ބޭނުން ނުކުރެވުމުން ގަދަކަމުން ވިކާ ރޯކް ފޮނުވާލައިފި

ބާސެލޯނާ އަށް ބޭނުން ނުކުރެވުމުން ބްރެޒިލްގެ ޒުވާން ފޯވަޑް ވިޓާ ރޯކްގެ ނުގަބޫލުގައި އެންމެ ފަހުން އޭނާ ރެއާލް ބެޓިސް އަށް ފޮނުވާލައިފި އެވެ.

މިދިޔަ އަހަރުގެ ނޮވެމްބަރު މަހު 40 މިލިއަން ޑޮލަރު ހޭދަކޮށްގެން ބާސެލޯނާ އަށް ގަތް 19 އަހަރުގެ ފޯވަޑް ދޫކޮށްލީ އޭނާ މޮޅު ކުޅުމެއް ދައްކައިފިނަމަ އަލުން ގެންނަ ގޮތަށެވެ. މޮޅަށް ނުކުޅެވިއްޖެނަމަ ވެސް އެއް އަހަރު ފަހުން އޭނާ ވާނީ ބާސެލޯނާގެ ކުޅުންތެރިއަކަށެވެ. ނަމަވެސް އެ ހިސާބުން އޭނާ ވިއްކާލަން ބާސެލޯނާއިން އަމާޒު ހިފާނެ އެވެ.

ވިޓާ ރޯކްގެ މުސްތަގްބަލް ބާސެލޯނާގައި ބަނަވީ ކީއްވެކަން ޔަގީނެއްނޫނެވެ. ނަމަވެސް ކުރީގެ ކޯޗު ޒަވީ ހަނާންޑޭޒް ވެސް އޭނާ ލައްވައި ކުޅުވާކަށް ބޭނުމެއްނުވި އެވެ. އަދި މިހާރުގެ ކޯޗު ހަންސީ ފްލިކް ވެސް އޭނާއަށް ޓީމުގައި މުސްތަގްބަލް އޮތްކަމަށް ގަބޫލެއް ނުކުރެ އެވެ. މިހެންވެ ބާސެލޯނާއިން އެންމެ ފުރަތަމަ ނިންމީ އޭނާ ވިއްކާލުމަށެވެ. މިކަން ނުކުރެވުނީ މިދިޔަ އަހަރު ހެދި ފަސް އަހަރުގެ ކޮންޓްރެކްޓްގެ ބޮޑުބައެއް ބާކީ އޮތުމުން ކުޅުންތެރިޔާ ބާސެލޯނާ ދޫކޮށްލަން ބޭނުންނުވުމުންނެވެ. ބެޓިސް އަށް ރޯކް ގަތުމުގެ ފުރުސަތު ލިބެ އެވެ. އެ ކުލަބުގައި އެމީހުން ހިތްހަމަޖެހޭ ކުޅުމެއް އޭނާ ދައްކައިފިނަމަ ވިއްކާލަން ކިޔާފައިވާ އަގަކީ 25 މިލިއަން ޔޫރޯ އެވެ.

އައު ސީޒަނަށް ބާސެލޯނާ ތައްޔާރުވަމުން އަންނައިރު ގިނަ ކުޅުންތެރިން ވިއްކާނުލެވި، އާމްދަނީ ދަށްވެ ޓީމު ވަރުގަދަ ކުރުމަށް ވަނީ ހުރަސްތަކެއް އެޅިފަ އެވެ.