ލިވަޕޫލަށް ކުޅެމުން އަންނަ ނެދަލެންޑްސްގެ ޑިފެންޑަރު ވާޖިލް ވެން ޑައިކަށް، އެ ކުލަބުން އައު އެއްބަސްވުމެއް ހުށަނާޅާ ކަމަށް އޭނާ ބުނެފި އެވެ.
ސައުތުހެމްޓަންގައި ހުރުމަށްފަހު ވެން ޑައިކް ލިވަޕޫލަށް ބަދަލުވީ 2018 ވަނަ އަހަރު އެވެ. އެ ކުލަބާ އެކު އެންމެ ފަހުން އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވަނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ އެއް އަހަރު އޮތްއިރު، ލިވަޕޫލުން އެއްބަސްވުން އައު ކުރުމުގެ ވިސްނުން ގެން ގުޅޭ ކަމަށް ރިޕޯޓުތައް ބުނެ އެވެ.
އެކަމާ ގުޅޭ ގޮތުން ވާހަކަ ދައްކަމުން ވެން ޑައިކް ބުނީ މިހާތަނަށް އެއްވެސް ކަމަކަށް ބަދަލެއް އައިސްފައި ނުވާ ކަމަށެވެ. ވެން ޑައިކް ބުނީ އޭނާ އަށް ޤަބޫލު ކުރެވޭ ގޮތުގައި ލިވަޕޫލުން ކުރަންވީ ކަމަކީ، ސީޒަން ކުރިއަށްދާ މުއްދަތަށް ބެލުމަށްފަހު ސޮއި ތަކެއް ހޯދުން ކަމަށެވެ. ފަރުދާގެ ފުރަގަހުގައި ތިބެގެން އެކަމަށް މަސައްކަތް ކުރަމުން އަންނަކަން ފާހަގަކޮށް ވެން ޑައިކް ބުނީ، ކުލަބުން އޭނާ އަށް ދެރަ ގޮތެއް ނުހަދާނެކަން އިނގޭ ކަމަށެވެ. އެކަމުގައި އޭނާގެ ފުރިހަމަ އިތުބާރު ލިވަޕޫލަށް އޮންނަ ކަމަށް ވެސް ވެން ޑައިކް ބުންޏެވެ.
ވެން ޑައިކް ވަނީ ލިވަޕޫލް ގައި ހޭދަކޮށްފައިވާ ހަތް ސީޒަންގެ ތެރޭގައި އެ ކުލަބަށް ކުޅެދިން 270 މެޗުގައި 33 ލަނޑު ޖަހައިފަ އެވެ. ލިވަޕޫލާ އެކު އޭނާ ވަނީ އަށް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ.
