އެމް.އާރް.އެމް އުވާލުމަށް އިލެކްޝަން ކޮމިޝަނުން ނިންމައިފި

މޯލްޑިވްސް ރިފޯމް މޫވްމަންޓް (އެމް.އާރް.އެމް) އުވާލުމަށް އިލެކްޝަން ކޮމިޝަން (އީސީ)އިން ނިންމައިފިއެވެ.

އާދިއްތަ ދުވަހު އީސީން ބުނީ ސިޔާސީ ޕާޓީގެ ޤާނޫނު ލާޒިމުކުރާ އަދަދަށް 3000 މެންބަރުން ހަމަވެފައިނުވާތީ އެމް.އާރް.އެމް އުވާލުމަށް ކޮމިޝަނުން ނިންމާފައިވާ ކަމަށެވެ.

ރާއްޖޭގެ ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެންބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އެ މުއްދަތުގެ ތެރޭގައި މެމްބަރުން ހަމަނުކުރާނަމަ އެ ޕާޓީއެއް އުވިގެންދާނެއެވެ.

އާދިއްތަ ދުވަހު އެމް.އާރް.އެމް އުވާލުމަށް ނިންމާ އެކަން އިއުލާން ކުރިއިރު، 24 މެއި 2023 ވެސް ގައި ވެސް އެޕާޓީ އުވާލަން ނިންމާ އެކަން އިއުލާން ކުރިއެވެ. ނަމަވެސް އެމައްސަލަ ސިވިލް ކޯޓަށް ހުށަހެޅުމުން އެއީ ގާނޫނާ ހިލާފު ނިންމުމެއް ކަމަށް ކޯޓުން ނިންމިއެވެ. އަދި އިލެކްޝަންގެ ނިންމުން ގޯސްކަމަށް ނިންމައި، އެމްއާރްއެމްއަށް 50،000 ރުފިޔާ ދިނުމަށް ހުކުމްކޮށްފައިވަނީ 12 ފެބްރުއަރީ 2024 ގައެވެ. އޭރު އެމްއާރްއެމުން ބުނެފައިވަނީ އެޕާޓީގެ މެންބަރުންގެ އަދަދު އީސީން އޮޅުވާލާފައިވާ ކަމަށެވެ.

އެމްއާރްއެމް އަކީ ކުރީގެ ރައީސް މައުމޫން އަބްދުލްގައްޔޫމް އަދި ދަރިކަލުން ފާރިސް މައުމޫން އިސްވެ ހުންނަވައިގެން އުފެއްދެވި ޕާޓީއެކެވެ. އެ ޕާޓީ ހިންގެވުމުގައި އެންމެ އިސްކޮށް ހަރަކާތްތެރިވަނީ ދަރިކަލުން ފާރިސްއެވެ.