މާލެ ސިޓީގައި މަގެއްގެ މަތިން ހިނގާފައިދާއިރު ބުޅަލެއް ނުފެންނަ ފަހަރެއް މަދުވާނޭ ބުނުމަކީ ދޮގަކަށް ނުވާނެއެވެ. ކުރިޔާ އަޅާބަލާއިރު ފާހަގަވާވަރަށް މިފަހަކަށް އައިސް މާލޭގެ މަގުތަކުން ބުޅާ ފެންނަމުންދެ އެވެ. އެއް ބަޔަކު ބުޅާ ގެންގުޅެނީ ލޯބިން ގެންގުޅޭ ޕެޓެއްގެ ގޮތުގަ އެވެ. ނަމަވެސް އަނެއް ބަޔަކަށް ބުޅަލަކީ އެހާ ކަމުދާ އެއްޗަކަށް ނުވެއެވެ. ބުޅާ ދެކެ ހެސްކިޔާފައި ލޯބިވާ ބުޅަލުގެ ހައްގުގައި ވަކާލާތު ކުރާ ދިވެހިން ތިބި ގޮތަށް ބުޅާ ދެކެ ރުޅި އަންނަ ދިވެހިންވެސް އުޅެއެވެ.
އެކަމުގެ ސަބަބުން ބުޅާތަކަށް ގޯނާ ކުރުމާއި އަނިޔާވެރިކޮށް މެރުންފަދަ ކަންކަން އަންނަނީ ހިނގަމުންނެވެ. އަނިޔާވެރިކޮށް ބުޅާ މަރާ މައްސަލަ ފުލުހުންގެ ސަމާލުކަމަށް ގެނެސް އެމައްސަލަ ސީރިޔަސް މައްސަލައެއްގެ ގޮތުގައި ފުލުހުން ބަލަންވެސް ބަލާފައިވެ އެވެ. ނަމަވެސް ދައްކަން މިއުޅެނީ އަދި އެވާހަކަ އެއް ނޫނެވެ.
މާލެ ސިޓީގައި ބުޅާ ގިނަވެގެން ސިޓީ ކައުންސިލުން މިވަނީ މާލޭ ސިޓީގައި ބުޅާ ގެންގުޅޭނެ ތަނެއް ނުވަތަ "ކެޓް ޝެލްޓާ" އެއް ހަދާނަމަ އެތަން ހަދަން އެންމެ އެކަށީގެންވަނީ ކޮންތަނެއްތޯ ބެލުމަށް އާންމުންގެ ހިޔާލު ހޯދަން ހުޅުވާލާފަ އެވެ.
މާލެ ސިޓީގެ އޮފިޝަލް ޓްވިޓަރ އެކައުންޓުން ކޮށްފައިވާ މިޓްވީޓަށް ލިބިފައިވާ ޚިޔާލުތަކަށް ބަލާލާއިރު މާލޭގެ މަގުތަކުގައި އުޅޭ ބުޅާތަކުގެ ކަންތައް ހައްލުކުރަން ރައްޔިތުން ބޭނުންވާ މިންވަރު ހާމަވެގެންދެ އެވެ. އެއް ބަޔަކު ގަބޫލުކުރާ ގޮތުގައި ބުޅާ ގެންގުޅެން އެންމެ ރަނގަޅުވާނީ ވިލިމާލެ ނުވަތަ ހުޅުމާލެއެވެ.
މާލޭ ސިޓީ ކައުންސިލުން މިކަމަށް ރައްޔިތުންގެ ޚިޔާލު ހޯދުމަށް ހުޅުވާލުމާއި ގުޅިގެން ރާއްޖެ އެމްވީން މާލެ ސިޓީގެ މޭޔަރ ޝިފާ މުހައްމަދު އާއި މިކަމާއި ގުޅޭގޮތުން ވާހަކަ ދައްކާލީމެވެ. ޝިފާ ވިދާޅުވީ އާންމުންގެ ޚިޔާލު ހޯދުމަށް ހުޅުވާލީ މިކަމާމެދު އާންމުންގެ ޝަކުވާ ސިޓީ ކައުންސިލަށް އަންނަމުންދާތީ ކަމަށެވެ. ބައެއް ރައްޔިތުން ބުޅަލުގެ ސަބަބުން އުނދަގޫވެގެން ޕެޓިޝަންތައް ހުށަހަޅާފައި ވާ ކަމަށް ޝިފާ ވިދާޅުވި އެވެ. އެހެންކަމުން ކަމާބެހޭ ފަރާތްތަކާއި ސިޓީ ކައުންސިލުން ބައްދަލުކޮށް މިކަމަށް ހައްލެއް ހޯދަންޖެހޭ ކަމަށް ދަންނަވާފައިވާނެ ކަމަށް ޝިފާ ވިދާޅުވި އެވެ.
