ރަޝިޔާގެ ހަމަލާއެއްގައި ކީވްގައި ދެމީހަކު މަރުވެއްޖެ
ރަޝިޔާގެ ކާސްކް ސަރަޙައްދަށް ޔޫކްރެއިން އިން އެރުމުގެ ބަދަލު ހިފުމުގެ ގޮތުން ރަޝިޔާއިން އިތުރު ހަމަލާތަކެއް ދޭނެކަމަށް ޔޫކްރެއިން އިން ދަނީ ތައްޔާރުވަމުންނެވެ.
ރަޝިޔާގެ މިސައިލް ހަމަލާއެއްގައި ސުންނާފަތިވެފައިވާ ސަރަޙައްދުގައި ހުރެ މީހަކު ފޮޓޯ ނަގަނީ
ޔޫކްރެއިންގެ އޮފިޝަލުން ބުނާގޮތުގައި ހޮނިހިރު ދުވަހުގެރޭ ރަޝިޔާއިން ދިން ވައިގެ ހަމަލާއެއްގައި ކީވްގެ ބޭރުގައި މަދުވެގެން ދެމީހަކު މަރުވެ، އިތުރު ތިންމީހަކު ޒަޚަމްވެއްޖެއެވެ.
އަނެއްކޮޅުން އާދިއްތަ ދުވަހު ކީވްގެ އިރުމަތީ ސަރަހައްދުގައި ރަޝިއާ އިން ދިން ހަމަލާގައި 4 އަހަރުގެ ކުޑަ ކުއްޖަކާއި އޭނާގެ 35 އަހަރުގެ ބައްޕަ މަރުވެފައިވާކަމަށް ރައީސް ވުލެޑިމިއަރ ޒެލެންސްކީ ވިދާޅުވެފައިވެއެވެ. މި ހަމަލާގައި ބޭނުންކޮށްފައިވަނީ އުތުރު ކޮރެއާއިން އުފައްދާފައިވާ މިސައިލެއްކަމަށް އޭނާ ވިދާޅުވިއެވެ.
އެކްސް ގައި ކުރެއްވި ޕޯސްޓެއްގައި ޒެލެންސްކީ މަރުވި ދެމީހުންގެ އާއިލާއަށް ވަނީ ހަމްދަރުދީ ފާޅު ކުރައްވާފައެވެ.
މި ހަމަލާއާ ގުޅޭގޮތުން ރަޝިޔާއިން މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ކީވްގެ އެއަރފޯސް އިން ބުނާގޮތުގައި ހޮނިހިރު ދުވަހުގެ ރޭ ރަޝިޔާއިން ދިން ހަމަލާގައި ޔޫކްރެއިންގެ އެކި ސަރަހައްދުތަކަށް އީރާނުން އުފެއްދި 57 ޑްރޯން އަމާޒް ވެފައިވެއެވެ. އޭގެ ތެރެއިން 53 ޑްރޯން ވައިގެ ދިފާޢީ ބާރުން ނައްތާލި ކަމަށް ޔޫކްރެއިން އިން ބުނެފައިވެއެވެ.
ޒެލެންސްކީ ޔޫކްރެއިންގެ އެކުވެރިންނަށް ގޮވާލައްވާފައިވަނީ "ހުރިހާ ސިޓީތަކާއި މުޖުތަމަޢުތައް ރައްކާތެރި ކުރެވޭނެ ފުރިހަމަ އެއަރ ޝީލްޑް ނިޒާމެއް" ޔޫކްރެއިން އަށް ފޯރުކޮށްދިނުމަށެވެ.
