އިންޓަ މިލާންގެ އެއްބަސްވުން މާޓިނޭޒް އައު ކޮށްފި

އިޓަލީގެ އިންޓަ މިލާނަށް ކުޅެމުން އަންނަ އާޖެންޓީނާގެ ފޯވާޑް، ލައުޓާރޯ މާޓިނޭޒް އެ ކުލަބާއެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

ރޭސިން ކުލަބު ދޫކޮށް މާޓިނޭޒް އިންޓަ އަށް ބަދަލުވީ 2018 ވަނަ އަހަރު އެވެ. އެފަހަރު އެ ކުލަބާއެކު އޭނާ ސޮއި ކުރި ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާން އޮތީ މިދިޔަ އަހަރުގެ ޖޫން މަހުގެ ނިޔަލަށެވެ. އެ ކުލަބުގެ އެއްބަސްވުން މާޓިނޭޒް ކުރިން ވެސް އައު ކުރިއިރު، އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، އަނެއްކާ ވެސް މާޓިނޭޒްގެ އެއްބަސްވުން އައު ކުރުމަށް އިންޓަ އިން އޮތީ ބޭނުންވެފަ އެވެ.

އިންޓަ އާއެކު މިހާާރު މާޓިނޭޒް އައު އެއްބަސްވުމެއްގައި ސޮއި ކޮށްފައިވާއިރު، މިއަހަރު އެމެރިކާ ގައި ކުރިއަށް ދިޔަ ދެކުނު އެމެރިކާ ފުޓުބޯޅަ މުބާރާތް (ކޮޕާ އެމެރިކާ)ގެ ކުރިން ވެސް މާޓިނޭޒް އޮތީ އިންޓަގެ އެ ހުށަހެޅުން ޤަބޫލު ކޮށްފަ އެވެ. އިންޓަ އާއެކު މާޓިނޭޒް ސޮއި ކުރި އައު އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. އައު އެއްބަސްވުމުގެ ދަށުން އިންޓަ މިލާންގައި މާޓިނޭޒް އަށް ލިބެމުން އަންނަ މުސާރަ ވެސް ބޮޑު ވާނެ އެވެ.

މާޓިނޭޒް ވަނީ މިހާތަނަށް އިންޓަ އަށް ކުޅެދިން 282 މެޗުގައި 129 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ އިޓާލިއަން ލީގު ދެ ފަހަރު، އިޓާލިއަން ކަޕް ދެ ފަހަރު އަދި އިޓާލިއަން ސުޕަ ކަޕް ތިން ފަހަރު ކާމިޔާބުކޮށްފަ އެވެ. މީގެ އިތުރުން ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގުގެ ފައިނަލްގައި ވެސް ކުޅެފައިވެ އެވެ.