ވުލްވްސްބާގް އަތުން ބަޔާނަށް އުނދަގޫ މޮޅެއް

އައު ސީޒަންގެ ޖަރުމަނު ލީގުގައި ބަޔާން މިއުނިކުން ކުޅުނު ފުރަތަމަ މެޗުގައި ވުލްވްސްބާގް އަތުން އުނދަގޫ މޮޅެއް ހޯދައިފި އެވެ.

ވުލްވްސްބާގްގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު އެ މެޗަކީ ބަޔާންގެ ކޯޗު ކަމާ ހަވާލުވި ވިންސެންޓް ކޮމްޕެނީގެ އިރުޝާދުގެ ދަށުން ލީގުގައި އެ ޓީމުން ކުޅުނު ފުރަތަމަ މެޗެވެ. އެ މެޗުގައި ބަޔާން އިން ވުލްވްސްބާގްގެ މައްޗަށް ކުރި ހޯދީ 3-2 ގެ ނަތީޖާ އަކުންނެވެ.

މެޗުގެ ފުރަތަމަ ހާފުގައި ބަޔާނުން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 20 ވަނަ މިނެޓުގައި ބަޔާނަށް ލީޑު ނަގައިދިނީ ޖަމާލް މުސިއާލާ އެވެ. ނަމަވެސް ދެ ވަނަ ހާފުގައި ވުލްވްސްބާގް އިން ވަނީ ލަނޑު ޖަހައި ނަތީޖާ ހަމަހަމަކޮށް، ލީޑު ވެސް ނަގައިފަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެ ޓީމުން ނަތީޖާ ހަމަހަމަ ކުރީ ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ ލޮވްރޯ މާޔާ އެވެ.

އޭގެ އަށް މިނެޓު ފަހުން ލޮވްރޯ މާޔާ ވަނީ އިތުރު ލަނޑެއް ޖަހައި ވުލްވްސްބާގަށް ލީޑު ނަގައިދީފަ އެވެ. އެ ލީޑުގައި އެ ޓީމަށް އޮވެވުނީ ދިހަ މިނެޓަށެވެ. މެޗުގެ 65 ވަނަ މިނެޓުގައި ބަޔާނަށް ނަތީޖާ ހަމަހަމަވީ ވުލްވްސްބާގްގެ ޖަކޫބް ކަމިންސްކީ އަތުން ބައި ކޮޅަށް ވަތް ލަނޑުންނެވެ. މެޗުން ބަޔާން މޮޅުވީ މެޗުގެ 82 ވަނަ މިނެޓުގައި ސާޖް ގްނަބްރީ ޖެހި ލަނޑުންނެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ހެރީ ކޭން އެވެ.

ލީގުގައި ބަޔާންގެ ދެ ވަނަ މެޗުގައި އެ ޓީމުގެ އަމިއްލަ ދަނޑުގައި ނިކުންނާނީ ފްރެއިބާގްއާ ދެކޮޅަށެވެ.