ރިސޯޓު ހިންގަން ކުއްޔަށް ދޫކޮށްފައިވާ ރަށްތަކާއި ފަޅުތަކާއި ބިންތައް ކުއްޔަށް ދޫކޮށްފައިވާ މުއްދަތު އިތުރުކުރަން ފައިސާ ދައްކަން ލިބޭ މުއްދަތު ކުޑަކުރަން ޓޫރިޒަމް ގާނޫނު ބަދަލުކުރަން ރައްޔިތުންގެ މަޖިލީހަށް ފޮނުވި ބިލުގެ މަސައްކަތް މަޖިލީހުގައި ދިޔަ ގޮތް ނިކަން ބައްލަވާލައްވާށެވެ. އަވަސް އަރުވާލައިގެން އެ މަސައްކަތް ނިންމާލީ ގޮން ބަޔަކަށް މަންފާތައް ހޯދާދޭންތޯ ސުވާލު އުފެދެއެވެ. އެ ފައިދާ ދައްކަން ލިބޭ މުއްދަތު ދެ އަހަރުން ހަ މަހަށް ހަމަޖައްސަން އެހާ ބޮޑަށް މުހިންމުވަނީ ކީއްވެތޯ ސުވާލު އުފެދެއެވެ.
ޓޫރިޒަމް ގާނޫނަށް ސަރުކާރުގެ ފަރާތުން، ދަނގެތި ދާއިރާގެ މެމްބަރު އަބްދުﷲ ރަޝީދު ހުށަހެޅި އިސްލާހުގައި ވަނީ ކުލި މުއްދަތު އިތުރުކުރުމާ ގުޅޭ މާއްދާތަކަށް ބަދަލު ގެނައުން އެކަންޏެވެ. އެހެންކަމުންމިއީ ވަރަށް ބޮޑަށް ވަކި ކަމަކަށް ޓާގެޓްކޮށްގެން ހުށަހެޅި ބިލެކޭ ބުނުމުގެ ފުރުސަތު އެބަ އޮތެވެ. މި ބިލުގެ ޓައިމްލައިނަށް ބަލާލަމާތޯއެވެ؟ މި ބިލުގެ ފުރަތަމަ ކިޔުން އިއްވީ އޮގަސްޓު 13ގައެވެ. މީގެ ކުރިން އާއްމުކޮށް މަޖިލީހުގެ ޖަލްސާތައް ބުރާސްފަތި ދުވަހު ނުބޭއްވި ނަމަވެސް މިއަދު ވަނީ މި ބިލުގެ މަސައްކަތް ކުރުމަށް ޖަލްސާއެއް ބާއްވާފައެވެ. މި ވެސް ސުވާލު އުފެދޭ ކަމެއް ނޫންތޯއެވެ.
ދެން އޮތް ކަމަކީ ބުރާސްފަތި ދުވަހުގެ ޖަލްސާގައި އިބްތިދާއީ ބަހުސް ހެނދުނު 09:00 ގައި ފަށައި ގާތްގަނޑަކަށް ދޮޅުގަޑިއިރުވަންދެން ބަހުސް ކުރެއްވުމަށް ފަހު ނެގި ވޯޓުގައި 75 މެންބަރުންގެ ވޯޓާއި އެކު ބިލު ބަލައިގަތުމެވެ. މި ބިލު ފާސްކުރަން ސަރުކާރުން ގަދަފައި ހިއްޕާފައި ވަނީ ކޮން ބަޔަކު ރުއްސަންތޯއެވެ. ހަމަ ގައިމު ވެސް މިއަށް ވުރެ އާއްމުންނަށް މުހިންމުކަންކަން މިހާރުވެސް މަޖިލީހުގައި އެބަހުއްޓެވެ. އެހެންކަމުން މަޤްސަދަކީ ކޮބާތޯ އެންމެންވެސް ދަނީ ސުވާލު އުފައްދަމުންނެވެ. ފަހަރުގައި މިއީ ނުފޫޒު ގަދަ ބޭފުޅެއް ނޫނީ ބޭފުޅުންކޮޅެއްގެ ހިތްޚަލާސް ހޯދަން ކުރިކަމަށް ވެދާނެއެވެ.
މި މަޖިލީހުން މިހާ އަވަހަށް ވެސް ބިލުތަކުގައި ރަބަރު ސްޓޭމްޕް ޖަހައޭ ބުނަނީ ކަމެއް ވީމައެވެ. ކުރިން މި ބުނި ވޯޓަށް ފަހު މަޖިލީހުގެ ރައީސް ރިޔާސަތުގައި އިންނަވައިގެން ބިލުގެ މަސައްކަތް ކުރުމަށް މުޅި މަޖިލީހުގެ ކޮމިޓީ ފެއްޓެވީއެވެ. މިއަދު އެކަން ކުރުމަށް ހުރަހެއް ނެތެވެ. މެޖޯރިޓީގެ ބޭނުން ހިފަނީ ހެޔޮގޮތުގައޭ މިވަރުވީމަ ބުނެވޭތޯއެވެ؟ ދެން އޮތް ކަމަކީ ލިބުނު ފުރަތަމަ ފުރުސަތުގައި ވާހަކަ ދައްކަވަމުން ފުނަދޫ ދާއިރާގެ މެންބަރު އަހްމަދު މަމްދޫހު އިތުރު ބަހުސަކަށް ނުގޮސް ކޮމިޓީން ބިލު ފާސްކުރުމަށް ހުށަހެޅުއްވުމެވެ. އެހިސާބުން ޝައްކުތައްވީ ހައްތަހާ އިތުރެވެ. އަވަސް އަރުވާލައިގެން ބިލުގެ މަސައްކަތް ކުރިއަށްގެންދާތީ ކަންބޮޑުވުން ފާޅުކުރި މެމްބަރުންނަށް ދިނީ ބީރު ކަންފަތެކެވެ. ފެނިގެން މިދަނީ ފާސްކުރަން ބޭނުން ބިލެއް ވީމަ، ދުވަހުން ދުވަހަށް ވަގުތުން ވަގުތަށް ކަންކަން ނިންމާލާ މަންޒަރެވެ.
