އަލަށް ތައާރަފްކުރާ ތިން މުބާރާތުގެ ތެރެއިން އޭއެފްސީ ޗެލެންޖް ލީގުގައި ރާއްޖޭގެ މާޒިޔާ ގަދަ ފަޅިއެއްގައި ހިމެނިއްޖެ އެވެ.
މާޒިޔާ ހިމެނޭ ގްރޫޕް ބީގައި ހިމެނެނީ ކުވޭރުގެ އަލް އަރަބީ އާއި ތުރުކުމެނިސްތާންގެ އެފްސީ އާކަޑާ އާއި ކަޒަކިސްތާނުގެ އެފްސީ އަބްޑީޝް އަޓާ ކަންޓެވެ. މި ހަތަރު ޓީމު ގްރޫޕް ސްޓޭޖުގައި ކުޅޭ ހުރިހާ މެޗެއް ވެސް ކުޅޭނީ ކުވޭތުގަ އެވެ. ފުރަތަމަ މެޗުގައި މާޒިޔާ ނުކުންނާނީ އަންނަ އޮކްޓޫބަރު މަހު 26ގައި އެފްސީ އާކަޑާއާ ދެކޮޅަށެވެ. ދެ ވަނަ މެޗުގައި 29 ވަަނަ ދުވަހު ކުޅޭނީ އަލް އަރަބީއާ ދެކޮޅަށެވެ. ތިން ވަނަ މެޗުގައި އަބްޑީޝްއާ ދެކޮޅަށް ކުޅޭނީ ނޮވެމްބަރު މަހުގެ އެއް ވަނަ ދުވަހު އެވެ.
މީގެ ކުރިން ކުޅެމުން އައި އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ ބަދަލުގައި އޭއެފްސީން ވަނީ އަލަށް ތިން މުބާރާތެއް ތައާރަފްކޮށްފަ އެވެ. އެއީ އޭއެފްސީ ޗެމްޕިއަންސް ލީގު އެލީޓް އާއި ޗެމްޕިއަންސް ލީގު ޓޫ އަދި ޗެލެންޖް ލީގެވެ.
މާޒިޔާ އަކީ މި ފަހަކަށް އައިސް ރާއްޖެއިން އެންމެ ގިނައިން އޭއެފްސީ ކަޕުގައި ކުޅުނު ޓީމެވެ. ނަން ބަދަލުވިޔަސް ކުރީގެ މުބާރާތުގައި ކުޅެން އެ ޓީމު މި ފަހަރު ތައްޔާރުވަނީ ރާއްޖޭގެ ފުޓްބޯޅަ ސީޒަން ނެތި އޮއްވަ އެވެ.
