އޮލިމްޕިކް ކޮމިޓީގެ އަހަރީ ބައްދަލުވުން ފެށުމަށް ތައްޔާރުވެއްޖެ

ރާއްޖޭގެ އޮލިމްޕިކް ކޮމިޓީގެ އަހަރީ ބައްދަލުވުން ފެށުމަށް ތައްޔާރުވެއްޖެއެވެ.

އެހެން އަހަރުތަކާއި ޚިލާފަށް މިއަހަރުގެ އޮލިމްޕިކް ކޮމިޓީގެ އަހަރީ ބައްދަލުވުން ބާއްވާނީ ބ.ގޮއިދޫގައެވެ. މި ބައްދަލުވުމުގައި ބައިވެރިވުމަށް މިއަދު ބައެއް ފަރާތްތަކުން ގޮއިދޫއަށް ގޮސްފައިވާއިރު އެ ފަރާތްތަކަށް އެ ރަށުން ވަނީ ހޫނު މަރުހަބާއެއް ކިޔާފައެވެ.

ރާއްޖެއެމްވީއަށް މައުލޫމާތު ދެއްވަމުން އޮލިމްޕިކް ކޮމިޓީގެ ޖެނެރަލް ސެކްރެޓަރީ އަހުމަދު މަރުޒޫގު ވިދާޅުވީ އަހަރީ ބައްދަލުވުމަށް ގޮއިދޫއަށް ދިޔަ ފަރާތްތަކަށް އެ ރަށުން ހޫނު މަރުހަބާއެއް ކިޔާފައިވާ ކަމަށާއި މަރުހަބާ ކިޔުމުގައި ރަށުގެ ހުރިހާ ރައްޔިތުން ކަހަލަ ގޮތަކަށް ބައިވެރި ކަމަށެވެ. މަރުޒޫގު ވިދާޅުވީ މި ދުވަސްކޮޅަކީ ރާއްޖެއަށް މޫސުން ގޯސް ދުވަސްވަރެއް ނަމަވެސް އުއްމީދަކީ މާދަމާގެ ބައްދަލުވުން ކާމިޔާބު ގޮތެއްގައި ނިންމާލުން ކަމަށެވެ. އަދި އެކަމަށް ވާންޖެހޭ އެންމެ ފަހުގެ ތައްޔާރީތައް ވަމުންދާ ކަމަށް މަރުޒޫގު ވިދާޅުވިއެވެ.

ގޮއިދޫގައި މި ބައްދަލުވުން ބޭއްވުމަށް ނިންމި ނިންމުމާ ގުޅޭގޮތުން ވާހަކަ ދައްކަވަމުން މަރުޒޫގު ވިދާޅުވީ މީގެކުރިން އެސޯސިއޭޝަންތަކުގެ އަހަރީ ބައްދަލުވުން ބާއްވާފައި ވަނި ވަރަށް ކުޑަ ގޮތެއްގައި ކަމަށެވެ. ރާއްޖޭގެ ކުޅިވަރުގެ ހުރިހާ ސިޔާސަތެއް ކަނޑައަޅާ ފަރާތްތަކާއެކު އެއް ފުރާޅެއްގެ ދަށަށް ޖަމާވެވޭ ހަމައެކަނި ވަގުތަކީ އޮލިމްޕިކް ކޮމިޓީގެ އަހަރީ އާންމު ބައްދަލުވުން ކަމަށްވުމާއެކު، މިއަހަރު ރާއްޖޭގެ ކަންކޮޅުތަކަށް އޮލިމްޕިކް ކޮމިޓީ ގެންދިޔުމުގެ ގޮތުން ހުރިހާ ކަމަކަށް ބެލުމަށް ފަހު އެ ރަށުގެ ރައްޔިތުން އެކަން ކުރިޔަށް ގެންދިޔުމަށް ތިބުމާއެކު އެގޮތަށް ނިންމީ ކަމަށް މަރުޒޫގު ބުނެފައިވެއެވެ.

މި ބައްދަލުވުމުގައި ރާއްޖޭގެ ކުޅިވަރު މައިދާނުގައި ހަރަކާތްތެރިވާ މުހިއްމު ގިނަ ފަރާތްތަކެއް ބައިވެރިވާނެއެވެ.