ޒުވާން ކުޅުންތެރިންނާ މެދު ފްލިކްގެ އިތުބާރު ބޮޑު

ބާސެލޯނާގައި ތިބި ޒުވާން ކުޅުންތެރިންނާ މެދު އޭނާގެ އިތުބާރު ބޮޑު ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

ބާސެލޯނާގެ ކޯޗުކަމާ ފްލިކް ހަވާލުވީ މިއަހަރުގެ މެއި މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި ބާސެލޯނާގެ ލެޖެންޑް، ޒަވީ ހެނާންޑޭޒް ކޯޗުކަމުގެ މަގާމުން ވަކި ކުރަން ކުލަބުން ނިންމުމުންނެވެ. ބާސެލޯނާއާ ހަވާލުވެ، ފްލިކް އަންނަނީ ކުރިއަށް އޮތް ސީޒަނަށް ތައްޔާރުވުމުގެ މަސައްކަތްތައް ކުރަމުންނެވެ.

ފްލިކް ހަވާލުވީ ފަހުން ބާސެލޯނާ އިން ވަނީ މިހާތަނަށް ރަޙުމަތްތެރިކަމުގެ ތިން މެޗު ކުޅެފަ އެވެ. ފުރަތަމަ މެޗުގައި ބާސެލޯނާ އިން ވަނީ މެންޗެސްޓަރ ސިޓީގެ މައްޗަށް ކުރި ހޯދައިފަ އެވެ. ދެ ވަނަ މެޗުގައި ޥާދަވެރި ރެއާލް މެޑްރިޑު ބަލިކުރިއިރު، ތިން ވަނަ މެޗުގައި ވަނީ އޭސީ މިލާން އަތުން ބަލިވެފަ އެވެެ. އެ މެޗުން ބާސެލޯނާ ބަލިވީ ޕެނަލްޓީ ޖަހައިގެންނެވެ.

ސްޕެއިންގެ މީޑިއާއަކާ ވާހަކަ ދައްކަމުން ފްލިކް ބުނީ ބާސެލޯނާގައި ގިނަ ޒުވާން ކުޅުންތެރިންތަކެއް ތިބި ކަމަށާއި، އެ ކުޅުންތެރިންގެ ހުނަރު ވެސް ވަރަށް ގިނަ ކަމަށެވެ. ފާއިތުވި ދުވަސްތަކަށް ބަލާއިރު، ބައެއް ކުޅުންތެރިން ގިނަ ކަންކަން ރަނގަޅު ކޮށްފައިވާ ކަމަށް ވެސް އޭނާ ބުންޏެވެ. ޚާއްސަކޮށް ބާސެލޯނާ އިން ބޭނުންވާ ވައްޓަފާޅި އަށް ކުޅުންތެރިން ހޭނެމުން އަންނަކަން ވެސް އޭނާ ފާހަގަ ކުރި އެވެ.

ބާސެލޯނާ އިން ޕޮޒިޓިވް ގިނަ ކަންތައްތަކެއް ފެންނަ ކަމަށާއި، އޭނާގެ ޚިޔާލަށް ޓީމު ފައްތަން މަސައްކަތް ކުރަމުން އަންނަ ކަމަށް ފްލިކް ބުންޏެވެ. ފްލިކް ބޭނުން ވަނީ ބާސެލޯނާގެ ކުޅުންތެރިން މެޗު ފެށުނީއްސުރެ، އެންމެ ފަހު ވަގުތާ ހަމަ އަށް ވެސް ގަދަ އަޅާ މަސައްކަތްކޮށް، ނަތީޖާ ނެރުމެވެ. އެމަގުން ކުރިއަށް ގޮސްފި ނަމަ، ބާސެލޯނާ އަށް އެންމެ ފުރިހަމަ ކާމިޔާބު ހޯދޭނެ ކަމުގެ ޔަގީންކަން ވެސް ފްލިކް އަށް އޮވެ އެވެ.

ފްލިކްގެ އިރުޝާދުގެ ދަށުން ބާސެލޯނާ އިން ދެން ކުޅޭނީ ޖޯން ގެމްބާ ޓްރޮފީ މެޗެވެ. އޯގަސްޓު މަހުގެ 12 ވަނަ ދުވަހު އެ މެޗުގައި ބާސެލޯނާ ނިކުންނާނީ މޮނާކޯއާ ދެކޮޅަށެވެ.