ބަންގްލަދޭޝްގެ ވަގުތީ ސަރުކާރުގެ ވެރިޔާގެ މަގާމުގެ ހުވައި ނޮބެލް އިނާމު ހާސިލް ކުރައްވާފައިވާ އުމުރުފުޅުން 84 އަހަރުގެ މުހައްމަދު ޔޫނުސް ކުރައްވައިފިއެވެ.
އޭނާ މަގާމުގެ ހުވައި ކުރެއްވީ ވެރިރަށް ޑާކާ ގައި ބުރާސްފަތި ދުވަހުގެ ރޭ ބޭއްވި ޚާއްސަ ރަސްމިއްޔާތެއްގައެވެ.
ރަސްމިއްޔާތުގައި ވާހަކަފުޅު ދައްކަވަމުން މަގާމުގެ ޒިންމާ އިޚްލާސްތެރި ކަމާއެކު އަދާ ކުރައްވާނެ ކަމަށާއި، ބަންގްލަދޭޝްގެ ގާނޫނު އަސާސީ ނަގަހައްޓަވާނެ ކަމަށް ޔޫނުސް ވިދާޅުވިއެވެ.
ޔޫނުސްގެ އެންމެ މުހިންމު މަސައްކަތްޕުޅަކަށް ވާނީ ބަންގްލަދޭޝް ގައި އުފެދިފައިވާ ހަމަ ނުޖެހުންތައް ހަމަޔަކަށް އެޅެއްވުމާއި އައު އިންތިޚާބަށް ވާން ޖެހޭ ތައްޔާރުތައް ވުން ކަމަށް ރިޕޯޓްތައް ބުނެއެވެ.
ޔޫނުސް އަށް ޗީފް އެޑްވައިޒަރ ގެ މަގާމުގެ ހުވައި ލައިދެއްވީ ބަންގްލަދޭޝްގެ ރައީސް މުހައްމަދު ޝަހާބުއްދީން އެވެ. ޗީފް އެޑްވައިޒަރގެ މަގާމަކީ ބޮޑުވަޒީރުގެ މަގާމާ އެއް ފެންވަރުގެ މަގާމެއް ކަމަށް ބަންގްލަދޭޝްގެ މީޑިއާ އިން ބުނެފައެވެ.
ރިޔާސީ ގަނޑުވަރުގައި ބޭއްވި ހުވައި ކުރުމުގެ ރަސްމިއްޔާތުގައި ބޭރު ގައުމުތަކުގެ ޑިޕްލޮމެޓުންނާއި، ބަންގްލަދޭޝްގެ ބޮޑެތި ވިޔަފާރިވެރިންނާއި، ސިޔާސީ ޕާޓީ ތަކުގެ ވެރިން ބައިވެރިވެވަޑައިގެންނެވިއެވެ. އެހެން ނަމަވެސް ރަސްމިއްޔާތުގައި އިސްތިއުފާ ދެއްވި ބޮޑު ވަޒީރު ޝޭޚް ހަސީނާގެ ޕާޓީން ބައިވެރިވެފައެއް ނުވެއެވެ.
ޔޫނުސް އެކުލަވާލައްވާ ވަގުތީ ކެބިނެޓްގައި 16 މެމްބަރުން ހިމެނެއެވެ. އޭގެ ތެރޭގައި ގިނައީ ސިވިލް ސޮސައިޓީން ހުށަހެޅި މަންދޫބުން ކަމަށް ވެއެވެ. ވަގުތީ ކެބިނެޓް ގައި ހަސީނާގެ ސަރުކާރާ ދެކޮޅަށް މުޒާހަރާ ކުރި ޔުނިވަރސިޓީ ދަރިވަރުންގެ ތެރެއިން ދެ ލީޑަރުންވެސް ވަނީ ހިމަނާފައެވެ.
ޔޫނުސް އިސްވެ ހުންނަވާ އެކުލަވާލާ ވަގުތީ ސަރުކާރުގެ ކެބިނެޓް ގައި ހިމެނޭ ފަރާތްތައް ކަނޑައަޅާފައިވަނީ ސްޓޭކްހޯލްޑަރުންނާ އެކު ކުރެވުނު މަޝްވަރާތަކަށް ފަހު ކަމަށް ރިޕޯޓްތައް ބުނެއެވެ.
