އެކުވެރި ޝަހީމަށް.
މޫރިތިކަމާއި ނިޔަނެތި ކަމާއެކު ހެޔޮދުއާ ސަލާމް ރައްދު ކުރުމީ ވާޖިބެއް ކަމުގައި ދެކެމެވެ.
އެކުވެރި ޝަހީމޫއެވެ. މަގޭ ހިތް މަނިކުފާނަށް ހަމަ ސާފެވެ. ތެޅިތެޅި އޮތަސް އެހިތް އޮތީ ޚާލިސް ކަމާއެކުއެވެ. އެކަމަކު ތިޔަ ވިދާޅުވި ވާޖިބަކުން މީހުން އެއޮށް ގޮވާހާ އެއްޗަކުން މަށަށް ހަމަ ނޯވެވުނީއެވެ. މަނިކުފާނަށް ހެޔޮއެދޭތީއެވެ. މީހުން އެހެރަ ކިޔާހާ ބަނދިވަރުން މަހަމަ ހަލާކުވެއްޖެއެވެ. ސޯޝަލް މީޑިއާގައި އެލިޔާ ފަތިވަރުތަކުން މަގޭ ކެތްތެރިކަން ކޮޅުން ލައިފިއެވެ. އެވެރިންނަށް ރައްދުދީ ސޯޝަލް މީޑިއާ ފްލަޑްވާވަރަށް ލެޔެލާހިތުން ހުރެވެނީކީ ނޫނެވެ. އެކަމަކު މަނިކުފާނާ މަށާ ކިތައްމެ ގާތަސް އެވެރިންގެ ވާޖިބަށް ހުރަސް އަޅާކަށް މަށަކަށްވާ ލާހިކު ކުޅަދާނައެއް ނޫނެވެ. އެހެންނަމަވެސް މަގޭ ވާޖިބު އަދާކޮށްލެވުނު ކަމަށްވާނީ މަނިކުފާނަށް މިސިޓީ ފޮނުވާލައިގެން ކަމަށް މަގޭ ހިތް މަށަށް ވާޖިބު ކުރާތީ ފޮނުވާލަނީއެވެ. ގާތް ރަހުމަތްތެރިކަމުގެ ވާޖިބު އަދާކުރުމަށެވެ.
މަނިކުފާނެއެވެ. މަނިކުފާނަކީ މަ ގަބޫލުކުރާ ބޮޑު ޝެއިޚެވެ. އަދި މިހާރު މިއޮތް ސަރުކާރުގެ އެންމެ ބޮޑު ޝެއިޚެވެ. ދީނީގޮތުންވެސް އަދި އެހެން ގޮތަކުންވެސް މަށަކީ މަނިކުފާނުގާތު ފަތިގަނޑު ކާތާލެވޭވަރުގެވެސް މީހެއް ނޫނެވެ. މަހަމަ ލޮލުންބޮލުން އެކަން ގަބޫލު ކުރަމެވެ.
އެކަމަކުވެސް ޝަހީމޫއެވެ. އަންޒަމާނު ކަރައިން ފެށިގެން މިތަނުގައި ހެޔޮއެދިގެން ކުރާހާ ކޮންމެ ކަމެއް ކުރަމުން އައީކީ ތިޔަބުނާ "ވާޖިބަކަށް" ވެގެނެއް އެކަންޏެއް ނޫނެވެ. އަމުދުން ތިޔަ ފަލަސްތީނުގެ ކަންކަމުގައި ދިވެހިންނަށް ވެވުނު ވަރަކުން ގުރުބާންވެ އުނުއޮތް ފޮށާވެސް ދިއްކޮށްލަން ތައްޔާރަށް އެތިބީ މުޅިއަކުން ވާޖިބުކަން އެކަނި ސަލާމަތް ކުރާކަށް ނުމެ ނޫންމެއެވެ.
