މޯލްޑިވްސް އޮލިމްޕިކް ކޮމިޓީގެ އިންތިހާބު އަންނަ މޭ މަހުގެ 5 ވަނަ ދުވަހު ބާއްވަން ނިންމައި އެކަން ގެޒެޓްކޮށްފި އެވެ.

އަންނަ މަހުގެ ފަސްވަނަ ދުވަހު އޮލިމްޕިކް ކޮމިޓީގެ އިންތިޚާބު ބާއްވާން ނިންމާފައިވާއިރު، އެ އިންތިޚާބުގައި ވާދަކުރައްވާނެކަން ރަސްމީކޮށް އިއުލާން ކުރައްވާފައިވަނީ ދެ ފަރާތަކުންނެވެ.

ރާއްޖޭގެ ކުޅިވަރުގެ އެންމެ ޝަރަފްވެރި އިދާރާގެ އިންތިޚާބުގައި ވާދަ ކުރައްވާނެކަން މިހާތަނަށް އިއުލާން ކުރައްވާފައިވާ ދެ ބޭފުޅުންނަކީ މިހާރުވެސް އެކޮމިޓީގެ ރައީސް މުހައްމަދު ޝަވީދު އާއި މިދިޔަ ދެ ދައުރުގެ ސެކްރެޓަރީ ޖެނެރަލް އަހުމަދު މަރްޒޫގު (މަރޭ)އެވެ.

އޮލިމްޕިކް ކޮމިޓީއަށް އިންތިޚާބުކުރާ މަގާމްތަކަކީ ރައީސް، ނައިބް ރައީސް، ސެކްރެޓަރީ ޖެނެރަލް، ހަޒާންދާރު، އޮލިމްޕިކް ޓީމް ސްޕޯޓްސް އަށް ދެ މަގާމެވެ.

މީގެ އިތުރުން އޮލިމްޕިކް އިންޑިވިޖުއަލް ސްޕޯޓްސް އަށް ތިން މަގާމް، ނޮން އޮލިމްޕިކް ސްޕޯޓްސް އަށް ދެ މަގާމް އަދި ދެ އަންހެން މެމްބަރުން އިންތިޚާބުކުރާ މަޤާމްތަކުގައި ތިއްބަވައެވެ.

އަންނަ މަހުގެ 5 ވަނަ ދުވަހަށް އޮލިމްޕިކް ކޮމިޓީގެ އިންތިޚާބު ބޭއްވުމަށް ނިންމާފައިވާއިރު މަޤާމުތަކަށް ކުރިމަތިލުމުގެ އެންމެފަހުގެ ތާރީޚަކީ މި މަހުގެ 23 އެވެ.

އޮލިމްޕިކް ކޮމިޓީގެ މަޤާމަކަށް ކުރިމަތިލައްވަން ބޭނުންވާ ފަރާތްތަކުން ނަން ހުށަހަޅަން ޖެހޭނީ ކޮމިޓީގެ މެމްބަރު އެސޯސިއޭޝަނެއް މެދުވެރިކޮށެވެ.

ތިންވަނަ ދައުރަކަށް އޮލިމްޕިކް ކޮމިޓީއަށް ކުރިމަތި ލެއްވި މަރުޒޫގު ވިދާޅުވީ އަންނަ މަހު ބާއްވާ އިންތިހާބުގައި އިތުރު ދައުރަކަށް ކުރިމަތިލާން ނިންމީ، ބައެއް ފަރާތްތަކުގެ މަޝްވަރާގެ މަތިން ކަމަށެވެ.