ބައެއް މީހުން ބަލަހައްޓައިގެން ވަރަށް ލޯބިން ގެންގުޅޭ އެއްޗެއް. އަނެއްކޮޅުން ވާގޮތަކީ އެއެއްޗެތި ބަލިވެ މަގުމައްޗަށް ދޫކޮށްލާ ހާލަތްތައްވެސް އެބައާދޭ. އެހެންނޫނަސް މަގު މަތީގައި އުޅޭ ބުޅާ ވެސް އުޅޭ. ކޮންމެ ގޮތެއްވިޔަސް މިއެއްޗިއްސަށް ގޮތެއް ހޯދައިދޭން ޖެހޭ. މާލޭގެ ރައްޔިތުންގެ ޝަކުވާއަކީ ކަންބޮޑުވާނެ ޝަކުވާއެއް. ކައުންސިލް އެކި ފަހަރު މަތިން އެކި ފަރާތްތަކާއި ބައްދަލުކޮށް މިކަމުގައި އަވަސް ހައްލެއް ހޯދަންޖެހޭކަމަށް ވާނީ ދަންނަވާފައި. ދެން އެގްރިކަލްޗަރުން ބުޅާ ޝެލްޓަ ކުރާނެ ކަމަށް ބުނެ އެކަން ކޮށްދެއްވާނެ ކަމަށް ވިދާޅުވެފައިވަނީ. އެހެންނަމަވެސް ހުރިހާ އެއްޗެއް ގެންގޮސް އެއްތަނަކަށް ލާން އެބަޖެހޭ.މާލެ ސިޓީގެ މޭޔަރ ޝިފާ މުހައްމަދު
ކޮންމެ އަކަސް ހުރިހާ ބުޅާތައް އެއް ތާކަށް ޖަމާކޮށްގެން ނޫނީ ކަމާބެހޭ ފަރާތްތަކަށް މިބުޅާތައް ބެލެހެއްޓޭ ކަށް ނެތެވެ. އެހެންކަމުން ސިޓީ ކައުންސިލުން މިހާރު އަންނަނީ މިކަމުގައި މަޝްވަރާ ކުރަން ސިޓީ ކައުންސިލަށް އައި ގްރޫޕްތަކާއި މިކަމުގައި ކަންބޮޑުވާ ފަރާތްތަކާ މަޝްވަރާ ކުރުމަށްފަހު މިކަމަށް ގޮތެއް ނިންމުމަށް ތައްޔާރުވަމުންނެވެ. ޝިފާ ވިދާޅުވީ މިކަމަކީ ކޮންމެހެންވެސް މިހާރު ކުރަންޖެހިފައިވާ ކަމެއް ކަމަށާއި އެހެން ކަމުން މިމަސައްކަތް ފަށާނެ ކަމަށެވެ.
އެއަށްފަހު ދެން ހުންނަ މައްސަލަތަކަށް ހައްލު ހޯދުމަށް މަސައްކަތް ކުރައްވާނެ ކަމަށް ޝިފާ ވިދާޅުވި އެވެ.
