މުރައިދޫގެ ޗީފް އޮފް ސްޓާފްގެ މަގާމަށް ނޫސްވެރިޔާ އާދަމް ހަލީމް އައްޔަން ކުރައްވައިފި
ގާމުގެ މުސާރައާއި އިނާޔާތްތަކާ ގުޅޭ އެއްވެސް ތަފުސީލެއް ހިއްސާކޮށްފައިނުވޭ
މުރައިދޫގެ ޗީފް އޮފް ސްޓާފްގެ މަގާމަށް އައްޔަންކުރެއްވި ނޫސްވެރިޔާ އާދަމް ހަލީމް
ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މުރައިދޫގެ ޗީފް އޮފް ސްޓާފްގެ މަގާމަށް ނޫސްވެރިޔާ އާދަމް ހަލީމް (މުންޑޫ) އައްޔަން ކުރައްވައިފިއެވެ.
މި މަގާމަށް އާދަމް ހަލީމް އައްޔަންކުރެއްވިކަން ރައްޔިތުން މަޖިލީހުން ވަނީ ޔަގީންކޮށްދީފައެވެ. ނަމަވެސް މަގާމުގެ މުސާރައާއި އިނާޔާތްތަކާ ގުޅޭ އެއްވެސް ތަފުސީލެއް ހިއްސާކޮށްފައިނުވެއެވެ. އޭނާ މިމާގަމަށް އައްޔަން ކުރައްވާފައިވަނީ ރައްޔިތުންގެ މަޖިލީހުގެ ރައީސަށް ލިބިވަޑައިގަންނަވާ ބާރުގެ ދަށުން 28 ޖުލައި 2024 ގައެވެ.
އާދަމް ހަލީމްއަކީ ނޫސްވެރިކަމުގެ ދާއިރާގައި ތަޖުރިބާކާރު ބޭފުޅެކެވެ. ނޫސްވެރިކަމުގެ ދާއިރާއަށް 20 އަހަރަށްވުރެ ގިނަ ދުވަހު ޚިދުމަތްކުރައްވާފައިވާއިރު، އޭނާ ވަނީ އެ ދާއިރާއިން އާންމު ޚިދުމަތުގެ އިނާމާއި ރަން ގަލަން ވެސް ހާސިލުކުރައްވާފައިވެއެވެ.
ރާއްޖޭގެ ގިނަ މީޑީއާތަކެއް އެޑިޓަރެއްގެ މަގާމު އާދަމް ހަލީމް ފުރުއްވާފައިވެއެވެ. އަދި އޭނާ ވަނީ "ދަ މިރަ"ގެ ނަމުގައި އަމިއްލަ ނޫހެއް އުފައްދަވާފައެވެ.
ރައްޔިތުން މަޖިލިހުގެ ރައީސަށް ދައުލަތުން ޚާއްސަ ކޮށްފައިވާ ގެކޮޅު މުރައިދޫގެ އަށް، މަޖިލީހުގެ ރައީސް އަބްދުއްރަހީމް އަބްދުﷲ ދިރިއުޅުއްވުން ބަދަލުކުރައްވާފައިވަނީ 26 ޖުލައި 2024 ގައެވެ. އެގެއަށް އެމަނިކުފާނު ބަދަލުވެވަޑައިގެންނެވީ މަރާމާތުކޮށް ނިމުމުންނެވެ.
ރާއްޖޭގެ އިގްތިސާދު ވަރަށް ބޮޑަށް ދަށަށް ގޮސްފައިވާ ކަމަށް ބުނެ ސަރުކާރުން ދަނީ ހަރަދު ކުޑަ ކުރުމުގެ ގޮތުން ބައެއް ފިޔަވަޅުތައް އަޅަމުންނެވެ. އެގޮތުން ސަރުކާރުގެ މުވައްޒަފުން ރާއްޖެއިން ބޭރަށް ދާ ތަމްރީން ޕްރޮގްރާމްތައް ހުއްޓުވާފައިވާއިރު، ސަރުކާރު ހިއްސާ އޮންނަ ގިނަ ކުންފުނިތަކުން މުވައްޒަފުން ވަޒީފާއިން ދަނީ ވަކިކުރަމުންނެވެ. ނަމަވެސް ސަރުކާރުގެ ސިޔާސީ މަގާމުތަކަށް ބޭފުޅުން އައްޔަން ކުރެއްވުން މަދެއް ނުވެއެވެ.
