ޗެލްސީ އަށް ކުޅެމުން އަންނަ އިންގްލެންޑުގެ މިޑްފީލްޑަރު ކޮނާ ގަލަގާ، އެ ކުލަބު ދޫކޮށް ސްޕެއިންގެ އެތުލެޓިކޯ މެޑްރިޑަށް ބަދަލުވާން އެއްބަސްވެއްޖެ އެވެ.
އުމުރުން 24 އަހަރުގެ ކުޅުންތެރިޔާ ޗެލްސީއާ ގުޅުނީ 2019 ވަނަ އަހަރު އެވެ. ޗެލްސީ އާއެކު އޭނާ ސޮއި ކޮށްފައިވާ އެއްބަސްވުން އައު ކުރުމަށް އެ ކުލަބުން ވަނީ މަސައްކަތް ކޮށްފަ އެވެ. ނަމަވެސް ޗެލްސީގެ ހުށަހެޅުން ޤަބޫލު ނުކުރަން ގަލަގާ ވަނީ ނިންމައިފަ އެވެ. ގަލަގާ ހޯދުމަށް އެތުލެޓިކޯ އިން ޗެލްސީ އާއެކު ކުރި މަޝްވަރާތަކުން، އޭނާ ދޫކޮށްލަން އެ ކުލަބުން ވެސް އެއްބަސްވެފައިވާ ކަމަށް ރިޕޯޓުތައް ބުނެ އެވެ.
މީޑިއާ ތަކުގައި ބުނެފައިވާ ގޮތުން ގަލަގާ ހޯދުމަށް އެތުލެޓިކޯ އިން ހުށަހެޅި ހުށަހެޅުމަށް އޭނާ ވަނީ އެއްބަސްވެފަ އެވެ. އަދި އެތުލެޓިކޯ އަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ކަންކަން ފުރިހަމަ ކުރުމަށް، އަންގާރަ ދުވަހުގެ ވަގުތެއްގައި ގަލަގާ މެޑްރިޑަށް ދާނެ ކަމަށް ވެސް ވަނީ ބުނެފަ އެވެ.
ގަލަގާ ވަނީ ޗެލްސީ އަށް ކުޅެދިން 95 މެޗުން 10 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. ޗެލްސީގައި ހުރުމަށްފަހު ގަލަގާ ވަނީ ލޯނު އެއްބަސްވުމެއްގެ ދަށުން ހަތަރު ކުލަބަކަށް ކުޅެފަ އެވެ. އެއީ ޗާލްޓަން އެތުލެޓިކް، ސްވަންސީ ސިޓީ، ވެސްޓް ބްރޮމްވިޗް އަލްބިއަން އަދި ކްރިސްޓަލް ޕެލަސް އެވެ.
