އެއީ މީގެ އަށް އަހަރު ކުރިއެވެ. ދިވެހި ގައުމާއި، ރައްޔިތުންގެ ހައްގުގައި މަސައްކަތް ކުރާނެ ޓީމެއް މިގައުމަށް ވުޖޫދުވި ދުވަހެވެ. ގައުމު އަމާން މިސްރާބަކަށް ގެންދިއުމަށް ބާރު އަޅައި، ސަރުކާރު ހަރުދަނާކޮށް ޒިންމާދާރު ކުރުމަށާއި، ދިވެހި ރައްޔިތުންގެ ހައްގުގައި ޖެހިލުމެއް ނެތި ބަސްބުނުމަ މިހާރުވެސް ދެމިތިބީ ހަމަ މިހިތްވަރު ގަދަ ސްޓޭޝަންގެ މުއައްޒަފުންނެވެ.

އާދެ! 15 ޑިސެންބަރު 2010 ވަނަ ދުވަހުގެ އަލިވިލުނީ ރާއްޖެޓީވީގެ ޚިދުމަތާއިއެކުއެވެ. މީހާ މީހަކަށް ވަނީ މީހަކަށް ހޭދީމައޭ ބުނާ ފަދައިން ރާއްޖެޓީވީގެ ހިޔާވަހިކަމުގެ ދަށުން އެތައް ބަޔަކު ތަމްރީނުވެ، ގައުމުގެ އެކި ދިމަދިމާލުގައި މިއަދު މަސައްކަތް ކުރަމުންދެއެވެ. މިއީވެސް ރާއްޖޭޓީވީއަށް ލިބޭ އުފަލެކެވެ. މިއަދު ރާއްޖެޓީވީއަށް 8 އަހަރު ފުރިފައިވާއިރު، މި ސްޓޭޝަނާއި މި ސްޓޭޝަނުގެ މުވައްޒަފުން ވަނީ ތަފާތު އެކިއެކި ހަރުފަތްތައް ގިރާ ކޮށްފައެވެ.

ބިރުވެރިކަމާއި، ނަމާން ކަމެވެ. ޖަލުގެ ކުޑަގޮޅިއާއި، އަނިޔާވެރިކަމެވެ. ނަމަވެސް މިހުރިހާ ކަމަށްވުރެ ސްޓޭޝަންއާ މުއައްޒަފުންގެ ހިތްވަރު ދަމަހައްޓައިދިނީ ރައްޔިތުންގެ ފަރާތުން ލިބެމުންދިޔަ ލޮތްބާއި، ކުލުނެވެ. އޭރުވެސް، މިހާރުވެސް ރާއްޖެޓީވީގެ ފަހަތުގައި ވަނީ ހަމަ ތިޔަ ރައްޔިތުންނެވެ.

ރާއްޖެޓީވީއަށް 8 އަހަރު ފުރުމާއެކު ރައްޔިތުން ދަނީ ރާއްޖޭގެ އެކި ކަންކޮޅުތަކުން އުފާވެރިކަމުގެ ތަފާތު އެކިއެކި މެސެޖް ފޯރުކޮށްދީ މުއައްޒަފުންނަށް ހިތްވަރު ދެމުންނެވެ.

އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވަނީ ދުވަހުގެ ތަހުނިޔާ ސްޓޭޝަންގެ ވެރިންނާއި ހުރިހާ މުއައްޒަފުންނަށް ދަންނަވާފައެވެ.

ވަރަށް ދަތި ހާލުގައިވެސް މިނިވަން ނޫސްވެރިކަން ރާއްޖޭގައި ދަމަހައްޓަން ރާއްޖެޓީވީން ކެނޑިނޭޅި ކުރަމުންގެންދިޔަ މަސައްކަތަށް އައްސަރިބަހާއި ސާބަސް ދަންނަވާކަމަށް ރައީސް ސޯލިހުގެ ތަހުނިޔާގައި ވިދާޅުވެފައިވެއެވެ.

