ހަނިއްޔާ އަވަހާރަކޮށްލި ހާދިސާއާ ގުޅުން ހުރި ކަމުގެ ތުހުމަތުގައި އީރާނުގެ އަސްކަރިއްޔާގެ އަދި އިންޓެލިޖެންސްގެ އިސް އޮފިސަރުންތަކެއް ހައްޔަރު ކޮށްފި

އީރާނުގައި ހުންނަވަނިކޮށް މި ދިޔަ ބުދަ ދުވަހުގެ ފަތިހު ހަމާސް ގެ ސިޔާސީ ލީޑަރ އިސްމާއީލް ހަނިއްޔާ އަވަހާރަ ކޮށްލި ހާދިސާ އާ ގުޅުން ހުރި ކަމުގެ ތުހުމަތުގައި އީރާނުގެ އަސްކަރިއްޔާގެ އިސް އޮފިޝަލުން ތަކަކާއި ޖާސޫސީ އިސް އޮފިޝަލުން ތަކެއް އީރާނު ސަރުކާރުން ހައްޔަރުކޮށްފިއެވެ.

އީރާނުގެ އިސް ދެ އޮފިޝަލަކާ ހަވާލާދީ ނިއުޔޯކް ޓައިމްސްގައި ހޮނިހިރު ދުވަހު ލިޔެފައިވާ ޚަބަރެއް ގައި ބުނެފައިވަނީ ހަނިއްޔާ އަވަހާރަ ކޮށްލި ޙާދިސާ ގެ ތަހުގީގު އީރާނުން ގެންދަނީ ފުޅާ ދާއިރާއެއްގައި ހިންގަމުން ކަމަށެވެ.

މި ހަމަލާއާ ގުޅުން ހުރި ކަމުގެ ތުހުމަތުގައި އީރާނުގެ އަސްކަރިއްޔާގެ ބެލުމުގެ ދަށުގައި ހުންނަ ހަނިއްޔާ ހުންނެވި ގެސްޓްހައުސްގެ އިސް އޮފިޝަލުން ތަކެއް ވެސް ހައްޔަރު ކޮށްފައިވާ ކަމަށް މި ޚަބަރުގައި ބުނެފައިވެއެވެ.

ހަނިއްޔާ އަވަހާރަ ކޮށްލި ހާދިސާ ތަހުގީގު ކުރަމުންދަނީ އީރާނުގެ ރިވޮލިއުޝަނަރީ ގާޑްސް ކޯޕްސް (އައިއާރުޖީސީ) ގެ ޚާއްސަ ޖާސޫސީ ޔުނިޓަކުން ކަމަށް ވެސް ނިއުޔޯކް ޓައިމްސްގައި ބުނެފައިވެއެވެ.

މި ހަމަލާ އަކީ އީރާނުގެ ސެކިއުރިޓީ އަދި އިންޓެލިޖެންސްގެ ބޮޑު ފެއިލިއަރ އެއްގެ ގޮތުގައި ތަޖުރިބާކާރުން ސިފަ ކުރާ ހަމަލާ އަކަށް ވުމުގެ އިތުރުން، ތަޖުރިބާކާރުން ބުނެފައިވަނީ މި ހަމަލާ ދިނުމުގެ އިޒްރޭލުގެ މަގްސަދަކީ އިޒްރޭލުގެ އަތުނުޖެހޭ ހިސާބަކަށް އިޒްރޭލުން ބޭނުންވާ އެއްވެސް ފަރާތަކަށް ނުދެވޭނެ ކަން ދެއްކުން ކަމުގައެވެ.

އިޒްރޭލުން ރަސްމީ ކޮށް ހަނިއްޔާ އަވަހާރަކޮށްލި ކަމަށް ބުނެފައި ނުވި ނަމަވެސް އަދި އެމެރިކާ އިން މި ހަމަލާގައި ބައިވެރި ނުވާކަމަށް ބުނެފައިވީ ނަމަވެސް، އީރާނުން ބުނެފައިވަނީ މިއީ އިޒްރޭލުން ރާވައިގެން ހިންގި އަދި އެމެރިކާގެ ފެހި ސިގްނަލް ލިބިގެން ދިން ހަމަލާ އެއް ކަމަށެވެ.