މަނިކުފާނޫއެވެ. ޝަހީދުވެގެން މިއުޅެނީ މުޅި އިސްލާމީ އުއްމަތާ ގުޅުންހުރި މީހެކެވެ. ފަލަސްތީނުގައިވާ މާތްވެގެންވާ ގުދުސް ދިފާއު ކުރުމުގައި އަދި ފަލަސްތީނުގެ އެންމެހާ މުސްލިމުންނަށްޓަކައި ޖިހާދު ކުރަމުންދިޔަ އަހަރެމެންފަދަ މުސްލިމެކެވެ. ހުޅަނގާ އެމެރިކާއަށް ވިކިފައިތިބި ބަޔަކު މީހުން ހަމާސް ޖަމާއަތާއި އެޖަމާއަތުގެ ލީޑަރުންނަކީ ޓެރަރިސްޓުން ކަމަށް ހެދިޔަސްމެއެވެ.
މަނިކުފާނޫއެވެ. މަނިކުފާނުވެސް ވިދާޅުވާތީ އަހަމެވެ. ތިމަންމެން މިތިބީ ފަލަސްތީނާ އެކުގައެވެ. މިހާރު ޔަހޫދީން ފަލަސްތީނުގެ މުޅި ޖީލު ނައްތާލަން އުޅޭތީ ދިފާއުގައި ނުކުމެ އުޅޭ އެންމެނަށް ހެޔޮއެދިގެންނެވެ. އެކަމުގައި ކޮންމެ ކަމެއް ކުރަންވެސް މަމެން މިތިބީ ތައްޔާރަށޭ މަނިކުފާނާ މަނިކުފާނުގެ ސަރުކާރުން ތިޔަ އަންނަނީ ބުނަމުން ނޫންތޯއެވެ. އެކަމަށްޓަކައި މަނިކުފާނާއި މަނިކުފާނުގެ ސަރުކާރުން ކުރާހާ ހުރިހާ ކަމަކީވެސް ވާޖިބު ތޯއެވެ.
ނާފަހެ ދައުލަތުގެ މީޑިޔާ މެދުވެރިކޮށް ބޮޑު ޓެލެތޯނެއްވެސް އެވެރިންނަށްޓަކައި ބާއްވައިފީމު ނޫންތޯއެވެ. ފަންޑުތަކުން ފައިސާވެސް ހަދިޔާކޮށްފީމު ނޫންތޯއެވެ. ކެންޕެއިނަށް ބަހާލިއަސް މިފްކޯގެ މަސްދަޅުތައްވެސް ފަލަސްތީނަށް ދޭން އެއްކުރީމު ނޫންތޯއެވެ. ނަމެއްގައި ނަމަވެސް އިޒްރޭލު ޕާސްޕޯޓް މަނާކުރާނަމޭ އެބަގޮވަމެއް ނޫންތޯއެވެ. މުޅިންވެސް މިއީ ވާޖިބަކަށް ވެގެންތޯއެވެ.
މަނިކުފާނޫއެވެ. މަށަށް ހަމަ ނޭނގޭތީ އަހާލީއެވެ.
ޝަހީމޫއެވެ. ފަރުޟު ނަމާދަށްފަހު ފަލަސްތީނުގެ ހައްގުގައި މިސްކިތްތަކުގައި މިކުރާ ދުއާވެސް މިއީ ވާޖިބުކަން ކެނޑިދާނެތީ ކުރާކަމެއް ހެއްޔެވެ. ގައިމު އެވެރިންނަށް ކެތްތެރިކަން ދެއްވުމަށާއި އެވެރިންގެ ދިފާއުގައި ޖިހާދު ކުރާ ފަރާތްތަކަށް ނަސްރު ދެއްވުމަށްވެސް އަހަރަމެން އެދުއާގައި ކިޔަނީ ނޫންތޯއެވެ. އެއީ ތިޔަ ވުޒާރާއިން މިސްކިތްތަކުގައި ކުރަން ފޮނުވި ދުއާއެއް ނޫންތޯއެވެ.
މަނިކުފާނޫއެވެ. މުޅި އިސްލާމީ އުއްމަތް، ހަނިއްޔާ ޝަހީދު ކޮށްލުން ކުށްވެރި ކުރަމުންދިޔައިރު މަނިކުފާނުގެ ސަރުކާރުން އެކަން ނުކޮށް ލަސްކުރީ ވާޖިބަކަށް ނުވީމާ ދެއްތޯއެވެ. ނޫންނަމަ މަނިކުފާނުމެން ބިރުން ތިޔަ ރޫރޫއަޅާ އެމެރިކާއިން އެއްޗެކޭ ބުނެފާނެތީ ވާޖިބު އަދާކުރަން ދެއްތޯއެވެ.