ކުރީގެ ރައީސް މުހައްމަދު ނަޝީދުވެސް ވަނީ ސްޓޭޝަންގެ ހުރިހާ މުއައްޒަފުންނަށް މަރުހަބާ ދަންނަވާފައެވެ. އަދި އިލެކްޝަން ކޮމިޝަންގެ ކުރީގެ ރައީސް ފުއާދު ތައުފީގު ވެސް ވަނީ ރާއްޖެޓީވީގެ ހުރިހާ މުއައްޒަފުންނަށް ދުވަހުގެ ތަހުނިޔާ ފޮނުއްވާފައެވެ.

ރާއްޖެޓީވީގެ 8 ވަނަ އަހަރީ ދުވަހާއި ގުޅިގެން ސޯޝަލް މީޑިއާގެ އެކިއެކި ޕްލެޓްފޯމްތަކުގައި އާންމު ރައްޔިތުން މަރުހަބާ އޮއްސަމުން އަންނައިރު، ކުރީގެ ރައްޔިތުންގެ މަޖިލިސް މެންބަރުންނާއި، މިހާރުގެ މެންބަރުންނާއި، މިނިސްޓަރުންވެސް މިދުވަހުގެ އުފަލުގައި ބައިވެރިވެ ސްޓޭޝަންގެ މުއައްޒަފުންނަށް ހިތްވަރުދީ، ތަހުނިޔާގެ މެސެޖްތައް އަންނަނީ ފޮނުވަމުންނެވެ.

އަދި ކުރިއަށް އޮތީ އުފާވެރި ދުވަސްތަކެއް ކަމަށާއި، އައު ހިތްވަރަކާއެކު މަސައްކަތުގައި ދެމިތިބުމަށް ގިނަ ބަޔަކު ދަނީ އެދެމުންނެވެ.

މިދުވަހާއި ގުޅިގެން ރާއްޖެޓީވީގެ މެނޭޖިން ޑިރެކްޓަރ އަހުމަދު ސަލީމް ވިދާޅުވީ، 8 އަހަރުގެ ޚިދުމަތް ރާއްޖެޓީވީން އިން ރައްޔިތުންނަށް ދިނީ ތެދުވެރިކަމާއި، އަމަނާތްތެރި ކަމާއެކު ކަމަށެވެ. އަދި ބިރު ދެއްކުމަށް ފަސްނުޖެހި، ހުށަހެޅި އިނާމުތަކަށް ނޫނެކޭ ބުނަން ކެރިގެން ކަމަށެވެ.

މީގެ އިތުރަށް އެމްޑީ ސަލީމް ވިދާޅުވީ ރާއްޖެޓީވީގެ ކާމިޔާބީގެ މުގުލަކީ ތެދުވެރި ހިތްވަރުގަދަ މުވައްޒަފުން ކަމަށެވެ.

ރާއްޖެޓީވީ 8 ވަނަ އަހަރީ ދުވަސް ފާހަގަކުރަމުން އަންނައިރު، އެކި ފަހަރު މަތިން ރާއްޖެޓީވީ ކުރި ޖޫރިމަނާގެ އަދަދު 3.7 މިލިއަން ރުފިޔާއަށް އަރައެވެ. މިފައިސާ ދައްކާފައިވަނީ މުއައްޒަފުންނާއި، ރާއްޖެޓީވީގެ ބެލުންތެރިންނާއި، އާންމު ރައްޔިތުންގެ މަސައްކަތުންނެވެ. އަދި ރާއްޖެޓީވީގެ މުއައްޒަފުންނަށް ނުހައްގުން އެތަކެއް އަނިޔާއެއް ލިބިފައިވާއިރު މިއިން އެއްވެސް ކަމަށް އަދި އިންސާފު ލިބިފައެއް ނުވެއެވެ.