މައުލޫމާތު ހާމަކުރުމުގެ ސިޔާސަތުގެ ދަށުން ހީނާ ނޫސްވެރިންނަށް ފިއްލަވައިގެން އުޅުއްވާތާ 2 މަހަށް ވުރެ ގިނަ ދުވަސް

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕާސަންކަމަށް ނުވަތަ ތަރުޖަމާނަކަށް ހީނާ ވަލީދު އައްޔަން ކުރައްވާފައިވަނީ 23 އޭޕްރީލް 2024 ވަނަ ދުވަހުއެވެ. އެއީ ވެސް އެ މަގާމު ހުސްކޮށް އޮންނަތާ 4 މަހަށް ވުރެ ގިނަ ދުވަސްވީ ފަހުންނެވެ. ތަރުޖަމާނެއް އައްޔަން ކުރެއްވީ ނޫސްވެރިން ކުރާ ސުވާލުތަކާ މީޑީއާތަކުން ބޭނުންވާ މައުލޫމާތު ހާމަ ކޮށްދިނުމަށެވެ. ނަމަވެސް މިސަރުކާރުގެ ތަރުޖަމާން ހިނާ ފެނިގެންދަނީ ނޫސްވެރިންނާ މީޑިއާތަކާ ދުރު ބޭކަނބެލެއްގެ ގޮތުގައެވެ.

މައުލޫމާތު ހާމަކުރުމުގެ ސިޔާސަތާއެކު ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވި ނަމަވެސް އެމަނިކުފާނު ވެސް އަދި ތަރުޖަމާނު ވެސް ނޫސްވެރިންނާ ބައްދަލުނުކުރައްވާތާ ވަރަށް ގިނަ ދުވަސް ވަނީ ވެފައެވެ. އެންމެފަހުން ތަރުޖަމާން ހީނާ ނޫސްވެރިންނާ ބައްދަލުކުރައްވާފައިވަނީ 29 މެއި 2024 ގައެވެ. މި ނޫސްވެރިންގެ ބައްދަލުވުމުގައި ރައީސް މުއިއްޒު 5 ޑިސެންބަރު 2023 ގައި ނޫސްވެރިންނާ ބައްދަލުކުރެއްވުމަށްފަހު، ނޫސްވެރިންނާ ބައްދަލުނުކުރައްވާތީ މައުލޫމާތު ހާމަކުރުމުގެ ސިޔާސަތަށް ބަދަލުތަކެއް އައިތޯ ނޫސްވެރިން ސުވާލުކޮށްފައިވެއެވެ. އެދުވަހު ވެސް ތަކުރާރުކޮށް ތަރުޖަމާން ހީނާ ވިދާޅުވީ މި ސަރުކާރުން މައުލޫމާތު ހާމަކުރުމާ ދެކޮޅު އެންގުމެއް ނާންގާނެ ކަމަށާއި ސިޔާސަތަކީ ވީހާ ވެސް ބޮޑަށް މައުލޫމާތު ހާމަކުރުން ކަމަށެވެ. ނަމަވެސް އޭގެފަހުން ހީނާ ވެސް ނޫސްވެރިންނާ ބައްދަލުކުރައްވާފައިނުވެއެވެ.

މީގެ އިތުރުން ތަރުޖަމާން ހީނާއަށް ސުވާލު ވަޓްސްއެޕް މެދުވެރިކޮށް ފޮނުވުމުން ވެސް ކުރަނީ ސީންއެވެ. ގުޅިއަސް ފޯނެއް ނުނަންގަވައެވެ. ތަރުޖަމާނަކީ ސަރުކާރުގެ މޫނު މައްޗަށްވާއިރު، މިގޮތަށް އަމަލުކުރުމުން ސަރުކާރުގެ މޫނުމަތި ހަޑިވުން ނޫން ކަމެއްނުވާނެއެވެ.

