ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުންނާއެކު ބާއްވަވާ ބައްދަލު ކުރެއްވުންތަކުގައި އެމަނިކުފާނު ކުރައްވާ ކަންކަމުން ނުކުންނަ ނަތީޖާއާ ގުޅޭ ގޮތުން ސުވާލު ކުރަން ޖެހޭ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އަމްރު ވިދާޅުވީ ރައީސް މުއިއްޒު ރައްޔިތުންނާ ވަރަށް ގާތުން ބައްދަލު ކުރައްވާ ކަމަށާއި، މި ބައްދަލުވުންތަކުން ރައްޔިތުންނަށް ފައިދާވާން ޖެހޭ ކަމަށެވެ. އަމްރު ވިދާޅުވީ މި ބައްދަލުކުރެއްވުން ތަކުގައި އެމަނިކުފާނާ ރައްޔިތުން ސުވާލު ކުރަން ޖެހޭ ކަމަށާއި، ކަންކަން އޮޅުން ފިލުވަން ޖެހޭ ކަމަށެވެ. އަދި ސުވާލު އަމާޒު ކުރަންވީ އެމަނިކުފާނު ކުރައްވާ ކަންކަމުގެ ސަބަބުން ނުކުންނަ ނަތީޖާއާ ގުޅޭ ގޮތުން ކަމަށް އޭނާ ވިދާޅުވި އެވެ.

އެގޮތުން ރައީސް ކުރައްވާ ބޮޑެތި ހަރަދުތަކުން ރައްޔިތުންނަށް ލިބޭ ފައިދާއާ ގުޅޭގޮތުން ސުވާލު ކުރަން ޖެހޭ ކަމަށާއި، ބިޑަކާ ނުލާ ޕްރޮޖެކްޓްތައް ބަހާލުމުން 12 މަސް ދުވަހުން ނިންމާ މަޝްރޫއު، 6 މަސް ދުވަހުން ނިމެނީތޯ ނުވަތަ ނުކުންނާނެ ރަނގަޅު ނަތީޖާ ރައީސް މުއިއްޒުގެ އަރިހުން ރައްޔިތުން ހޯދަން ޖެހޭ ކަމަށް އަމްރު ވިދާޅުވި އެވެ.

އަމްރު ވިދާޅުވީ މި ސަރުކާރާއެކު އިންވެސްޓަރުންގެ އިތުބާރު މުޅި ގައުމަށް ގެއްލިފައިވާ ކަމަށާއި، މިގައުމުގެ މިނިވަން މުއައްސަސާތަކުގެ މިނިވަންކަމާ މެދު ސުވާލު އުފައްދަމުންދާ ކަމަށެވެ. އެކަމުގެ ގެއްލުން މުޅި ގައުމަށް ވަމުންދާ ކަމަށް އޭނާ ވިދާޅުވި އެވެ.

މީގެ އިތުރުން އަމްރު ވަނީ މުޅި ދުނިޔޭގައި ތެލުގެ އަގު ބޮޑުވެއްޖެ ހާލަތެއްގައި ރާއްޖެއިން އަމަލު ކުރާނެ ގޮތާއި ނުވަތަ ފަތުރުވެރިކަމުގެ ސިނާއަތް ދަށްވާ ހާލަތެއްގައި އަމަލު ކުރާނެ ގޮތާ ގުޅޭ ގޮތުން ވެސް ސުވާލު އުފައްދަވާފަ އެވެ. ރައްޔިތުން ހާލުގައި ނުޖައްސާ ގައުމު ހިންގާނެ ރަނގަޅު ޕްލޭނެއް އޮތްކަމާމެދު ސުވާލު އުފެދޭ ކަމަށް އޭނާ ވިދާޅުވި އެވެ.