ބްރެޒިލްގެ އޮލިމްޕިކް ކޮމިޓީގެ ޗެއާމަން ކާލޯސް ނުޒްމަން ހައްޔަރުކޮށްފިއެވެ.

ބްރެޒިލްގެ ރިއޯޑެ ޖެނީރޯގައި 2016 ވަނަ އަހަރު އޮލިމްޕިކް މުބާރަތް ބޭއްވުމަށް ބިޑް ކާމިޔާބު ކުރުމުގެ ގޮތުން ވޯޓު ގަތުމަށް ފައިސާ ހުށަހެޅިކަމުގެ ތުހުމަތުގައި އޭނާ ހައްޔަރުކޮށްފައިވަނީ ބުރާސްފަތި ދުވަހު ބްރެޒިލްގެ ސައޮ ޕައުލޯއިން ކަމަށް ރޮއިޓާސްއިން ރިޕޯޓުކޮށްފައި ވެއެވެ. އޭނާ ހައްޔަރުކޮށްފައިވަނީ މި މައްސަލައާ ގުޅިގެން ބްރެޒިލްގެ ފުލުހުންނާއި އެމެރިކާ އަދި ފްރާންސްގެ ފުލުހުން ގުޅިގެން ކުރިޔަށް ގެންދާ "އޮޕްރޭޝަން އަންފެއާ ޕްލޭ"ގެ ދަށުންނެވެ.

ކާލޯސް ނުޒްމަން މި ހުރިހާ ތުހުމަތުތަކެއް ދޮގުކޮށްފައިވާ އިރު 2016 ވަނަ އަހަރު ބްރެޒިލްގައި ބޭއްވި އޮލިމްޕިކް ކޮމިޓީގެ ޑިރެކްޓާ ޖެނެރަލް، ލިއޮނާޑޯ ގްރައިނާ ވެސް ވަނީ ހައްޔަރުކޮށްފައެވެ. މިދިޔަ ސެޕްޓެމްބަރު މަހު ނުޒްމަންގެ ގެ ބަލާ ފާސްކޮށްފައިވާ އިރު އޭނާގެ ޕާސްޕޯޓް ވެސް ހިފެހެއްޓިއެވެ.

ނުޒްމާންއާ ދެކޮޅަށް ތުހުމަތު ކުރެވިފައިވަނީ އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ގެ ނުފޫޒް ގަދަ މެމްބަރެއް ކަމުގައިވާ ލަމައިން ޑިއަކް އަށް ފައިސާ ހުށަހެޅުމުގެ މެދުވެރިޔެއްގެ ރޯލު އަދާކުރުމުގެ ތުހުމަތެވެ. ރަޝިއާގެ އެތްލީޓުންތަކެއް މަނާބޭސް ބޭނުންކުރި މައްސަލައެއް ފޮރުވަން އުޅުނު ކަމުގެ ތުހުމަތުގައި 2015 ވަނަ އަހަރު ޑިއަކް ވަނީ  ފްރާންސްގެ ޕެރިހުން ހައްޔަރު ކުރެވިފައެވެ.

އުމުރުން 72 އަހަރުގެ ނުޒްމާން ހައްޔަރުކޮށްފައިވާ އިރު އޭނާއަކީ 1995 ވަނަ އަހަރުން ފެށިގެން ބްރެޒިލްގެ އޮލިމްޕިކް ކޮމިޓީގެ ޗެއާމަންއެވެ

.