ދެން މިކަމުގައި މަޝްވަރާ ކުރަން އައި ގްރޫޕްތަކެއް އެބަވޭ. އެހެންވީމާ އެމީހުންނަށް ބޮޑަށް އަޅުގަނޑުމެން ހުޅުވާލާއިގެން އެމީހުންނާ ވާހަކަ ދައްކައިގެން އެކަމަށް ހައްލެއް ލިބޭތޯ ބަލާނަން. ވަކި ސަރަހައްދުތަކެއް އެބަހުރި ވަރަށް އެމައްސަލަ ބޮޑު. އެހެންވީމާ ގަބޫލުކުރެވޭ އެ ސަރަހައްދުތަކުން އެ އެހީ ލިބޭނެ ކަމަށް. އެހާ ލާޖް ސްކޭލެއްގައި މިކަމެއް ނުކުރެވޭނެ ބަޖެޓެއް ނެތީމާ. އެހެންނަމަވެސް ފަށައިގަނެވޭނެ. އެކަމާ އުޅުނީމަ ހައްލު ފެންނާނެ ކަންކަމަށް މިބަލީ. މާބޮޑު ޕްލޭނެއް އޮވެގެންނެއް ނޫނުން މިކަން ކުރަން މިއުޅެނީ. ޕްލޭނެއް އޮވެގެންނެއް ނޫން ބުޅާ ތައް ގިނަވީވެސް މިތާންގައި. ބުޅާ ލުމަށްފަހު ނިމުނީކީ ނޫން. އެއްޗެހި ބަލަންވެސް ޖެހޭ، ކާންދޭންޖެހޭ. އެހެންވީމާ ބުޅާ ދެކެ ލޯބިވާ މީހުން އެހީތެރިކަން ފޯރުކޮށްދޭނެ ކަމަށް ކުރީ ފަހަރު ބުނެފައި އޮތީ.މާލެ ސިޓީގެ މޭޔަރ ޝިފާ މުހައްމަދު
މާލޭގައި ދޫވެގެން މަގުތަކުގައި މިއުޅޭ ބުޅާތައް ގިނަވާ ސަބަބާ މެދު ވާހަކަ ދައްކަމާ ހެއްޔެވެ. ބުޅަލެއް ވިހަނީ ތިން މަހުން އެއް ފަހަރު އެވެ. އެހެންކަމަށްވާނަމަ އަހަރެއްގެ މައްޗަށް ހަތަރު ފަހަރު ބުޅަލެއް ވިހާނެ އެވެ. ބުޅާ ގެންގުޅޭ ބައެއް މީހުން ބުނާގޮތުން ބައެއް ފަހަރަށް ދިހަ ބާރަ ބުޅާ ވެސް ބުޅާ ވިހައެވެ. އެހެންކަމަށްވާނަމަ ބުޅަލުގެ އާބާދީ މަތިވަމުންދާނެ ވަރު އަންދާޒާކޮށްލާށެވެ.
މިކަމަށް އޮތް ހައްލަކީ ވިހެއުން ކޮންޓްރޯލް ކުރުމެވެ. ބޭރު ގައުމުތަކުގައި ބުޅަލުގެ ވިހެއުން ކޮންޓްރޯލުކުރުމަށް ތަފާތު ކަންކަން ކުރެ އެވެ. އެންމެ އާންމުކޮށް ކުރާކަމަކީ "ސްޕޭ" ނުވަތަ "ނިއުޓާ" ކުރުމެވެ. ނުވަތަ ނުވިހާ ގޮތަށް ހެދުމެވެ. އާންމުންގެ ބައެއް ފަރާތްތަކުންވެސް އެގޮތަށް އެކަން ކުރުމަށް ޚިޔާލު ފާޅުކޮށްފައިވެ އެވެ.
އެކަމާ ގުޅޭގޮތުން ވާހަކަ ދައްކަވަމުން ޝިފާ ވިދާޅުވީ ހުރިހާ ބުޅާތައް އެއްތަނަކަށް ލައިފިނަމަ ނުވިހާ ގޮތަށް ބުޅާތަކަށް ހެދޭނެކަމަށް އެގްރިކަލްޗަރ މިނިސްޓްރީން ވިދާޅުވެފައިވާ ކަމަށެވެ. އަދި މިކަމުގައި ހެލްތު މިނިސްޓްރީގެ އެހީތެރިކަންވެސް ބޭނުންވާ ކަމަށް ޝިފާ ވިދާޅުވި އެވެ.
