ގުންޑޮގާން ގެންނަން ސިޓީން މަސައްކަތް ކުރަނީ

ބާސެލޯނާ އަށް ކުޅެމުން އަންނަ ޖަރުމަނުގެ އިލްކާއީ ގުންޑޮގާން ގެނައުމަށް، އޭނާގެ ކުރީގެ ކުލަބު މެންޗެސްޓަރ ސިޓީން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ސިޓީ އާއެކު ސޮއި ކޮށްފައިވާ އެއްބަސްވުން ހަމަވުމުން، އުމުރުން 33 އަހަރުގެ ކުޅުންތެރިޔާާ ބާސެލޯނާ އަށް ބަދަލުވީ މިދިޔަ އަހަރު އެވެ. ބާސެލޯނާ އާއެކު ގުންޑޮގާން ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގައި ބާކީ އެއް އަހަރު އޮއްވައި، ބާސެލޯނާ އިން ބޭނުން ވަނީ ގުންޑޮގާން ދޫކޮށްލަން ކަމަށް ރިޕޯޓުތައް ބުނެ އެވެ.

މީގެ އިތުރުން ގުންޑޮގާން ވެސް ބޭނުން ވަނީ ބާސެލޯނާ ދޫކޮށް އެހެން ކުލަބަކަށް ބަދަލުވާން ކަމަށް ރިޕޯޓުތައް ބުނެ އެވެ. އެހެންކަމުން، އޭނާގެ ކުރީގެ ކުލަބު މެންޗެސްޓަރ ސިޓީން އަންނަނީ އަލުން އޭނާ ހޯދުމުގެ މަސައްކަތް ކުރަމުން ކަމަށް ވެސް ރިޕޯޓުތައް ބުނެ އެވެ. އެގޮތުން ސިޓީގެ ކޯޗު ޕެޕް ގާޑިއޯލާ ވެސް ހުރީ، ގުންޑޮގާން އެ ކުލަބަށް ގެންނަން ބޭނުން ވެފައި ކަމަށް ރިޕޯޓުތައް ބުނެ އެވެ. އެގޮތުން ސިޓީ އާއި ގާޑިއޯލާ ވަނީ އެކަމާ ގުޅޭ ގޮތުން ގުންޑޮގާންއާ މަޝްވަރާ ކޮށްފައި ކަމަށް ބައެއް ރިޕޯޓިތަކުގައި ބުނެފައިވެ އެވެ.

މީގެ ކުރިން ސިޓީ ގައި ގުންޑޮގާން ހަތް ސީޒަން ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 304 މެޗުގައި 60 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 14 ތައްޓެއް ކާމިޔާބު ކޮށްފަ އެވެ. ސިޓީގެ ކެޕްޓަންކަން ވެސް ކޮށްފައިވާ ގުންޑޮގާން ވަނީ ބާސެލޯނާ އަށް ބަދަލުވެ އެ ކުލަބަށް ކުޅެދިން 51 މެޗުގައި ފަސް ލަނޑު ޖަހައިފަ އެވެ.