ސައޫދީ ވޯލްޑްކަޕް ބިޑަށް 140 ގައުމަކުން ތާއީދު ކުރަނީ

ވޯލްޑްކަޕް 2034 ގައި ބޭއްވުމަށް ސައޫދީ އަރަބިއާއިން ކުރި ބިޑަށް ދުނިޔޭގެ 140 ގައުމަކުން ތާއީދު ކުރާނެ ކަމަށް އެ ގައުމުން ބުނެފި އެވެ.

ސައޫދީ އަރަބިއާ އަކީ ވޯލްޑްކަޕް 2034 ވަނަ އަހަރު ބޭއްވުމަށް ރަސްމީކޮށް ހުޅުވާލުމުން ބިޑްކުރި ހަމައެކަނި ގައުމެވެ. ދުނިޔޭގެ މީޑިޔާތަކުން ބުނަނީ އެހެން ގައުމުތަކުން ކުރިމަތިނުލީ ސައޫދީގެ މުއްސަނދިކަމުގެ ކުރިމަތީގައި ވާދަނުކުރެވޭނެ ކަމަށް ގަބޫލުކުރެވިގެން ކަމަށެވެ. އަދި މިއީ ވޯލްޑްކަޕުގެ ތާރީހުގައި މިހާ ގިނަ އަދަދެއްގެ ގައުމުތަކުން އެއް ބިޑަކަށް ތާއީދު ކުރަން ނިންމި ފުރަތަމަ ފަހަރު ވެސްމެ އެވެ.

ސައޫދީ އަރަބިއާގެ ފުޓްބޯޅަ ފެޑަރޭޝަނުގެ ރައީސް ޔާސިރު އަލް މިޝޭލް ވިދާޅުވީ 48 ގައުމު ބައިވެރިގެން ދުނިޔޭގެ އެންމެ ގައުމަކުން ބާއްވާ އެންމެ ފުރިހަމަ މުބާރާތް ބާއްވާނީ އެ ގައުމުން ކަމަށެވެ.

އޭނާ ވިދާޅުވީ ސައޫދީ އަރަބިއާގެ ވިޝަން 2030 އަކީ ވޯލްޑްކަޕަށް ވަރަށް މުހިންމު ޕްރޮޖެކްޓަކަށްވާނެ ކަމަށާއި ސައޫދީގެ މުޅި ސަރުކާރު އޮތީ ދުނިޔޭގެ އެންމެ މަގުބޫލު ކުޅިވަރު މުބާރާތަށް އެންމެ ފުރިހަމަ އަށް އެއްބާރުލުން ދިނުމަށް ތައްޔާރަށް ކަމަށެވެ. އޭނާ އަދި ވިދާޅުވީ މި މުބާރާތަށް ތައްޔާރުވާން ފަށައިގަތުމާއެކު ސައޫދީގައި އެތައް ހާސް ވަޒީފާއެއް އިތުރުވެގެންދާނެ ކަމަށާއި މިއީ އަވައްޓެރިންނާއި ދުރުތިބީންނަށް ވެސް ލިބޭ ރަނުގެ ފުރުސަތަކަށްވާނެ ކަމަށެވެ.

އަދި 2034 ވަނަ އަހަރުގެ ވޯލްޑްކަޕުގައި ވާދަކުރާނެ މޮޅު ގައުމީ ޓީމެއް އުފެއްދުމަކީ ވެސް ބޮޑު އަމާޒެއް ކަމަށާއި އެކަމަށްޓަކައި މިހާރު ވެސް މަސައްކަތް ފަށާފައިވާ ކަމަށެވެ. މި ގޮތުން އިޓަލީ އާއި ސްޕޭނުުގެ ކުލަބުތަކުގެ ސުޕަކަޕް ބޭއްވުމުގެ އިތުރަށް ޔޫރަޕުގެ ފުޓްބޯޅައިގެ ހަރަކާތްތައް އިތުރުކުރަން މިހާރު ވިސްނާފައިވާ ކަމަށެވެ.

ސައޫދީން ވަނީ ވޯލްޑްކަޕަށް 11 ސްޓޭޑިއަމް ތައްޔާރު ކުރަން ނިންމައިފަ އެވެ.