މިކަމަށް ބަޖެޓްވެސް ބޭނުންވޭ. ރައްޔިތުންގެ ހިޔާލު ހޯދާފައި ބުޅަލާ ބެހޭގޮތުން މިހާރު އެބައުޅޭ ބުޅަލުގެ ރައްކާތެރިކަމާއި މަސައްކަތް ކުރާ ބޭފުޅުންނާއި އަދި ބުޅަލުގެ ސަބަބުން ނުރައްކާތެރި ބަލިތައް ފެތުރޭތީ ކަންބޮޑުވެގެން އެކަންކަމާ ވާހަކަދައްކަވާ ބޭފުޅުންނާއި ދެން ދެބައި ބޭފުޅުން ގެނެސްގެން އަޅުގަނޑުމެންގެ ވިސްނުން މިހުރީ ކޮންމެ ގޮތެއް ވިއަސް މިކަމަށް ހައްލެއް ހޯދައިދޭން ޖެހޭކަން.މާލެ ސިޓީ ކައުންސިލްގެ މޭޔަރ ޝިފާ މުހައްމަދު
މީގެ އިތުރުން ޝިފާ ވިދާޅުވީ މަގުތަކުގައި އުޅޭ ބުޅާތަކާއި މީހުން ގެންގުޅޭ ބުޅާތައްވެސް ވަކިވާން ޖެހޭކަމަށެވެ. ގެންގުޅެން އެތެރެކުރާ ބުޅާތަކަކީ ވަކި ޓެގެއް ނުވަތަ ވަކި ކާޑެއް ހައްދައިގެން ނޫނީ އެތެރެނުކުރާ ބުޅާތަކަކަށް ވާއިރު އެކަން ކުރެވޭނެ ކަމަށް ގަބޫލުފުޅުކުރައްވާ ކަމަށްވެސް ޝިފާ ވިދާޅުވި އެވެ. އަދި މިކަމުގައި ހައްލެއް ހޯދުމަށް ރައްޔިތުންގެ ޝަކުވާތައް ހިމަނައިގެން ކަރުދާހެއް މިހާރު އެކުލަވާލާފައިވާ ކަމަށް ޝިފާ ވިދާޅުވި އެވެ.
ރައްޔިތުންގެ ޝަކުވާ ހިމަނައިގެން ކަރުދާހެއް ލިޔެވިފައިވަނީ. އެ ކަރުދާސް ހެލްތު މިނިސްޓްރީ އާ އެކުގައި ހިއްސާކުރުމުގެ މަރުހަލާގައި މިއުޅެނީ. އެހެންނަމަވެސް އެމަސައްކަތް ކުރަމުންވެސް ވަގުތީ ހައްލެއް ނަމަވެސް އެބަޖެހޭ ރައްޔިތުންނަށް ހޯދައިދޭން. އެހެންވީމާ އެކަމާ އެބައުޅޭ. ރައްޔިތުން އެބަހުރި ތަންތަން ފާހަގަކޮށްފައި. މާލެ އަކީ ހުޅުމާލެވެސް ވިލިމާލެވެސް އެހެންވީމާ އެތަންތަނަށްވެސް ފޯކަސް ކޮށްގެން މިކަން ކުރަން މިޖެހެނީ.މާލެ ސިޓީ ކައުންސިލްގެ މޭޔަރ ޝިފާ މުހައްމަދު
މަގުމަތީގައި އުޅޭ ބުޅާތަކަށް ބައެއް ފަރާތްތަކުން ކާންދިނުމުގެ ކަންކަން ކުރާ ކަމަށާއި ނަމަވެސް އެކަމުގެ ސަބަބުން އެ ސަރަހައްދުތައް ހަޑިވެ، ބަލިތައް ފެތުރި އާންމުންނަށް އުނދަގޫވަމުންދާ ކަމުގެ ޝަކުވާ ކައުންސިލަށް ލިބޭ ކަމަށް ޝިފާ ވިދާޅުވި އެވެ. އެހެންކަމުން އެފަދަ ކަންކަމަށް ނުކުރުމަށް ޝިފާ އެދިވަޑައިގެންނެވި އެވެ.
ބުޅަލުގެ ނަޖިހުން އިންސާނުންނަށް ޖެހޭ ބައްޔެއް ކަމަށްވާ ލާވާ މައިގްރަންސް، މާލެ ސަރަހައްދުގައި އިތުރުވާ ކަމަށް ބައެއް ޑޮކްޓަރުން މީގެކުރިން ވަނީ ބުނެފައެވެ. އެހެންކަމުން ބުޅަލުގެ ސަބަބުން ކުރިމަތިވާ މިފަދަ ކަންކަމުން ސަލާމަތްވުމަށްޓަކައި ބުޅާތަކަށް ރައްކާތެރި މާހައުލެއް ހޯދައިދޭން ހިނގާށެވެ. އެކަމަށް ސިޓީ ކައުންސިލް އޮތީ ތައްޔާރަށެވެ. ބޭނުންވަނީ އާންމުންގެ ޚިޔާލެވެ.