އައިއާރުޖީސީ އިން ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ މިހާ ހިސާބަށް ހަމަލާގެ ހަގީގަތް ހޯދުމަށް ހިންގުނު ތަހުގީގުން، ހަމަލާ ދީފައިވަނީ ހަނިއްޔާ ހުންނެވި ގެސްޓް ހައުސްގެ ގޯތިން ބޭރުން 7 ކިލޯގެ ގޮވާތަކެތި އެކުލެވޭ ވޯ ހެޑެއް ހަރުކޮށްފައިވާ ކުރުރާސްތާ މިސައިލެއް ފޮނުވާލައިގެން ކަން އެނގިފައިވާ ކަމަށެވެ.

ނިއުޔޯކް ޓައިމްސް އިން ބުނެފައިވަނީ، ހަމަލާ ދިނުމާއެކު އައިއާރުޖީސީ އިން ވަނީ ހަނިއްޔާ ހުންނެވި ގެސްޓްހައުސް ރެއިޑްކޮށް، އެ ތަނުގެ މުއްވައްޒަފުން އިމާރާތުގެ ތެރޭގައި ބަންދުކޮށް އަދި ބައެއް އޮފިޝަލުން ހައްޔަރު ކޮށްފައި ކަމަށެވެ. އޭގެ އިތުރުން އިމާރާތުގެ އޮފިޝަލުންގެ ފޯނު ތައް ތަހުގީގަށް އަތުލާފައިވާ ކަމަށްވެސް ބުނެފައިވެއެވެ.

ތެހެރާން އަށް ހަނިއްޔާ ކުރައްވާ ދަތުރުފުޅު ތަކުގައި އެތައް ފަހަރެއްގެ މަތިން ހުންނަވާފައިވަނީ އެ ގެސްޓްހައުސްގައި ކަމަށާއި ކޮންމެ ފަހަރަކުވެސް ބޭނުން ކުރައްވަނީ އަބަދުވެސް އެއް ކޮޓަރިއެއް ކަމަށްވެސް މި ޚަބަރުގައި ވެއެވެ.

ހަމަލާ އަށް ފަހު ތަހުގީގު ޓީމުން ގެސްޓްހައުސްގެ ސީސީޓީވީ ފުޓޭޖް ދިރާސާ ކޮށް ގެސްޓް ލިސްޓް ޗެކްކޮށް، ވަދެ ނިކުމެ އުޅުނު މީހުންގެ މައުލޫމާތު ދިރާސާކޮށްފައިވާ ކަމަށް ނިއުޔޯކް ޓައިމްސް އިން ބުނެފައިވެއެވެ.

އީރާނުން ތުހުމަތު ކުރަނީ މި ހަމަލާ ރާވާ ހިންގި އިޒްރޭލުގެ ޖާސޫސީ އިދާރާ މޮސާޑް ގެ އެޖެންޓުން އީރާނުގައި އަދިވެސް ތިބި ކަމުގައެވެ. އެއާ އެކު އިތުރު ތަހުގީގު ޓީމަކުން އީރާނުގެ ބައިނަލް އަގްވާމީ އެއަރޕޯޓްތަކާއި ޑޮމެސްޓިކް އެއަރޕޯޓްތަކުގެ ސީސީޓީވީ ފުޓޭޖް އާއި ފަސިންޖަރުންގެ ލިސްޓްތައް ވެސް ގެންދަނީ ދިރާސާ ކުރަމުން ކަމަށް ނިއުޔޯކް ޓައިމްސްގައި ވެއެވެ.

ނިއުޔޯކް ޓައިމްސް އިން ބުނެފައިވަނީ މި ހާދިސާ ހިނގުމާއެކު އީރާނުގެ އިސް އޮފިޝަލުންގެ ހަށި ފާރަވެރިންނާއި އެ ފަރާތްތަކުން ގެންގުޅޭ އިލެކްޓްރޯނިކް އާލާތްތަކާއި ފޯނު ބަދަލު ކޮށްފައިވާ ކަމަށެވެ.