ސްޕެއިންގެ ބާސެލޯނާގައި އޮތް ޓީމާ މެދު އޭނާގެ ފުރިހަމަ ޔަގީން ކަމާއި، އިތުބާރު އޮތް ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

އޭނާ މިހެން ބުނީ މި ސީޒަންގެ ސްޕެނިޝް ލީގުގައި ބާސެލޯނާގެ ފުރަތަމަ މެޗުގައި ވެލެންސިއާއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

އެ މެޗުގެ ކުރިން ވާހަކަ ދައްކަމުން ފްލިކް ބުނީ ވެލެންސިއާއާ ދެކޮޅަށް ކުޅޭ މެޗަކީ ފަސޭހަ މެޗަކަށް ނުވާނެ ކަމަށެވެ. ޚާއްސަކޮށް ވެލެންސިއާ އަކީ އެޓޭކުގައި ވަރަށް ރަނގަޅަށް ކުޅޭ، އަދި އިދިކޮޅު ޓީމަށް ނުރައްކާ ކުރާ ފެންވަރުގެ ޓީމެއް ކަމަށް ވެސް ފްލިކް ބުންޏެވެ.

ވެލެންސިއާއާ ދެކޮޅަށް ކުޅޭ މެޗު އެތައް ގޮތަކުން ޚާއްސަވާ ކަމަށް ވެސް ފްލިކް ބުންޏެވެ. ޚާއްސަކޮށް އެ މެޗަކީ ލީގުގެ ފުރަތަމަ މެޗު ކަމަށް ވާއިރު، އެ މެޗުން މޮޅުވުމުގެ އަޒުމުގައި މުޅި ޓީމު އޮތް ކަމަށް ވެސް ފްލިކް ބުންޏެވެ. މޮޅަކުން ލީގު ފަށައި، ޓީމުގައި ޕޮޒިޓިވް ރޫޙެއް އޮންނަން ވެސް ފްލިކް ބޭނުންވެ އެވެ.

މީގެ އިތުރުން ފްލިކް ބުނީ ބާސެލޯނާގެ ޓީމާ މެދު އޭނާގެ އިތުބާރާއި ފުރިހަމަ ޔަގީންކަން އޮތް ކަމަށެވެ. ޚާއްސަކޮށް މިވަގުތު ވެސް ބާސެލޯނާގައި ރަނގަޅު ރޫޙެއް އޮތް ކަމަށާއި، ޙާސިލު ކުރަން ބޭނުންވާ ކަންކަން ޓީމުގެ ހުރިހާ ކުޅުންތެރިންނަށް ވެސް އިނގޭނެ ކަމަށް ފްލިކް ވަނީ ބުނެފަ އެވެ.

ވެލެންސިއާގެ ދަނޑުގައި ބާސެލޯނާ އިން އެ ޓީމާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ދަންވަރު ރާއްޖެ ގަޑިން 12:30 ވާއިރު އެވެ.