ފީފާ އިން ރާއްޖޭގެ ފުޓްބޯޅަ އެސޯސިއޭޝަން ހިންގަން އައްޔަންކުރާ ނޯމަލައިޒޭޝަން ކޮމިޓީގެ ޗެއާމަންކަން ދޭނީ ކުރީގެ ޔޫތު މިނިސްޓަރު އަހުމަދު ޒުހޫރަށް ކަމުގައި ވަރަށް ބޮޑަށް ބެލެވެން ފަށައިފި އެވެ.

ކުރީގެ ރައީސް އަބަދުﷲ ޔާމީންގެ ވެރިކަމުގައި ހޯމް މިނިސްޓަރު ކަމުގެ އިތުރަށް ހެތްލް މިނިސްޓަރުކަމާއި ކުޅިވަރާ ބެހޭ ވަޒީރުކަން ވެސް ކުރެއްވި ޒުހޫރަށް ނޯމަލައިޒޭޝަން ކޮމިޓީގެ ޗެއާމަންކަން ފަހިކޮށްދޭ ބޭފުޅަކީ ޖަނާހެވެ. މިހާރު ބެލެވިފައިިވަނީ ނޯމަލައިޒޭޝަން ކޮމިޓީގެ އެއްވެސް މަގާމަކަށް ޖަނާހް ވަަޑައިނުގަންނާނެ ކަމަށެވެ. ފީފާގެ ރައީސް ޖިއާނީ އިންފަންޓީނޯއާ ގާތް ގުޅުމެއް ބާއްވާ ޖަނާހަކީ ރައީސް ޑރ. މުހައްމަދު މުއިއްޒުގެ އެންމެ އިސް އެޑްވައިޒަރު ވެސްމެ އެވެ. ޒުހޫރު އެންމެ ފަހުން ހުންނެވީ މި ސަރުކާރުގެ އެޗްޑީސީގެ ޗެއާމަނަކެވެ. އޭނާ މަގާމުން އިސްތިއުފާ ދެއްވީ މަގާމުގައި ފަސް މަސް ހޭދަކުރުމަށްފަހު މިދުޔަ ޖޫން މަހު އެވެ.

ޒުހޫރާއެކު ނޯމަލައިޒޭޝަން ކޮމިޓީ މިހަފުތާގައި ފީފާއިން އިއުލާނުކުރާނެ ކަމަށް ވަނީ ބެލެވިފަ އެވެ. މި ކޮމިޓީގައި ތިބޭނެ ކަމަށް ބެލެވެނީ ފަސް މެމްބަރުންނެވެ. މީގެ ތެރޭގައި ހިމެނެނީ ޒުހޫރާއި ދެ ގާނޫނީ ވަކީލުންނާއި ތަޖުރިބާކާރު ގޯލްކީޕަރު އިސްމާއީލް ޒަރިޔަންދާއި އެފްއޭއެމުގެ ކޮންސަލްޓަންޓް މުހައްމަދު އާދަމެވެ. ގާނޫނީ ވަކީލުންގެ ތެރެއިން އެއް ބޭފުޅަކީ މަޝްހޫރު ވަކީލު އަހުމަދު މުއިއްޒެވެ.

ނޯމަލައިޒޭޝަން ކޮމިޓީ އަށް ފީފާއިން ވަނީ ވަރަށް ގިނަ ބާރުތަކެއް މަތިކޮށްފަ އެވެ. މީގެ ތެރޭގައި އެފްއޭއެމުގެ ވެރިން ހިޔާނާތްވެފައިވާ ފައިސާ ރާއްޖޭގެ ގާނޫނޫ އޮނިގަނޑުގެ ތެރެއިން އަނބުރާ ހޯދުމާއި ފީފާގެ އޮޑިޓް އަދި ކޮމްޕްލަޔަންސް ކޮމިޓީގެ ފާހަގަކޮށް އަންގާފައިވާ ކަންކަން ތަންފީޒުކުރުމާއި އެފްއޭއެމުގެ އަސާސީ ގަވާއިދު އިސްލާހުކޮށް އިންތިހާބު ބޭއްވުން ހިމެނެ އެވެ.

ފީފާއިން ނޯމަލައިޒޭޝަން އައްޔަންކުރަނީ ގިނަވަގެން އެއް އަހަރު ދުވަހަށެވެ. މި ކޮމިޓީގެ މެމްބަރުންގެ މުސާރައަކަކީ 4000 ޑޮލަރާއި 6000 ޑޮލަރާ ދެމެދެވެ. އެފްއޭއެމް ނޯމަލައިޒް ކުރަން ނިންމީ އެ އިދާރާގެ އިންތިހާބު ދެ ފަހަރު މަތިން ނުބޭއްވި ގޮސް ގާނޫނީ އަދި އެޑްމިނިސްޓްރޭޓިވް ހުސްކަމަކަށް އައުމާއި މާލީ އޮތުން އެފްއޭއެމަށް ކޮރަޕްޝަނުގެ ތުހުމަތު ކުރެވި، ފީފާއިން ދީފައިވާ 1 މިލިއަން ޑޮލަރުގެ ލޯނު ފައިސާގެ މައްސަލާގައި ރައީސް ބައްސާމް އަދީލް ޖަލީލް ސަސްޕެންޑްކުރުމާއެކުގަ އެވެ.