އަރަފާތުގެ ނަޖިސް ބަދިގެއިން ބުޅާ މަހުގެ އުފެއްދުންތައް ފިހާރަތަކުގެ ހަރުގަނޑަށް: ކަމާއި ބެހޭ ފަރާތްތައް ފެއިލް ވެފައިވާވަރު ހާމަވި ބޮޑު މައްސަލަ

މި ފަހުން ނޫސްތަކުގެ ފަލަސުރުހީއިން ޖާގަ ހޯދި އެއް ހަބަރަކީ އެއްގޮތުން ވަރަށް ފަކުރު ހަބަރެކެވެ. އަދި އެހާ އިންސާނިއްޔާތުކަމެއް ނެތް ދަށު ދަރަޖައިގެ އަމަލެއްގެ ވާހަކައެވެ. މާލޭގެ މަގުތަކުގައި އުޅޭ ބުޅާތައް ހިފާ އޭގެ މަސް ބޭނުންކޮށްގެން ކާތަކެތި ތައްޔާރުކޮށް ވިއްކާ ވާހަކައެވެ. މިއީ މިހާތަނަށް ތާރީހުގައި ފުރަތަމަ ފަހަރަށް އިވުނި މިފަދަ ހަބަރަށްވެސް ވެދާނެއެވެ. ނަމަވެސް މިކަން ހުއްޓުވެން އޮވެ ނުހުއްޓުވުނީ ކީއްވެގެންތޯ ވެސް ސުވާލު އުފައްދަން ޖެހެއެވެ.

ކަމާއި ބެހޭ އިދާރާތައް ވެސް އެބަހުއްޓެވެ. ނަމަވެސް މިހާ ދުވަސްވެގެން ދިޔައިރު މިކަން ނުހުއްޓުވި ދިގުލައިގެން ދިޔަ ސަބަބާއިމެދުވެސް ވިސްނާލަންޖެހެއެވެ. އާންމުން ތިލަކޮށްލި މި ވާހަކައިގެ ކްރެޑިޓް ނަގަން މިއަދު އިދާރާތަކުން މަސައްކަތް ކުރި ނަމަވެސް އެކަން އެގޮތަކަށް ވާކަށްނެތެވެ. އެ މުއައްސަސާތަކުގެ އަޅާލުން ކުޑަވެ ބަލަންޖެހޭ ވަރަށް ނުބެލި ކުރި ޝަކުވާތަކުގެ އަޑު ނޭހުމުގެ ނަތީޖާއަކަށް ވެގެންދިޔައީ ބުޅާ މަހުން ތައްޔާރުކޮށްފައިވާ ކާނާ އެތައް ބަޔަކު އެތައް ދުވަހެއް ވަންދެން ނޭނގިތިބެ ކެއުމެވެ.

ކާބޯ ތަކެތީގެ ކަންކަން ރެގިއުލޭޓްކޮށް ބަލާ ޗެކްކޮށް އެކަންކަން މޮނިޓަރކުރަން މޯލްޑިވްސް ފުޑްއެންޑް ޑްރަގް އޮތޯރިޓީގެ ނަމުގައި އިދާރާއެއް އުފައްދާފައި އޮވެއެވެ. މި ނަމުގައި އުފައްދާފައިވާ ވަކި އޮފީހެއް ހެލްތް މިނިސްޓްރީގެ ދަށުން ހިންގާއިރު އެ އޮފީހަކީ ކާބޯތަކެޗާއި ބޭހާ ބެހޭ މިންގަނޑުތައް ކަނޑައަޅައި، އެކަން ވިލަރެސްކުރުމުގެ މަސައްކަތް ކުރުމެވެ. ނަމަވެސް މިހާތަނަށްވެސް ފިހާރަތަކުގެ ކައުންޓަރުމަތިންނާއި ހަރަތަކުގައި ވިއްކަން ހުންނަ ކާބޯތަކެތި މި އިދާރާއަކުން ބަލާ ޗެކް ނުކުރެއެވެ. ހަމައެކަނި ކުރަނީ ކެފޭ ރެސްޓޯރަންޓްތައް އެކަންޏެވެ. އެވެސް ރޯދަމަހާއި ދިމާކޮށެވެ. މި އިދާރާ އޮތީ މި މައްސަލަ ފެންމަތިވި އިރުވެސް ނިދާފައެވެ.

