އެރިކްސަންގެ އެއްބަސްވުން އާކުރާނެކަމުގެ ޔަގީންކަން ޓޮޓެންހަމްއަށް އެބައޮތް

ޓޮޓެންހަމް ހޮޓްސްޕާއަށް ކުޅެމުން އަންނަ ޑެންމާކްގެ އެޓޭކިން މިޑްފިލްޑަރ ކްރިސްޓިއަން އެރިކްސަން އެ ކްލަބާ އެކު ހަދާފައިވާ އެއްބަސްވުން އާކުރާނެކަމުގެ ޔަގީންކަން ޓޮޓެންހަމްއަށް އެބަ އޮތް ކަމަށް ރިޕޯޓްތައް ބުނެފިއެވެ.

ގޯލްޑޮޓްކޮމް އިން ބުނީ، ޓޮޓެންހަމްއާ އެކު އެރިކްސަން ހަދާފައިވާ އެއްބަސްވުން ކުރިޔަށް އޮތް ސީޒަނަށް ފަހު ހަމަވާއިރު، އާ އެއްބަސްވުމާ އެކު އެރިކްސަންއަށް މިހާރު ލިބެމުން އަންނަ މުސާރަ ދެގުނަވާނެ ކަމަށެވެ. އޭނާއަށް މިހާރު ލިބެނީ ހަފްތާއަކު 75،000 ޕައުންޑެވެ.

ބައެއް ރިޕޯޓްތައް ބުނާ ގޮތުން މި ސީޒަނަށް ފަހު އުމުރުން 26 އަހަރުގެ އެރިކްސަން އެހެން ކްލަބަކަށް ބަދަލުވާނެއެވެ. އޭނާ ހޯދުމަށް ބާސެލޯނާ އަދި ރެއާލް މެޑްރިޑުން ވެސް އަންނަނީ މަސައްކަތް ކުރަމުންނެވެ.

މީގެ އިތުރުން މެންޗެސްޓާ ޔުނައިޓެޑުން ވެސް އެރިކްސަން ހޯދުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ. އަދި އެއީ ޔުނައިޓެޑުގެ ކޯޗު ސޯލްޝެއާގެ ކުރިޔަށް އޮތް ސީޒަނަށް އަމާޒުކޮށް ކުޅުންތެރިން ހޯދުމުގައި ޓާގެޓެއް ކަމަށް ވެސް ރިޕޯޓްތައް ބުނެއެވެ.

އަޔެކްސް އިން 2009 ވަނަ އަހަރު ކެރިޔަރު ފެށި އެރިކްސަން ޓޮޓެންހަމް އަށް ބަދަލުވީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 266 މެޗުގައި 64 ލަނޑު ކާމިޔާބު ކޮށްފައެވެ.

ޓޮޓެންހަމްއާ އެކު ލީގް ކަޕްގެ ދެވަނަ 2014 ވަނަ އަހަރުގެ ސީޒަނުގައި ހޯދި އެރިކްސަން ވަނީ ޓޮޓެންހަމްގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދާފައެވެ.

މީގެ އިތުރުން ހަތަރު ފަހަރު ޑެންމާކްގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ އެރިކްސަން ވަނީ ގައުމީ ޓިމަށް ކުޅުނު 87 މެޗުގައި 26 ލަނޑު ކާމިޔާބުކޮށްފައެވެ.