ހިނާއަކީ މުޅި ސަރުކާރުގެ ތަރުޖަމާނުގެ އިތުރުން، ސަރުކާރު ހިންގާ މައިޕާޓީ ޕީއެންސީގެ ތަރުޖަމާނެވެ. އަދި އެންސްޕާގެ ސީއީއޯއެވެ. ގިނަ މަގާމުތަކެއް ފުރުއްވާއިރު، އެކަމަނާ ވަރަށް ބުރަވާނެކަން ޔަގީނެވެ. އެހެންކަމުން ފަސޭހަކޮށްދިނުމަށް ރާއްޖެއެމްވީގެ ފަރާތުން ސުވާލު ލިޔެފައި ވެސް ވާނީ ފޮނުވާފައެވެ. ނަމަވެސް މަހަކަށް ވުރެ ގިނަ ދުވަސްވީއިރު މިއިން އެއްވެސް ސުވާލަކަށް ހީނާގެ ފަރާތުން ޖަވާބެއް ދެއްވާފައިނުއެވެ.

ރާއްޖެއެމްވީއިން ކުރި ބައެއް ސުވާލުތަކަކީ ސަރުކާރުގެ އެކި މިނިސްޓްރީތަކަށް ރައީސް އޮފީހުން ފޮނުވި ސިޓީއެއްގައި އެ ވުޒާރާ މެދުވެރިކޮށް ރައްޔިތުންގެ އަތުން ޚިދުމަތްތަކަށް އިތުރު ފީއެއް ނެގޭނެ ގޮތެއް އޮތްތޯ ބެލުމަށްފަހު އަންގައިދިނުމަށް ދަންނަވާފައިވާކަމަށް މައުލޫމާތު ލިބިފައިވާ ކަމަށެވެ. އެއީ ތެދުވާހަކައެއްތޯއެވެ. ނަމަވެސް ހީނާ މެސެޖް ވަނީ ސީން ކޮށްލާފައެވެ. މީގެ އިތުރުން އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލުމަށް ދިން ޙަމަލާ އެ ދުވަހު ރައީސް ޑރ މުއިއްޒު ވަނީ ކުށްވެރި ކުރައްވާފައެވެ. އަދި އިންޑިއާގައި ހިނގި ބިންގަނޑު ކަނޑައިގެން ދިއުމުގެ ހާދިސާއާ ގުޅިގެން އެގައުމުގެ ބޮޑުވަޒީރު ނަރެންދުރަ މޯދީއަށް ތައުޒިޔާ ވިދާޅުވެފައިވާ ކަމަށެވެ. ނަމަވެސް ހަމާސް ގެ އެންމެ އިސް ސިޔާސީ ލީޑަރު އިސްމާއީލް ހަނިއްޔާ އީރާނުގައި ހުންނަވަނިކޮށް އިޒްރޭލުން ހަމަލާ ދީ އަަވަހާރަ ކޮށްލުމާއި ގުޅިގެން ރައީސް އެއްޗެއް ވިދާޅެއް ނުވެއެވެ. އެކަމާ ކުރީގެ އިސްލާމިކް މިނިސްޓަރުވެސް އެބަވޭ ފާޑު ވިދާޅުވެފައިވާއިރު، އެކަމުގައި ރައޯސް އޮފީހުގެ ބަހަކީ ކޮބައިތޯ ވެސް ތަކުރާރުކޮށް ވާނީ އަހާފައެވެ. ނަމަވެސް މި މެސެޖް ވެސް ހީނާ ސީން ކޮށްލީއެވެ.

މައުލޫމާތު ހާމަކުރުމުގެ ސިޔާސަތުގެ ދަށުން ތަރުޖަމާނު ހިނާ ނޫސްވެރިންނަށް ފިއްލަވައިގެން އުޅުއްވާތާ މިވަނީ 2 މަހަށް ވުރެ ގިނަ ދުވަސްވެފައެވެ. ރައްޔިތުންނާ ގައުމާ ގުޅުންހުރި ގިނަ ކަންކަމުގައި ސުވާލު ކުރުމުން ސީން ޒޯން ކުރުމުން ގައުމުދާ މިސްރާބާމެދު ގިނަ ރައްޔިތުން ސުވާލު އުފައްދާނެ ކަމާމެދު ޝައްކަތްނެތެވެ. ސީން ޒޯން ކުރުމުން އިތުބާރު ގެއްލުން ނޫން ކަމެއް ނުވާނެއެވެ.