ދެން އޮތީ ގަވާއިދާ ހިލާފުކަމެއް ކުރާނަމަ އެކަން ރިޕޯޓްކޮށް ގާނޫނޫ ތަންފީޒުކުރާ އިދާރާތަކެވެ. އަރަފާތު ފަދަ ގަވާއިދާ ހިލާފު ބިދޭސީންގެ މައްސަލަ އިމިގްރޭޝަނަށް ރިޕޯޓްކުރުމުންވެސް އެކަން ބަލާ ނުލާ ވާހަކައެވެ. އަރަފާތު ހޮސައިން ނަމަކަށް ކިޔާ އުމުރުން 32 އަހަރުގެ މީހާ ބުޅާ ގެނެސް އެ މަރާ އޭގެ މަސް ނަގައިގެން ކުރާ ވިޔަފާރީގެ ވާހަކަ އެތައް ފަހަރަކު ފުލުހުންނަށް ރިޕޯޓްކުރެވުނުކަމަށްވެއެވެ. ނަމަވެސް އެކަން ބަލާނެހާ ހިތްވަރެއް އެ މުއައްސަސާގައި ނެތެވެ. މި މައްސަލައާއ ގުޅިގެން، އަރަފާތު އުޅު ގޭގެ މީހަކު ބުނެފައިވަނީ އޭނާ އުޅުނު ކޮޓަރިން އަބަދުވެސް ބުޅާތައް ރޯ އަޑު އިވޭ ކަމަށެވެ. އަދި ރޯތީވެ ފުރާޅު މަތީގައި ބައިތިއްބާ ކަމަށެވެ. އަދި ދެދުވަހަކު އެއް ބުޅަލެއް އެތަނުން ނުފެންނަ ކަމަށެވެ.

އެގޭގައި އުޅޭ މީހާ ބުނެފައިވަނީ ބުޅަލަށް ހަދާގޮތެއް ނޭނގޭ ކަމަށެވެ. އަދި މި މީހާއަކީ ގަވާއިދާ ހިލާފަށް އުޅޭ މީހެއް ކަމަށާއި، އޭނާ އުޅުނީ 8 ފޫޓް 10 ފޫޓުގެ ކޮޓަރިއެއްގައި ކަމަށް ބުނެފައިވެއެވެ. އަދި އޭނާ ކުރާ ކަމަކީ 24 ގަޑިއިރު ހުއްޓާ ނުލާ އެތަނުގައި ކައްކައިގެން ކާބޯތަކެތި ވިއްކުން ކަމަށެވެ. އަދި އެ މައްސަލަ އިމިގްރޭޝަނަށް ވެސް ރިޕޯޓްކުރި ކަމަށާއި، އައިސް ބަލާފައި ވެސް އެއްވެސް ކަމެއް ނުކުރާ ކަމަށެވެ.

އަރަފާތު ބަދިގެ ހަދައިގެން އުޅުނު ގެ ކައިރި އުޅޭ މީހުން ބުނެފައިވަނީ އެ މައްސަލަ ފުލުހުންނަށްވެސް ހުށަހެޅި ކަމަށެވެ. ނަމަވެސް ފުލުހުންގެ ޖަވާބަކަށްވީ އެއީ ބަޔަކު ކުއްޔަށް ނަގައިގެން އުޅޭ ތަނެއް ކަމަށާއި، ފުލުހުންނަށް ކުރެވޭނެ އެއްވެސް ކަމެއް ނެތް ކަމަށެވެ. ފުލުހުންނަށް ރިޕޯޓް ކުރީ ބުޅާ މަރާ މައްސަލައާއި އޭނާ ވަގު ވިޔަފާރިއެއް ކުރާ ވާހަކައެވެ. ނަމަވެސް ފުލުހުންގެ ގާނޫނީ އަތް އޮތީ ބެނދިފައެވެ.

މިއީ މި ފަހުން ކުރި ރިޕޯޓްތަކުގެ ވާހަކައެވެ. ގާނޫނީ ގޮތުން ޒިންމާ މަތިކޮށްފައިވާ 3 މުއައްސަސާއިން ކުރި އެއްވެސް ކަމެއް ނެތެވެ. އެންމެ ފަހުން އާންމުން މިކަން ތިލަކުރީއެވެ. މިކަން ހުއްޓުވަން އާންމުންގެ އަޑު އިއްވަން ފެށުމުން އެކަމުގެ ކްރެޑިޓް ނަގަން މިއަދު ނުކުމެތިބީ އެއްކަލަ މި ދެންނެވި މުއައްސަސާތަކެވެ. މިއަދު އެ މުއައްސަސާތަކުންދަނީ މެޑަލް ޖަހަމުންނެވެ. ނަމަވެސް އެތައް ބަޔަކު ނޭނގި ތިބެ ބުޅާ މަސް ކެއުމުގެ ކުރިން މިކަން ވެސް ހުއްޓުވެން އޮތެވެ. ނަމަވެސް މިއިން އިދާރާއެއްގެ އިހްލާސްތެރިކަމެއް ނެތެވެ.