ކިއޭޒާއާއެކު 8 ކުޅުންތެރިން ޔުވެންޓަސްއިން ނީލަމަށްލައިފި

ފްރެޑިރިކޯ ކިއޭޒާއާއެކު އިޓަލީގެ ޔުވެންޓަސްގެ އަށް ކުޅުންތެރިއަކު ދޫކޮށްލަން ނިންމައިފި އެވެ.

އަނެއް ހަތް ކުޅުންތެރިންނަކީ ތަޖުރިބާކާރު ކީޕަރު ވޮޝްނިއާ ސިޒެސްނީ އާއި ލީޑްސް ޔުނައިޓެޑްގެ ކުރީގެ މިޑްފީލްޑަރު ވެސްޓޮން މެކްކެނީ އާއި ލިވަޕޫލަށް ކުޅުނު އަރްތޫރޯ މެލޯ އާއި ޕޮލެންޑްގެ ފޯވަޑް އަރްކަންދިއާޒް މިލިކް އާއި އިޓަލީގެ ޑިފެންޑަރުން ކަމަށްވާ މަޓިއާ ޑި ޝިގިލިއޯ އާއި ޑިފެންޑަރު ޑަނިއެލޭ ރުގާނީ އާއި ސާބިއާގެ މިޑްފީލްޑަރު ފިލިޕް ކޮސްޓިކާއި އިޓަލީގެ 24 އަހަރުގެ މިޑްފީލްޑަރު ހަންސް ނިކޮލޫސީ ކަވިގްލިއާ އެވެ.

ޓީމާ އަލަށް ހަވާލުވި ކޯޗު ތިއާގޯ މޮޓާ ބޭނުންވަނީ މި ކުޅުންތެރިން ވިއްކާލުމަށްފަހު ލިބޭ ފައިސާއިން އާ ކުޅުންތެރިން ހޯދައި ޓީމެއް ބިނާކުރާށެވެ. އޭނާ ހަވާލުވިއިރު އިޓާލިއަން ލީގު ޔުވެންޓަސް އަށް ނުލިބެތާ ހަތަރު އަހަރުވެއްޖެ އެވެ. އެއީ މީގެ ކުރިން ޖެހިޖެހިހގެން 9 ފަހަރު ލީގު ޗެމްޕިއަންކަން ހޯދާފައި ވަނިކޮށެވެ.

ވިއްކާލާ ކުޅުންތެރިންގެ ތެރޭގައި ހުރި އެންމެ އަލިގަދަ ތަރިއަކީ ވެސް 26 އަހަރުގެ ކިއޭޒާ އެވެ. ޔޫރޯ 2021 އިޓަލީ އަށް ހޯދައިދިނުމަށް މޮޅަށް ކުޅުނު ކުޅުންތެރިޔާ ވިއްކާލަން ޔުވެންޓަސްއިން ނިންމީ އެ އަހަރުގެ ޔޫރޯގައި ދެއްކި ކުޅުން ޔުވެންޓަސްގެ ޖާޒީގައި ނުދެއްކުމުންނެވެ. އެ މުބާރާތަށް ފަހު ފިއޮރެންޓީނާއިން އޭނާ ޔުވެންޓަސް އަށް ގެންދިޔައީ މަތިވެރި އުއްމީދެއްގަ އެވެ. ނަމަވެސް ކުރީގެ ކުޅުން ނުދެއްކުނު ނަމަވެސް އޭނާ އަށް އިޓަލީގެ އިންޓަމިލާނުން ޝައުގުވެރިވެ އެވެ. އަދި މުސާރަ ކުޑަކޮށްފިނަމަ ސްޕޭނުގެ ބާސެލޯނާ ވެސް އޮތީ ކިއޭޒާ އަށް މަރުހަބާ ކިޔަން ތައްޔާރަށެވެ.

ޔުވެންޓަސްގައި އޭނާ އަށް އަހަރު 7.7 މިލިއަން ޔޫރޯގެ މުސާރައެއް ލިބުނެވެ.