮތްކަން އެ ޤައުމުތަކަށް ފެންނާނެ ކަަމަށް އޭނާ ވިދާޅުވިއެވެ. އެފަދަ ކަންކަން ފެނުމުން ރާއްޖެއަށް ފައިސާކޮޅެއް ދިނަސް ރާއްޖެ ހަމަމަގަށް ނޭޅުވޭނެކަން ޤައުމުތަކަށް ޤަބޫލުކުރެވޭނެ ކަަމަށް އަމްރު ވިދާޅުވިއެވެ. އެމްބެސީތަކަށް ވެސް އެތައް ބަޔަކު އައްޔަންކޮށްފައިވާއިރު އެތަންތަނުގެ މަޤްސަދު ހާސިލްވޭތޯ އޭނާ ވަނީ ސުވާލު އުފައްދަވާފައެވެ.