ޗެލްސީން ހޯދީ ހަ ލަނޑުގެ މޮޅެއް

އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން، ޗެލްސީން ހަ ލަނޑުގެ ބޮޑު މޮޅެއް ހޯދައިފި އެވެ.

އައު ސީޒަންގައި ޗެލްސީން ކުޅުނު ފުރަތަމަ މެޗުގައި އެ ޓީމު ވަނީ ބަލިވެފަ އެވެ. ނަމަވެސް އާދިއްތަ ދުވަހުގެ ރޭ ވުލްވްސްގެ ދަނޑުގައި ކުޅުނު މެޗު އެ ޓީމުން ވަނީ 6-2 އިން ކާމިޔާބު ކޮށްފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޗެލްސީންނެވެ. މެޗު ފަށައިގެން ދެ ވަނަ މިނެޓުގައި ޗެލްސީ އަށް ލީޑު ނަގައިދިނީ ނިކޮލަސް ޖެކްސަން އެވެ. އޭގެ ފަހުން މެޗުގެ 27 ވަނަ މިނެޓުގައި ވުލްވްސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ މަތެއުސް ކުންހާ އެވެ. މެޗުގެ 45 ވަނަ މިނެޓުގައި ދެ ވަނަ ފަހަރަށް ޗެލްސީ އަށް ލީޑު ނަގައިދިނީ ކޯމް ޕާމާ އެވެ. އޭގެ މިނެޓެއް ފަހުން ސްޓްރޭންޑް ލާސެން ވަނީ ލަނޑު ޖަހައި ވުލްވްސް އަށް ނަތީޖާ ހަމަހަމަ ކޮށްދީފަ އެވެ.

މެޗުގައި ޗެލްސީގެ އަނެއް ހަތަރު ލަނޑު އެ ޓީމުން ޖެހީ ފަހު ހާފުގަ އެވެ. ދެ ވަނަ ހާފުގައި ޗެލްސީގެ ފުރަތަމަ ތިން ލަނޑު ވެސް ޖެހީ ނޯނީ މަޑުއޭކޭ އެވެ. އެއީ މެޗުގެ 49 ވަނަ މިނެޓާއި، 59 ވަނަ މިނެޓާއި އަދި 63 ވަނަ މިނެޓުގައި އޭނާ ޖެހި ލަނޑުތަކެވެ. މެޗުގައި ޗެލްސީގެ ހަ ވަނަ ލަނޑު 80 ވަނަ މިނެޓުގައި ޖެހީ ޕޯޗުގަލްގެ ޔާއޯ ފެލިކްސް އެވެ.

މޮޅާއެކު މިވަގުތު ޗެލްސީ އަށް ވަނައިގައި އޮތްއިރު، އެ ޓީމުގެ ތިން ވަނަ މެޗުގައި ނިކުންނާނީ ކްރިސްޓަލް ޕެލެސްއާ ދެކޮޅަށެވެ.