މެމްބަރުން، ޗުއްޓީއަށް ތިޔަވަޑައިގަންނަވަނީ މަސައްކަތާއި މެދު ހިތްހަމެޖެހިގެންތޯ؟

ވިހި ވަނަ ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފަހު ޖަލްސާ ބުރާސްފަތި ދުވަހުގެ ރޭ ބާއްވާނެކަން އިޢުލާންކުރެއްވީ ބުރާސްފަތި ދުވަހުގެ މަޖިލީހުގެ ޖަލްސާގައެވެ. ދައުރު ނިންމާލާ ޗުއްޓީ އަށް ދާން އަތުކުރި އޮޅާލި އިރު މި މަޖިލީހުގައި މެމްބަރުން ކުރި މަސައްކަތާއި މެދު މެމްބަރުން ތިބީ ހިތްހަމަޖެހިގެން ބާއޭ ހިތަށް އަރައެވެ.

މި މަޖިލީހުގެ ޖުމްލަ 79 މެންބަރުންނާއެކު ސަރުކާރުގެ ފުރިހަމަ މެޖޯރިޓީ އާއި ބާރުގައި މަޖިލީހުގައި ތިއްބެވި އިރު އިދިކޮޅު މެމްބަރުންނަށް ފުރުސަތު ދެއްވަނީ ހިތަށް އެރި ދުވަހަކު ހިތަށް އެރި މިންވަރަކަށެވެ. ކޮމިޓީތައް ވެސް އާރު ހުރި ދިމާލަކަށް ބައްސަވާލެއްވީއެވެ. ފުރަތަމަ ކަމަކަށް ދައުރުދިގުދަންމާލާ ވަކި މަސައްކަތްތަކެއް ރާސްލާފައި ނިންމާލަން ކެތްމަދުވެފަ ތިއްބެވި މިންވަރު ނިކަން ބައްލަވާށެވެ. މި ހިނގާ ދައުރު ނިމޭނެ ކަމަށް ކުރިން އޮތީ އޯގަސްޓު 15 ވަނަ ދުވަހަށެވެ. މަޖިލީހުގައި މިވަގުތު ނިންމުމަށް މުހިންމު މަސައްކަތްތަކެއް ހުރިކަމަށް ވިދާޅުވެ މަޖިލީހުގެ ދައުރު މި މަހުގެ 26، އާ ހަމައަށް ދިގުދަންމާލަން މަޖިލީހުން ފާސްކުރީ އޯގަސްޓު 13 ވަނަ ދުވަހުއެވެ. އެގޮތަށް ނިންމީ ޚުދުމަޖިލީހުގެ ރައީސް އަބްދުއްރަހީމް އަބްދުﷲ އެވެ.

މަސައްކަތުގެ ރޭޓްތޯއެވެ؟ މި މަޖިލީހުގެ ފުރަތަމަ ދައުރުގައި ސަރުކާރުގެ ފަރާތުން ޖުމްލަ 37 ބިލެއް ހުށަހަަޅާނެ ކަމަށް ބަންޑާރަނައިބުގެ އޮފީހުން އިޢުލާންކުރިއެވެ. އެހެންނަމަވެސް މަޖިލީހަށް ހުށަހެޅީ އެންމެ 23 ބިލެވެ. ދެން ހުރި ބިލްތަކަށް ވީ ގޮތެއް އެނގޭނީ ހަމަ އެ ބޭފުޅުންނަށްތާއެވެ.ކުރު މުއްދަތެއްގެ ތެރޭގައި މި މަޖިލީސް ނަންވީ ވިދާޅުވި ގޮތެއް މަޖިލީހެއް ގޮތުގައެވެ. ސަރުކާރުން އެޅިހާ ބަތަކަށް އަޅަނީ ރިހައެވެ. ވާނީވެސް އެހެންތާއެވެ. ލިބޭ މުސާރަޔާއި އެއްވަރު އަދަދަކަށް މުލިއާގެއިން މިވެރިންނަށް ފައިސާ ދެއްވަޔޯ ރަށުތެރޭގައި ކިޔާތީ އަޑު އެހީމެވެ.

މަޖިލީހުން ކުރަން ފައި ވިއްދާފައި އޮތް މަސައްކަތަކީ ސަރުކާރަށް ފަސޭހަކޮށްދިނުމެވެ. ހިތްޕުޅާ ވާހާ ގޮތަކަށް މާލީ ކަންކަން ފަރުޖައްސާ ނުދެއްވާތީ ގަވަރުނަރުވަކިކުރެއްވީއެވެ. ދެން ޕީޖީގެ މަޤާމުވެސް އެހެރަ ދަނީ އެ މޭރުމުންނެވެ. ނުރުހުން ވާހިސާބުން އެ ބޭފުޅަކު ވަކިކުރަންވީ އެވެ. މިނިވަން މުއައްސަސާއަކަސް އިދާރާއަކަސް ރައްކާތެރިކަމެއް ނެތެވެ. މަޖިލީހުގައި އާއްމުން އެންމެ އިންތިޒާރު ކުރި ބިލަކަށް އޮތީ އިސްރާއީލް ޕާސްޕޯޓްގެ ބިލެވެ. އެކަން އެއޮތީ ޕާކްކުރައްވާފައެވެ. އެކަމަކު ސަރުކާރަށް ކޭޝްކޮޅެއް ލިބޭ ގޮތަށް އޮތް ޓޫރިޒަމް ޤާނޫނު ފާސްކުރަން އާނބަހީ ކިޔާފައި މުޅި މަޖިލީހުގެ ކޮމިޓީ އަށް ގޮސް ދުވަހުން ދުވަހަށް އެ މަސައްކަތް ނިންމާދެއްވިއެވެ. މަޖިލީހެކޭ ސަރުކާރުގެ ގޮތްޕެކޭ އެއްގޮތެވެ. މިވަރުން ވެސް ވިދާޅުވާނީ މިއީ ލައްކަ ގިނަ މަސައްކަތް ކުރި ކާމިޔާބު މަޖިލީހެކޭތޯއެވެ؟