ރައީސް ޔާމީނު ރުޅި އަޔަސް ތުރުތުރުއެޅިޔަސް އެހުރީ ސިޔާސީ މައިދާނުން އެކަހެރިކޮށްފައި، ވެރިކަމުގެ ވަސް ދުވާ ހިސާބަކަށްވެސް ނާދެވޭނެ: ފައިސަލް
ރައީސް ޔާމީނަކީ އިންތިހާއަށް ކަންނެތް ބޭފުޅެއްކަމަށްވެސް ވިދާޅުވި
ޓުއަރިޒަމް މިނިސްޓަރު އިބްރާހިމް ފައިސަލް
ކުރީގެ ރައީސް އަބްދުﷲ ޔާމީނަކީ ނުހަނު ބޮޑާ، ކިބުރުވެރި އަދި ކަންނެތް މީހެއްކަމަށް ވިދާޅުވެ މިހާރުގެ ޓޫރިޒަމް މިނިސްޓަރު އިބްރާހިމް ފައިސަލް ޔާމީނަށް ވަރަށް ބޮޑަށް ފާޑު ވިދާޅުވެއްޖެއެވެ.
ދެން އޮންލައިން އިން ގެނެސްދޭ ޕޮޑްކާސްޓުގައި ފައިސަލް ވަނީ ކުރީގެ ރައީސް ޔާމީނަށްވެސް ވަރަށް ބޮޑަށް ފާޑުވިދާޅުވެފައެވެ. އެގޮތުން ރައީސް ޔާމީނު އުޅުއްވަނީ ރައީސް ޑރ މުޙައްމަދު މުއިއްޒު ވެރިކަން ކުރައްވާތަން ބައްލަވަން ކެރިވަޑައިނުގެންކަމަށް ފައިސަލް ވިދާޅުވިއެވެ.
އޭގެ އިތުރުން، ރައީސް ޔާމީނަކީ އެހެން މީހުންނާ ދޭތެރޭގައި އެއްވެސް ވަރަކަށް އިހުސާންތެރިކަމެއް ހުންނަ ބޭފުޅެއް ނޫންކަމަށްވެސް ފައިސަލް ވިދާޅުވިއެވެ.
ފައިސަލް ސިފަ ކުރައްވާ ގޮތުގައި ރައީސް ޔާމީނަކީ ނުހަނު ބޮޑާ، ކިބުރުވެރި ބޭފުޅެކެވެ.
އޭގެ އިތުރުން، ރައީސް ޔާމީނަކީ އިންތިހާއަށް ކަންނެތް ބޭފުޅެއްކަމަށްވެސް ވިދާޅުވެފައެވެ.
އެމޭރުމުން ވާހަކަ ދައްކަވަމުން ފައިސަލް ވަނީ ރައީސް ޔާމީނު ކިތަންމެ ނުރުހުންވެވަޑައިގެންނެވި ނަމަވެސް އެ ހުންނެވީ ސިޔާސީ މައިދާނުން އެކަހެރި ކޮށްފައިކަމަށް ވިދާޅުވެފައެވެ.
އެހެންނަމަވެސް ޕީއެންސީ ވެރިކަމަށް އައިއިރު ފައިސަލްވެސް ވަނީ އެކި ޕޯޑިއަމްތަކުގައި ރައީސް ޔާމީނަށް ނުހަނު ތައުރީފުކޮށް ވާހަކަ ދައްކަވާފައެވެ.