މަހަމަ ހައިރާންވެ އަންތަރީސް ވެއްޖެއެވެ. ރައްޔިތުން ކެކިއެރީމާ އެކަން ކުށްވެރިކުރީ ވާޖިބު އަރާ ހަމަކުރީތޯއެވެ. ނޫނީ ކުރިން ވާޖިބަކަށް ނުވެ އޮތްކަމެއް ވާޖިބަކަށްވީތޯއެވެ. ނޫނީ ހަމަ އެދުވަހު އިންޑިއާގައި ކިސަޑު ތޫފާނަކުން 150 އެއްހާ މީހުން މަރުވެގެން މަނިކުފާނުގެ ސަރުކާރުން ވަގުތުން ވަގުތަށް ތައުޒިޔާކީ ވާޖިބު ހަނދާން ވެގެން ދެއްތޯއެވެ.
ނޫނޭވާ ސާބަހެވެ. މީގެ ކުރިންވެސް އިސްލާމީ ވެރިން މަރުވެގެން ޣައިބަށް ކަށުނަމާދު ކުރެއެވެ. ބައިދަނޑިއަށް ދިދަވެސް ތިރިކުރަނީ ނޫންތޯއެވެ. މަނިކުފާނު ތިޔަ ވާޖިބު އަދާކުރައްވާ ސަރުކާރުން އިހަށް ދުވަހުވެސް އެކަން އެގޮތަށް ކޮށްގެން އުޅުނުތަން ބޮލެއް މައްޗަށްހުރި ކޮންމެ މީހަކަށް އެނގޭނެއެވެ. އަންގައިގެން އެކަން ކުރަނީ ބޮޑު ވާޖިބަކީތޯއެވެ.
މަހަމަ ކޮސްވެއްޖެއެވެ. ހަނިއްޔާ މަރުވެގެން ކަށުނަމާދު ކުރަން ބަޔަކު މީހުން އެދުން އެއީ ބޮޑު ދީނީގޮތުން ފިތުނަ ފަސާދަ އުފެއްދުމަކަށް ތިޔަ ހަދާލީ ކެބިނެޓް ވަޒީރު ކަމުގެ ވާޖިބަކަށް ވީތޯއެވެ. އަދި އެކަން އިޚްތިޔާރަށް ތިޔަ ދޫކޮށްލީ ވާޖިބަކަށް ނުވެގެން ކަމަށް ތިޔަ ވިދާޅުވަނީ ދީނީ ސަރުކާރުގައި މުޅިންވެސް ކުރަނީ ވާޖިބު ކަންކަން ވީމަ ދެއްތޯއެވެ. ނޫންނަމަ މަނިކުފާނު އަންގަވައިގެން 2015 ވަނަ އަހަރު ކިންގު ޢަބްދުﷲ ގެމައްޗަށް ހުރިހާ މިސްކިތެއްގައި ޣައިބަށް ކަށުނަމާދު ކުރުވީ އޭރު ވާޖިބަކަށް ވެގެންތޯއެވެ. އަދި ކުވޭތުގެ އަމީރުގެ މައްޗަށް މިދިޔަ އަހަރު ޣައިބަށް ކަށުނަމާދު ކުރުވުމަށްފަހު ޣައިބަށް ކަށުނަމާދު ކުރުމުގެ ވާޖިބުކަން ކެނޑުނީތޯއެވެ.
މަނިކުފާނޫއެވެ. ތިޔަގޮތައް މީހުން ލައްވާ ދުލުގައި ހިފައިގެން ދަމުވަން ނުހަދާށެވެ. މަނިކުފާނަށްޓަކައި މަށަކަށް އެކަން ކުޅަދާނައެއް ނޫނެވެ.
މަވާ ތިޔަ ވާޖިބު ބަލަން ހުންނާނަމެވެ. ވަރަށް ފަރުވާތެރިވެ ތިޔަ ވާޖިބުތައް ބަލާނަމެވެ. މިސަރުކާރުން ވާޖިބު ނޫން ކަމެއް ނުކުރާނެކަން ކަށަވަރުކޮށްގެންނެވެ. ވަރަށް ސަލާމެވެ.
