ސްޕެއިންގެ ރެއާލް މެޑްރިޑަށް ބަދަލުވި ފްރާންސްގެ ކެޕްޓަން ކީލިއަން އެމްބާޕޭ ހުރީ ފުރިހަމަ އަށް ތައްޔާރަށް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ފްރާންސްގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު އެމްބާޕޭ ރެއާލަށް ބަދަލުވީ، މިދިޔަ ޖުލައި މަހުގެ ތެރޭގަ އެވެ. ރެއާލާ އެކު އެމްބާޕޭ ސޮއި ކޮށްފައި ވަނީ ފަސް އަހަރު ދުވަހުގެ އެއްބަސްވުމެއްގަ އެވެ. ރެއާލާ އެކު އެމްބާޕޭގެ އެންމެ ފުރަތަމަ މެޗަށް ވާނީ ސްޕެނިޝް ސުޕަ ކަޕްގެ ފައިނަލް މެޗެވެ.
އެ މެޗުގެ ކުރިން ވާހަކަ ދައްކަމުން އަންޗެލޮޓީ ބުނީ އެމްބާޕޭ ހުރީ އެންމެ ފުރިހަމަ އަށް ތައްޔާރަށް ކަމަށެވެ. އެގޮތުން އެމްބާޕޭ އަންނަނީ އޭނާގެ ސަތޭކަ އިންސައްތަ މަސައްކަތް ދައްކަމުން ކަމަށް ވެސް އަންޗެލޮޓީ ބުންޏެވެ. ވަކިން ޚާއްސަކޮށް ފުޓުބޯޅަ އަށް އޮތް ލޯތްބާއި، ރެއާލާ އެކު ކުރިއަށް ދާން ބޭނުންވާ މިންވަރު އެމްބާޕޭ ދައްކަަމުން އަންނަ ކަމަށް ވެސް އަންޗެލޮޓީ ބުންޏެވެ.
އެމްބާޕޭ އާއެކު ރެއާލްގެ ސްކޮޑު އިތުރަށް ވަރުގަދަވެފައިވާއިރު، ރެއާލްގައި ރަނގަޅު އެތައް ކުޅުންތެރިންނެއް އެބަ ތިއްބެވެ. އެކަމަށް އިޝާރާތް ކުރަމުން އަންޗެލޮޓީ ބުނީ، އެހާ ގިނަ ރަނގަޅު ކުޅުންތެރިން ތިބުމަކީ އޭނާގެ ޗުއްޓީ ވެސް ޚަރާބުކޮށްލި ކަމެއް ކަމަށެވެ. އެގޮތުން، ހުރިހާ ވަގުތެއްގައި ކުޅުވާނީ ކޮން ކުޅުންތެރިނެއް ލައްވައިތޯ ވިސްނުމުގައި ގިނަ ވަގުތުތަކެއް ހޭދަކުރަން ޖެހުނު ކަމަށް ވެސް އަންޗެލޮޓީ ވަނީ ބުނެފަ އެވެ.
ރެއާލުން އެމްބާޕޭގެ ސޮއި ހޯދީ އޭނާ ހޯދަން ދެ ފަހަރެއްގެ މަތިން މަސައްކަތް ކުރުމަށްފަހު އެވެ. އެންމެ ފުރަތަމަ އެމްބާޕޭ ހޯދުމަށް ރެއާލުން މަސައްކަތް ކުރި ފަހަރު، ފަހު ވަގުތު އެމްބާޕޭ ނިންމީ ޕީއެސްޖީގައި މަޑު ކުރުމަށެވެ. ނަމަވެސް އޭގެ ފަހުން ދެ ވަނަ ފަހަރަަށް އޭނާ ހޯދުމަށް ކުރި މަސައްކަތުގައި ރެއާލުން ވަނީ ޑީލް ކާމިޔާބު ކޮށްފަ އެވެ.
