ދެކުނު ލުބްނާނަށް އިޒްރޭލުގެ ބޯޓުތަކުން ހޮނިހިރު ދުވަހު ބޮން އަޅާ މަދުވެގެން 10 މީހުން މަރާލަފިއެވެ.

ހޮނިހިރު ދުވަހު ލުބުނާންގެ ހެލްތް މިނިސްޓްރީ އިން ބުނެފައިވާ ގޮތުގައި، ދެކުނު ލުބުނާންގެ ނަބާތިޔާ ސިޓީގެ ވާދީ އަލް-ކާފޫރު ގައި ހުރި ދިރިއުޅޭ އިމާރާތަކަށް އިސްރާއީލުން ދިން ހަމަލާއެއްގައި މަދުވެގެން 10 މީހުން މަރުވުމުގެ އިތުރުން، 5 މީހުން ޒަޚަމްވެފައިވާ ކަމަށެވެ.

ލުބުނާންގެ އަލް-މަޔާދީން ޓީވީން ބުނެފައިވަނީ ހަމަލާ ގައި މަރުވެފައިވަނީ ސީރިއާ ގެ ރައްޔިތުންތަކެއް ކަމުގައެވެ.

އިޒްރޭލުން ބުނީ މި ވައިގެ ހަމަލާ އަމާޒުކުރެވުނީ ހިޒްބުﷲ ހަނގުރާމަވެރިން ބޭނުންކުރާ ހަތިޔާރު ރައްކާކުރާ ތަނަކަށް ކަމަށެވެ.

މި ސަރަހައްދުގައި އޮތް ހަލަބޮލިކަން ފާއިތުވި ހަފްތާތަކުގައި ވަރަށް ބޮޑަށް އިތުރުވެފައި މިވަނީ ހިޒްބުﷲ އިން ދިން ކަމަށް އިޒްރޭލުން ގަބޫލު ކުރާ ރޮކެޓް ހަމަލާއެއްގައި އިސްރާއީލުން ހިފާފައިވާ ގޯލަން ހައިޓްސް އިން 12 ކުޑަކުދިންނާއި ޒުވާނުން މަރުވުމާ ގުޅިގެން ނާއި އެކަމަށް ބަދަލު ހިފުމަށް ކަމަށް ބުނެ އިޒްރޭލުން ހިޒްބުﷲ ގެ އިސް ކޮމާންޑަރަކު މަރާލުމާ ގުޅިގެންނެވެ.

ކޮމާންޑަރަށް އަމާޒުކޮށް ދިން ހަމަލާ އާ ގުޅިގެން ހިޒްބުﷲ އިން ބުނެފައިވަނީ ބަދަލު ހިފުމުގެ ޖަވާބު އިޒްރޭލަށް ދޭނެ ކަމުގައެވެ.

ލުބުނާންގެ ސިއްޙީ ވުޒާރާއިން ބުދަ ދުވަހު ޝާއިޢުކުރި މައުލޫމާތުގައިވާ ގޮތުގައި، ފާއިތުވި އަހަރުގެ އޮކްޓޯބަރ 7 ގައި އިޒްރޭލުން ފެށި ޣައްޒާ ހަނގުރާމައާ ގުޅިގެން އިޒްރޭލުން ލުބުނާން އަށް ދޭން ފެށި ހަމަލާތަކުގައި މަދުވެގެން 547 މީހުން ލުބުނާން އިން މަރުވެފައިވެއެވެ. މީގެ ތެރޭގައި 35 އަންހެނުންނާއި 20 ކުޑަކުދިންނާއި ޒުވާނުން ހިމެނެއެވެ.

ސިއްހަތާ ބެހޭ ވުޒާރާއިން އިތުރަށް ބުނެފައިވަނީ 1،765 މީހުންނަށް އަނިޔާވެފައިވާ ކަމަށާއި، 100،000 އަށްވުރެ ގިނަ މީހުން ހަމަލާތަކުން ރައްކައުތެރިކަން ހޯދަން ޤައުމުގެ އެތެރޭގައި ހިޖުރަކޮށްފައިވާ ކަމަށެވެ.